ءىس-شاراعا قاتىسقان اسكەريلەردىڭ باسىم بولىگى قان تاپسىرۋعا ءبىرىنشى رەت كەلگەن. قىزمەتتىڭ تىعىز كەستەسىنە قاراماستان, «دونور كۇنى» اكتسياسىنا قاتىسقىسى كەلگەن اسكەريلەردىڭ قاراسى 100-دەن استى.
- پروتسەدۋرادان بۇرىن ءار دونور قان توبىن انىقتاۋ ءۇشىن الدىن الا زەرتحانالىق تەكسەرۋدەن ءوتىپ, قاجەتتى ساۋالنامالار مەن دەرەك قۇجاتتارىن تولتىرىپ, دارىگەرمەن سۇحباتتاستى. كەيىن 450 مل كولەمىندە قان تاپسىردى. دونورلىق قان اپاتتاردان زارداپ شەككەندەرگە, قالامىزداعى اۋرۋحانالاردا جاتقان ناۋقاستارعا شۇعىل مەديتسينالىق كومەك كورسەتۋ ءۇشىن پايدالانىلادى, - دەيدى باتىس وڭىرلىك قولباسشىلىعى مەديتسينالىق قىزمەت وفيتسەرى مايور ابرور يساحودجاەۆ.
بارلىق دونورعا مەديتسينا قىزمەتكەرلەرى ىستىق شاي مەن تاتتىلەر ۇسىندى. دارىگەرلەر مەرزىمدى قان تاپسىرۋدىڭ اعزاعا پايدالى اسەرى بار دەيدى. دونورلاردىڭ اۋرۋعا شالدىعۋ ىقتيمالدىعى از جانە وزدەرىن سەرگەك سەزىنەدى دەپ سانالادى.
اسكەري قىزمەتشىلەردىڭ وزدەرى وسىنداي اكتسيالاردىڭ قانشالىقتى ماڭىزدى ەكەنىن تۇسىنە وتىرا, ۇدايى ناسيحاتتاپ وتىرۋ قاجەت دەپ سانايدى, سەبەبى ونىڭ ارقاسىندا بىرەۋدىڭ ءومىرىن ساقتاپ قالۋعا بولادى.
«باتىس» وڭىرلىك قولباسشىلىعىنىڭ اسكەري قىزمەتشىلەرى قايىرىمدىلىق شارالارىنا ۇنەمى قاتىسىپ وتىرادى. بۇگىنگى اكتسيانىڭ ناتيجەسى بويىنشا ولار 50 ليترگە جۋىق قان تاپسىردى.
