ايماقتار • 26 اقپان، 2020

تارازداعى مەكتەپ ديرەكتورى قىزمەتىنەن ۋاقىتشا شەتتەتىلدى

37 رەتكورسەتىلدى

اعىمداعى جىلدىڭ 24 اقپانىندا تاراز قالاسىنداعى №43 ورتا مەكتەپتىڭ  مۇعالىمى كۇنسۇلۋ بورىمبەكوۆا الەۋمەتتىك جەلى ارقىلى ءبىلىم وشاعىنىڭ باسشىسى تاراپىنان ادىلەتسىزدىك بولعانىن، زاڭسىز جۇمىستان شىعارىلعانىن ايتىپ، شاعىمدانعان بولاتىن.

مۇعالىمنىڭ وتىنىشىنە بايلانىستى جامبىل وبلىسىنىڭ اكىمى بەردىبەك ساپارباەۆتىڭ تاپسىرماسىمەن جۇمىس كوميسسياسى قۇرىلعان ەدى. جاريالانعان بەينەروليكتە ايتىلعان بارلىق فاكتىلەر بويىنشا قازىر تەكسەرۋ شارالارى جۇرگىزىلۋدە. وندا كەلتىرىلگەن فاكتىلەر راستالعان جاعدايدا، ماتەريالدار قۇقىق قورعاۋ ورگاندارىنا جىبەرىلەدى. سونداي-اق، ەلىمىزدىڭ ءبىلىم جانە عىلىم ءمينيسترى اسحات ايماعامبەتوۆ تارازداعى №43 مەكتەپتەگى جاعدايعا بايلانىستى جامبىل وبلىستىق ءبىلىم باسقارماسى مەن تاراز قالالىق ءبىلىم ءبولىمىنىڭ باسشىلىعىنا اۋىزشا ەسكەرتۋ بەرىلگەنىن ايتىپ، تەكسەرىس اياقتالعانعا دەيىن ديرەكتوردى جۇمىسىنان شەتتەتۋدى تاپسىردى.

تاراز قالالىق ءبىلىم ءبولىمىنىڭ جەكە ەڭبەك داۋلارىن شەشۋ جونىندەگى كەلىسۋ كوميسسياسىنىڭ شەشىمىمەن  كۇنسۇلۋ بورىمبەكوۆا №43 ورتا مەكتەبىنىڭ قازاق ءتىلى ءپانىنىڭ مۇعالىمى قىزمەتىنە قايتا قابىلداندى. ال، اتالعان مەكتەپتىڭ ديرەكتورى ەلميرا ومىربەكوۆا قىزمەتىنەن ۋاقىتشا بوساتىلدى.

بۇگىندە بۇل ماسەلە وبلىستىق ءبىلىم بەرۋ سالاسىندا ساپانى قامتاماسىز ەتۋ دەپارتامەنتىنىڭ،  وبلىستىق ءبىلىم باسقارماسىنىڭ، تاراز قالاسى اكىمدىگىنىڭ جانە «Nur Otan»  پارتياسى وكىلدەرىنىڭ قاتىسۋمەن جان-جاقتى زەردەلەنۋدە. تەكسەرۋ ءىس-شارالارى تولىق اياقتالعاننان كەيىن قولدانىستاعى زاڭناما تالاپتارىنا سايكەس ناقتى شەشىم قابىلداناتىن بولادى. قالالىق ءبىلىم ءبولىمىنىڭ مالىمەتىنشە، بۇگىنگى تاڭدا مەكتەپ قالىپتى رەجيمدە جۇمىس ىستەپ تۇر، وقۋشىلار ساباققا قاتىسۋدا. بارلىق ساباقتار كەستەگە سايكەس وتۋدە.

جامبىل وبلىسى

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار