قازاقستان • 27 اقپان، 2020

مۇمكىندىگى شەكتەۋلى جاندار مەملەكەت باقىلاۋىندا

30 رەتكورسەتىلدى

بۇگىن پرەمەر-ءمينيستردىڭ ورىنباسارى ەرالى توعجانوۆ  ۇلتتىق قۇرامانىڭ جاپونيادا وتەتىن پاراوليمپيادا ويىندارىنا دايىندىعى اياسىندا نۇر-سۇلتان قالاسىنداعى پاراوليمپيادالىق  جاتتىعۋ ورتالىعى قىزمەتىمەن تانىستى.

پاراوليمپيادالىق جاتتىعۋ ورتالىعىندا  قازاقستان قۇراما كومانداسىنىڭ وقۋ-جاتتىعۋ جيىندارى، شەتەلدىك كوماندالارمەن بىرلەسكەن جيىندار سونىمەن قاتار ءتۇرلى سپورتتىق باسەكەلەر وتەدى.

قازاقستان رەسپۋبليكاسىنىڭ پاراوليمپيادالىق قۇراما كومانداسىنىڭ قۇرامىنا بارلىعى سپورتىڭ 13 تۇرىنەن 523 سپورتشى كىرەدى.

1

ەستەرىڭىزگە سالايىق، 2019 جىلدىڭ مامىرىندا ورتالىقتى ارالاۋ بارىسىندا پرەزيدەنت قاسىم-جومارت توقاەۆ توكيودا وتەتىن پاراوليمپيادا  ويىندارىندا تابىستى ونەر كورسەتۋى ءۇشىن قازاقستان قۇراماسىنا بارلىق ۇيىمداستىرۋ جانە قارجىلىق قولداۋ كورسەتىلەتىندىگىن ايتقان بولاتىن.

پاراوليمپيادالىق  جاتتىعۋ ورتالىعى  2018 جىلدىڭ 4 شىلدەسىندە تۇڭعىش پرەزيدەنت نۇرسۇلتان نازارباەۆتىڭ قاتىسۋىمەن اشىلدى.

قازاقستاندا ازىرگە تەڭدەسى جوق ورتالىق جازعى جانە قىسقى  پاراوليمپيادالىق سپورت تۇرلەرى  بويىنشا ۇلتتىق قۇراما كوماندالار مەن سپورتتىق رەزەرۆتىڭ  ساپالى ءارى كاسىبي جاتتىعۋىنا ارنالىپ سالىنعان.   مۇمكىندىگى شەكتەۋلى جاندارعا ارنالعان مۇنداي ورتالىق اقش، ۇلىبريتانيا، جاپونيا جانە وڭتۇستىك كورەيادا عانا بار.

ورتالىق بارلىق قاجەتتى قۇرال-جابدىقتارمەن جاراقتالعان.

پرەمەر-ءمينيستردىڭ ورىنباسارى ەرالى توعجانوۆقا ورتالىقتى تانىستىرعان قر ۇلتتىق پاراوليمپيادالىق كوميتەتتىڭ توراعاسى قايرات بورانباەۆ ەلىمىزدەگى پاراوليمپيالىق قوزعالىس قىزمەتى مەن مۇمكىندىگى شەكتەۋلى جاندار اراسىنداعى بۇقارالىق سپورتتىڭ دامۋى تۋرالى اڭگىمەلەپ  بەردى.

ونىڭ ايتۋىنشا، ورتالىق قۇرىلىسى مەن جابدىقتاۋ  بارىسىندا مۇمكىندىگى شەكتەۋلى جانداردىڭ بارلىق  قاجەتتىلىكتەرى ەسكەرىلگەن.

پاراوليمپيادالىق جاتتىعۋ ورتالىعىندا  مۇگەدەك سپورتشىلار سپورتتىڭ 14 ءتۇرى بويىنشا جاتتىعا الادى. اي سايىن مۇندا شامامەن  مۇمكىندىگى شەكتەۋلى 6 مىڭعا جۋىق سپورتشى جاتتىعادى.

