ايماقتار • 28 اقپان، 2020

تارازدا ازيا ەلدەرىنىڭ اگروحيميالىق فورۋمى ءوتتى

17 رەتكورسەتىلدى

تاراز قالاسىندا ازيا ەلدەرىنىڭ سەگىزىنشى اگروحيميالىق فورۋمى ءوتتى. وعان قازاقستان، رەسەي، ۋكراينا، بەلارۋس، وزبەكستان، قىرعىزستان، تاجىكستان، اۋعانستان جانە ليتۆا ەلدەرىنىڭ اۋىل شارۋاشىلىعى قۇرىلىمدارى مەن مينەرالدى تىڭايتقىشتار ءوندىرۋشى زاۋىتتارىنىڭ 500-دەن استام وكىلدەرى قاتىستى.

Aزيا ەلدەرى ءۇشىن اگروحيميالىق ماڭىزى بار اتالعان شارا بيىل بەسىنشى جىل قاتارىنان الەمدەگى ەڭ ۇلكەن فوسفوريت باسسەينى بار، ەلىمىزدىڭ حيميا يندۋسترياسىن دامىتۋ ورتالىعى بولىپ سانالاتىن جامبىل وبلىسىندا ۇيىمداستىرىلۋدا. فورۋمدى وتكىزۋگە مينەرالدى تىڭايتقىشتاردىڭ ءىرى وندىرۋشىلەرى «قازفوسفات»، «ەۆروحيم»، «قازازوت» كاسىپورىندارى مەن  «ماركەر گرۋپپ» اقپاراتتىق-تالداۋ كومپانياسى ۇيىتقى بولىپ وتىر. «قازفوسفات» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى، قازاقستاننىڭ ەڭبەك ەرى مۇقاش ەسكەندىروۆتىڭ ايتۋىنشا، شارانى وتكىزۋدەگى باستى ماقسات – اگروحيميالىق سالانىڭ كومەگىمەن توپىراقتىڭ قۇنارلىلىعىن، اۋىل شارۋاشىلىعى ءوندىرىسىنىڭ ونىمدىلىگى مەن تيىمدىلىگىن ارتتىرۋ، اگروحيميالىق ءونىمنىڭ ىشكى سۇرانىسىن ەسەلەۋ. ء«بىز تەك بىرلەسە جۇمىس جاساساق قانا اگروحيميالىق كەشەن جۇيەسىن ودان ءارى دامىتا الامىز»، دەدى مۇقاش ەسكەندىروۆ.

فورۋم جۇمىسىنا جامبىل وبلىسىنىڭ اكىمى بەردىبەك ساپارباەۆ ارنايى قاتىستى. «حيميا سالاسى ءۇشىن پايدالى قازبالار قورىنىڭ 75 پايىزى جامبىل وبلىسىندا شوعىرلانعان. بۇل ورايدا ونەركاسىپتىك ءونىم ەكسپورتىنىڭ 30 پايىزى «قازفوسفات» كاسىپورنىنىڭ زاۋىتتارىنا تيەسىلى. بۇل فورۋم ەلىمىزدىڭ اگرارلىق-ونەركاسىپتىك كەشەنىن دامىتۋعا ايتارلىقتاي سەرپىن بەرەدى دەپ ۇمىتتەنەمىن»، دەدى بەردىبەك ساپارباەۆ. بۇدان كەيىن جامبىلدىق شارۋا قوجالىق باسشىسى حاميتوللا باينازاروۆ قانت قىزىلشاسىن ءوسىرۋ ءۇشىن مينەرالدى تىڭايتقىشتاردى ساتىپ الۋعا سۋبسيديا مولشەرىن ۇلعايتۋ، تۇقىمدى كۇزدە ەمەس، كوكتەمگى ەگىس الدىندا الۋ ماسەلەسىن كوتەردى. سونداي-اق، «اوك قازاقستاندىق ىسكەرلىك كەڭەسى» قاۋىمداستىعىنىڭ باسقارما توراعاسى ارمان ەۆنيەۆ «اگرويندۋستريالدى قازاقستان 2030» ستراتەگيالىق باستاماسى تۋرالى جان-جاقتى ءتۇسىندىردى. جيىن بارىسىندا بەردىبەك ساپارباەۆ ارمان ەۆنيەۆتىڭ وڭىرلىك كلاستەرلەردى قۇرۋ يدەياسىن قولدادى. ء«بىزدىڭ وبلىستىڭ يەلىگىندە 5-10 گەكتار جەرى بار 18 مىڭنان استام شارۋا قوجالىعى تىركەلگەن. ولاردىڭ اينالىم قاراجاتى، تەحنيكالىق الەۋەتى، ساپالى تۇقىم مەن تىڭايتقىشتاردى ساتىپ الۋ مۇمكىندىگى جوق. ءبىز ولاردى ىرىلەندىرە وتىرىپ، كووپەراتيۆتەر قۇرۋ جۇمىستارىن جۇرگىزەتىن بولامىز»،  دەدى بەردىبەك ساپارباەۆ.

1

جامبىل وڭىرىندە بيىل بەسىنشى رەت ۇيىمداستىرىلىپ وتىرعان اگروحيميالىق فورۋم اگروونەركاسىپتىك جانە اگروحيميالىق بيزنەستى جۇرگىزۋدىڭ وزىق ادىستەرىن، تىڭايتقىشتاردى قولدانۋدىڭ زاماناۋي ادىستەرىن جانە اگرونوميالىق عىلىمدى دامىتۋدىڭ اسا ماڭىزدى ماسەلەلەرىن تالقىلاۋعا مۇمكىندىك بەردى. فورۋم جۇمىسى ازيا ەلدەرىنەن كەلگەن دەلەگاتتاردىڭ ەكسكۋرسيالىق ساياحاتىمەن تۇيىندەلدى.

 

جامبىل وبلىسى

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار