باتىس قازاقستان وبلىسىندا «كوكتەم-2020» رەسپۋبليكالىق كوماندالىق وقۋ-جاتتىعۋى باستالعانىن بۇدان بۇرىن حابارلاعان ەدىك. وقۋ-جاتتىعۋ ستسەناريى بويىنشا وبلىستىڭ ءار جەرىندە ءتۇرلى سيپاتتا اپاتتىق جاعداي «بولىپ», توتەنشەلىكتەر مەن جالپى ازاماتتىق قورعانىس قىزمەتىنىڭ قۇتقارۋ-قالپىنا كەلتىرۋ ءىس-قيمىل شارالارى پىسىقتالدى.
جوسپارلانعان «اپات» اۋقىمى شىنىندا كولەمدى ەدى. ماسەلەن, ستسەناري بويىنشا «ورال جايىقجىلۋقۋات» مەكەمەسىندە بولعان اپاتتان قالاعا جىلۋ مەن جارىق بەرۋدە ىركىلىس بولىپ, 60240 ادام جىلۋسىز قالدى.
تەرەكتى اۋدانىنىڭ پودستەپنوە اۋىلى تۇسىندا, «سامارا-شىمكەنت» تاس جولىندا «كاماز» بەن «تويوتا كامري» سوقتىعىسىپ, كولىك ىشىندەگى جولاۋشىلاردىڭ كەيبىرى قازا تاۋىپ, كەيبىرى كولىك ىشىندە قىسىلىپ قالدى. جەدەل-قۇتقارۋ جاساعى كولىكتەردەن قازا بولعان ءۇش ادامدى, جاراقات العان ەكى ادامدى شىعارىپ, جەدەل جاردەم دارىگەرلەرىنە تاپسىردى.
«Deawoو» ماركالى ميكرواۆتوبۋس تەحنيكا اقاۋىنان جول جيەگىنە توقتاپ, كۇننىڭ سۋىقتىعىنان قايتا تۇتانا المادى. ءسويتىپ, وزبەكستان رەسپۋبليكاسىنىڭ 15 ازاماتى سۋىق اۆتوبۋستا قالۋعا ءماجبۇر بولدى.
ورال قالاسىنىڭ ىرگەسىندەگى 1 جانە 2-ساياجاي اۋدانىنداعى تۇرعىن ۇيلەردى سۋ باستى. ساياجايلاردا تۇراتىن حالىقتى حاباردار ەتۋ جانە ەۆاكۋاتسيالاۋ ۇيىمداستىرىلدى.
«قىرسىققاندا قىمىران ءىريدى» دەگەندەي, قالانىڭ لاس سۋىن دالاعا شىعاراتىن «باتىس سۋ ارناسى» مەكەمەسىندە دە كۇتپەگەن اقاۋ شىقتى. كارىز سۋى كوشەگە قۇيىلىپ, ەكولوگيالىق اپات بولۋعا اينالدى.
بۇعان قوسا تولاسسىز جاۋعان جاۋىن-شاشىننان مۇزى ءالى كەتە قويماعان وزەندەر دەڭگەيى كۇرت كوتەرىلىپ, الاپات تاسقىن جولىنداعىنىڭ ءبارىن جايپاپ كەلە جاتتى. ءىرى سۋ قويمالارى تاسىپ, جولدار بۇزىلىپ, تۇرعىنداردىڭ ءومىرى مەن دەنساۋلىعىنا قاۋىپ ءتوندى. سۋعا كەتكەن كولىكتەر دە بار.
«جامان ايتپاي جاقسى جوق» دەگەن عوي. سوندىقتان ىقتيمال اپاتقا دايىن بولۋ كەرەك-اق. ابىروي بولعاندا وقۋ-جاتتىعۋ شارالارىنا قاتىسقان بارلىق ارنايى قىزمەت وكىلدەرى – ىزدەستىرۋ-قۇتقارۋ بولىمشەسى, جەدەل-قۇتقارۋ جاساعى, «اپاتتار مەديتسيناسى ورتالىعى» فيليالى, جەدەل جاردەم بريگاداسى, جەرگىلىكتى پوليتسيا قىزمەتى ءبىر جاعادان باس, ءبىر جەڭنەن قول شىعارا قيمىلدادى. ءسويتىپ, بارلىق توتەنشە جاعداي جويىلدى, زارداپ شەككەندەر قۇتقارىلدى, ولارعا العاشقى مەديتسينالىق جانە پسيحولوگيالىق كومەك كورسەتىلدى.
«كوكتەم-2020» رەسپۋبليكالىق كوماندالىق-شتابتىق وقۋ-جاتتىعۋىنىڭ ەكى كۇندىك قورىتىندىسى بويىنشا بارلىق العا قويىلعان مىندەت ورىندالدى, وقۋ-جاتتىعۋ ماقساتىنا جەتتى» دەپ حابارلايدى باتىس قازاقستان وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى.
باتىس قازاقستان