ورتالىقتا بەيىمدەلگەن امبەباپ تسيفرلىق ترەناجەرلار مەن توپتىق جاتتىعۋلارعا ىڭعايلى ايماقتان تۇراتىن جاتتىعۋ، ويىن جانە كۇرەسكە ارنالعان ءۇش سپورتتىق زال جۇمىس ىستەپ تۇر. ءبىر اتاپ وتەرلىگى، ورتالىقتى جابدىقتاۋعا پاراوليمپياداشىلاردىڭ وزدەرى دە ات سالىسقان. ماسەلەن، اربادا وتىرىپ بيلەۋ بويىنشا قر قۇراماسىنىڭ مۇشەسى ارداق وتارباەۆ وسىنداعى مۇگەدەكتەر ارباسىن جۋاتىن ورىننىڭ اۆتورى.

ەرالى توعجانوۆ پاراوليمپيادالىق جاتتىعۋ ورتالىعىنىڭ قازىرگى زامانعا ساي ينفراقۇرىلىمى مەن ماتەريالدىق-تەحنيكالىق جابدىقتالۋىنا جوعارى باعا بەردى.

بۇگىنگى ساپارى بارىسىندا پرەمەر-ءمينيستردىڭ ورىنباسارى وتاندىق پاراوليمپيادا سپورتىنىڭ تاريحىندا كورۋ قابىلەتى تومەن سپورتشىلار اراسىندا تۇڭعىش رەت ۇيىمداستىرىلعان گولبولدان قازاقستان رەسپۋبليكاسى  كۋبوگىنىڭ اشىلۋ سالتاناتىنا قاتىستى.

ەرالى توعجانوۆ سپورتشىلارعا ارناعان سوزىندە ەلىمىزدە پاراوليمپيادالىق سپورتتى دامىتۋدىڭ ماڭىزدىلىعىن اتاپ ءوتتى.

«مۇمكىندىگى شەكتەۋلى جانداردى الەۋمەتتىك قورعاۋ ءاردايىم ەل باسشىلىعىنىڭ باقىلاۋىندا بولعان جانە  بولا بەرمەك.  مەملەكەت قازىر مۇمكىندىگى شەكتەۋلى جانداردىڭ ءوزىن دامىتۋعا جانە تولىققاندى ءومىر ءسۇرۋى ءۇشىن بارلىق قاجەتتى جاعدايدى جاساپ وتىر. پاراوليمپيادالىق جاتتىعۋ ورتالىعىنىڭ اشىلۋى وسىعان دالەل. سىزدەردىڭ ارقايسىلارىڭىزدا  جەڭىسكە دەگەن ىنتا-جىگەر جەتكىلىكتى. بىراق جەڭىس تۇعىرىنىڭ جوعارى بيىگىن باعىندىرۋ ءۇشىن بۇگىننەن باستاپ تەر توگۋ قاجەت.  سىزدەرگە ەل ءۇشىن جاۋاپتى سىنداردا جوعارى جەتىستىكتەر تىلەيمىن!»، - دەدى پرەمەر-ءمينيستردىڭ ورىنباسارى.

ەكى كۇنگە سوزىلاتىن بايراقتى باسەكەگە ەلىمىزدىڭ 5 وڭىرىنەن 40-تان اسا گولبولشى قاتىسىپ جاتىر.  

گولبول پاراليمپيادا ويىندارىنىڭ باعدارلاماسىنا ەنگىزىلگەن.  سپورتتىڭ بۇل ءتۇرى  قازاقستانعا  2017 جىلى كەلگەن. سودان بەرى 3 چەمپيونات ۇيىمداستىرىلدى.

بيىلعى باسەكە كومانداعا حالىقارالىق ارەناعا شىعۋعا جول اشادى.

سوڭعى جاڭالىقتار

ۇقساس جاڭالىقتار