ايماقتار • 27 اقپان، 2020

الماتىلىقتار egov.kz ارقىلى تىركەۋگە تۇرا باستادى

57 رەتكورسەتىلدى

الماتىلىقتار مەكەنجاي بويىنشا تۇراقتى تىركەۋگە تۇرۋ ءۇشىن حقو-نىڭ ونلاين بالاماسى – egov.kz تاڭداي باستادى.

بيىلعى جىل باسىنان بەرگى كورسەتكىش بويىنشا ونلاين تۇردە مەكەنجەي تىركەۋىنە تۇرۋشىلار سانى ءبىرشاما وسكەن. بۇل قىزمەتتى الۋ ءۇشىن 39 462 ادام فرونت-وفيستەرگە جۇگىنسە، 20 873 ازامات ەشقايدا بارماي-اق ونلاين تۇردە ونى جۇزەگە اسىرعان. 

بىلتىرعى كورسەتكىشتەردى ەسەپكە الاتىن بولساق، الماتى قالاسىنداعى «ازاماتتارعا ارنالعان ۇكىمەتتىڭ فرونت-وفيستەرى ارقىلى 216196 ادام، ونلاين تۇردە 43967 ادام تىركەۋ ءراسىمىن جۇزەگە اسىرعان.

رەسپۋبليكا بويىنشا 1،5 ملن ادام فرونت-وفيستەر ارقىلى، ونلاين تۇردە 479 مىڭ ادام تىركەۋ ءراسىمىن جۇزەگە اسىرعان، سايكەسىنشە ءار ءتورتىنشى ازامات تۇرعىلىقتى تىركەۋ ءراسىمىن ەلەكتروندى تۇردە جۇرگىزگەن.  بۇل تىزىمدە الماتى قالاسى 7-ورىنعا تىرەلىپ، 13،49 پايىزدى قۇراپ وتىر.

ايتا كەتۋ كەرەك، 2019 جىلدىڭ ماۋسىمىنان باستاپ ازاماتتاردى تۇرعىلىقتى جەرى بويىنشا تىركەۋ قىزمەتتەرىن پيلوتتىق رەجيمدە «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ قىزمەتكەرلەرى جۇزەگە اسىرادى.

«پيلوتتىق جوبا الماتىلىقتارعا بىرقاتار ارتىقشىلىقتار بەردى. اتاپ ايتار بولساق، فرونت-وفيستەردىڭ جۇمىس كەستەسىنە سايكەس ازاماتتاردى تىركەۋ بويىنشا قىزمەت كورسەتۋ، ياعني تۇسكى ءۇزىلىسسىز ساعات 9.00-دەن 20.00-گە دەيىن، كوشى-قون پوليتسياسىنىڭ دەرەكتەر بازاسىندا تىركەۋگە مۇمكىندىگى بار قىزمەتكەرلەر سانىن ارتتىرۋ، تىركەۋ بويىنشا قىزمەتكە كەزەكتى قىسقارتۋ سياقتى ۇدەرىستەردى قولعا الۋدىڭ ارقاسى»، – دەيدى «ازاماتتارعا ارنالعان ۇكىمەت» مك كەاق الماتى قالاسى بويىنشا فيليالىنىڭ PR-مەنەدجەرى جاڭىل اپەتوۆا.

بۇگىندە مەكەنجاي تىركەۋىن جاساتۋ ءۇشىن تىركەۋگە قويۋشى جانە تىركەلۋشى تاراپتىڭ ەتسق-سى بولۋى ءتيىس. ازامات egov.kz-كە تىركەلەتىن مەكەنجاي مەن جەكە مالىمەتتەرىن جازسا، باسپانا يەسى وعان رۇقساتتى جەكە كابينەتىنە كەلگەن سۇراۋدى ماقۇلداۋ ارقىلى بەرەدى.

سوڭعى جاڭالىقتار

ۇقساس جاڭالىقتار