كەزدەسۋدە قۇرىلىس سالۋشىلار بىرقاتار ۇسىنىستارىن ايتتى. ەلوردا اكىمى التاي كولگىنوۆ قۇرىلىس جۇمىستارىنىڭ ساپاسىنا ءتيىستى كوڭىل ءبولۋ قاجەتتىگىن اتاپ ءوتتى.
«تۇرعىن ۇيلەر مەن الەۋمەتتىك نىساندار سالۋ - ءبىز ءۇشىن باستى مىندەت. بۇل ىستە اكىمدىك بارىنشا قولداۋ كورسەتىپ كەلەدى, كورسەتەتىن بولادى دا. الايدا سىزدەردىڭ تاراپتارىڭىزدان دا بارلىق قاجەتتى تالاپتار ورىندالۋ كەرەك. ولاردىڭ قاتارىنا قۇرىلىس ساپاسى, جۇمىس كەزىندەگى قاۋىپسىزدىكتى قامتاماسىز ەتۋ, قىزمەتكەرلەرگە ۋاقىتىلى جالاقى تولەۋ جاتادى. مەملەكەت باسشىسىنىڭ تاپسىرماسىنا سايكەس بيىل قولجەتىمدى تۇرعىن ءۇي قۇرىلىسىنىڭ كولەمى ءۇش ەسە ارتادى. بىرلەسە قۇرىلىس قارقىنىن ارتتىرۋىمىز قاجەت», - دەدى قالا اكىمى التاي كولگىنوۆ.
ەلوردادا بىرىڭعاي ديزاين-كود قابىلداندى. ديزاين-كود ستيليستيكالىق تۇرعىدا بىرىڭعاي, جايلى ءارى قاۋىپسىز قالالىق ورتانى قالىپتاستىرۋ ماقساتىندا قابىلدانعان بىرقاتار ەرەجەلەر مەن ۇسىنىمداردان تۇرادى. ديزاين-كود عيماراتتاردىڭ قاسبەتتىك ەلەمەنتتەرىنە جانە كوشە-جول كەڭىستىگىنە باعىتتالعان. سونداي-اق, شاعىن ساۋلەت نىساندارىن, اباتتاندىرۋدى, ارلەۋ ماتەريالدارىن قولدانۋدى, تۇستىك شەشىمدەردى, جارنامالىق قۇرىلىمداردىڭ مولشەرىن ەسكەرە وتىرىپ, عيماراتتاردىڭ قاسبەتتىك بولىگىنەن كوشە-جول جەلىسىنىڭ قازىرگى جاعدايىن تۇزەتۋ قاراستىرىلعان.
