قازاقستان • 27 اقپان، 2020

قازاقستان ەلشىسى تۇرىكمەنستان مينيسترلەرىمەن كەزدەستى

14 رەتكورسەتىلدى

قازاقستاننىڭ ەلشىسى ەركەبۇلان ساپيەۆ تۇرىكمەنستان ءبىلىم ءمينيسترى مامەدمۋراد گەلدىنيازوۆپەن جانە مادەنيەت ءمينيسترى اتاگەلدى شامۋرادوۆپەن جۇمىس كەزدەسۋىن وتكىزدى. بۇل تۋرالى سىرتقى ىستەر مينيسترلىگى ءمالىم ەتتى.

م. گەلدىنيازوۆپەن كەزدەسۋ اياسىندا تاراپتار قازاقستان مەن تۇرىكمەنستان اراسىنداعى ءبىلىم جانە عىلىم سالاسىنداعى ىنتىماقتاستىقتىڭ قازىرگى جاعدايى مەن دامۋ پەرسپەكتيۆالارىن تالقىلادى. سونداي-اق ءبىلىم بەرۋدى تسيفرلاندىرۋ، تاجىريبە الماسۋ، وقىتۋشىلار مەن ستۋدەنتتەر الماسۋ، مەكتەپ جانە ستۋدەنتتىك حالىقارالىق وليمپيادالارعا قاتىسۋ، ەكى ەلدىڭ الدىڭعى قاتارلى جوعارى وقۋ ورىندارى اراسىندا جەكە كەلىسىمدەر جاساسۋ ماسەلەلەرى قارالدى.

سونىمەن قاتار مادەنيەت ءمينيسترى ا. شامۋرادوۆپەن كەزدەسۋ بارىسىندا تاراپتار مادەني-گۋمانيتارلىق سالاداعى قازاق-تۇرىكمەن قارىم-قاتىناستارىن ودان ءارى نىعايتۋعا قاتىستى پىكىرلەرىمەن جانە ۇسىنىستارىمەن الماستى. اتاپ ايتقاندا، اعىمداعى جىلى ەكىجاقتى مادەني ءىس-شارالار وتكىزۋ، ونىڭ ىشىندە تۇرىكمەنستاننىڭ قازاقستانداعى مادەني كۇندەرى، قازاقستان مەن تۇرىكمەنستان اراسىنداعى مادەني ىنتىماقتاستىقتىڭ شارتتىق-قۇقىقتىق بازاسىن كەڭەيتۋ، سونداي-اق، مادەنيەت سالاسىنداعى ىقتيمال بىرلەسكەن جوبالاردى ىسكە اسىرۋ ماسەلەلەرى تالقىلاندى.

كەزدەسۋلەردىڭ قورىتىندىسى بويىنشا قازاقستاندىق ديپلومات سۇحباتتاسۋشىلاردى ءابۋ ناسىر ءال-ءفارابيدىڭ 1150 جىلدىعى مەن ابايدىڭ 175 جىلدىعىنا وراي 2020 جىلى جوسپارلانعان مەرەيتويلىق مەملەكەتتىك ءىس-شارالار تۋرالى حاباردار ەتتى. سونداي-اق تۇرىكمەن تاراپىن ءال-فارابي جانە اباي مۇرالارى تاقىرىبى بويىنشا عىلىمي-پراكتيكالىق كونفەرەنتسيالار مەن سيمپوزيۋمدارعا بەلسەندى قاتىسۋعا شاقىردى.

سوڭعى جاڭالىقتار

ۇقساس جاڭالىقتار