اقپاراتتىق تەحنولوگيا دامىعان زاماندا بوياۋ سىڭگەن كىتاپقا ءسۇزىلىپ وتىرعانداردى سيرەك كەزدەستىرەسىڭ. كوپشىلىگى ەلەكتروندى نۇسقاسىن وقۋدى دۇرىس كورەدى. دەسە دە قاجەت شىعارماڭدى كىتاپتان وقىعانعا نە جەتسىن؟! دەنساۋلىققا دا زيانى جوق. بىراق, ىزدەگەنىڭدى كىتاپحانالاردان, دۇكەندەردەن تەز ىزدەپ تابا الاسىڭ با؟ مىنە, ماسەلە وسىندا. قازىرگى كىتاپ دۇكەندەرى وقىرماندارىنا نە سىيلاي الادى؟ تاراز قالاسىندا مەن بىلەتىن 3 دۇكەن بار. سونىڭ ءبىرى – تولە بي كوشەسىنىڭ بويىنداعى «شەرحان مۇرتازا» كىتاپ دۇكەنى. كوپ كىتاپ الماسام دا, سوندا ءجيى بارىپ تۇرامىن. ارينە, وقيمىن دەگەن ادامعا بۇل جەردە دە ءبىراز تۋىندى بار. دەگەنمەن اۆتورلارى جاڭارمايدى. ءوزىم وقيتىن اۆتورلاردى وتە سيرەك كەزدەستىرەمىن, كەيبىرەۋى مۇلدەم جوق. وسىنى ساتۋشىدان سۇراعانمىن.
– قىزىم, ساعان نە ايتايىن؟ قازىر ەشكىم كىتاپ ساتىپ المايدى. وقىرمان جوق.
مىنە, وسىلاي مۇڭايدى ساتۋشى اپاي. شىنىمەن وقيتىن وقىرمان جوق پا؟ الدە وزدەرىنىڭ ىزدەگەن كىتاپتارىن تاپپايتىن بولعان سوڭ دۇكەندەرگە سيرەك باس سۇعاتىن بولعان با؟ باققوجا مۇقاي, راقىمجان وتارباەۆ, تىنىمباي نۇرماعانبەتوۆتىڭ شىعارمالارى نەمەسە الەم ادەبيەتىنىڭ كورنەكتى وكىلدەرىنىڭ قازاقشا ساۋاتتى ءارى تارتىمدى اۋدارىلعان تۋىندىلارىن تاۋىپ سورەگە قويساق, وقيتىندار دا تابىلاتىن شىعار؟
ءوز ويىممەن ارپالىسىپ كەلە جاتىپ ايتەكە بي كوشەسىندە «Marwin» دۇكەنىنە قالاي جەتكەنىمدى بايقاماي قالدىم. كىتاپحاناعا كىرسەڭ, قانشا قىزىعۋشىلىعىڭ بولماسا دا, مويىن بۇرماي تۇرا المايسىڭ. بۇل كىتاپ وقيتىندار ءۇشىن تاپتىرماس ورىن. «ەكىنشى بولما» نەمەسە «كاك بىت دەرزكيم» دەگەن پسيحولوگيالىق كىتاپتارعا سۇرانىس كوپ. قازاق ادەبيەتى ۇزىن سورەنىڭ ءبىر بۇرىشىندا عانا تۇر. نارىق زامانىندا ءبىر-بىرىنەن قالاي وزسام, وڭاي بايىسام دەگەندەرگە سونداي تۋىندىلار قىزىق.
– مەن ىزدەپ جۇرگەن كىتاپتى وسى جەردەن كورگەنمىن. الايىقشى, ا؟! قاپ, ءوتىپ كەتىپتى, قالماپتى.
ىزدەگەنىن تاپپاعان سوڭ با, جاڭا عانا ەسىكتەن ەنتەلەي كىرگەن ءجاسوسپىرىمنىڭ داۋسى كادىمگىدەي ءپاس شىقتى. قاسىندا اناسى بار. ىزدەگەنىن تاۋىپ, سونىسى قاپەلىمدە قولىنان سۋسىپ شىعىپ كەتكەندەي, وكىنىپ تۇر. امالى قۇرىپ, باسقا اۆتورلاردى الىپ قاراي باستاعان, كەنەت ءبىر بۇرىشتا ەلەۋسىزدەۋ تۇرعان ۋيليام فولكنەردىڭ ورىسشاعا اۋدارىلعان «شۋ مەن قاھارىن» كورىپ, ايقاي سالعانى. سويتسە, الماق بولىپ, قوياردا-قويماي اناسىن سۇيرەلەپ كەلگەنى سول ەكەن. شامامەن 10-سىنىپتىڭ وقۋشىسى سەكىلدى. تاڭداۋىنا قاراپ, ءبىراز الەم ادەبيەتى كلاسسيكتەرىنىڭ تۋىندىلارىن وقىپ ۇلگەرگەنىن بايقاۋعا بولادى.
قازىر تەك مەملەكەتتىك تاپسىرىسپەن شىعاتىن بولعان سوڭ با, قازاق جازۋشىلارىنىڭ تاڭداۋلى تۋىندىلارىن كىتاپحانالاردان عانا تاباسىڭ. جەكە كىتاپ دۇكەندەرىنە تۇسپەيدى. جەكەمەنشىك باسپالارمەن جاساسقان كەلىسىمشارت بويىنشا قايتا باسىلىپ شىققاندارىنىڭ دا تيراجى ساناۋلى. لەزدە ءوتىپ كەتەدى. بارلىق نارسەنى نارىققا تىرەدىك, ەندى كىتاپ قالدى. ءبىزدىڭ قالامگەرلەردىڭ دە جازعان ەڭبەكتەرى وقي بىلگەن ادامعا پسيحولوگيالىق كەڭەس تە, موتيۆاتسيا دا بەرەدى.
الماتى قالاسىندا «قازىنا» دەيتىن كىتاپ دۇكەنى بار. وندا تەك قانا قازاقشا كىتاپتار ساتىلىمعا شىعادى. وقىرماندارى وتە كوپ. جاقىندا سولارعا ارناپ كلۋب اشتى, اپتا سايىن جينالىپ كىتاپتا جازىلعان دۇنيەلەردى تالدايدى. كەيدە اقىن-جازۋشىلارمەن شەبەرلىك سىنىبىن دا وتكىزەدى. ال ەندى سول دۇكەننىڭ ساتۋشىسىمەن سويلەسكەنىمدە, وقىرماننىڭ كوپ ەكەنىن قۋانا جەتكىزدى. تاراز قالاسىندا دا الگى كىتاپحاناشىلار, وسىنداي قىزىقتى شارالار ۇيىمداستىرسا, ولار دا وقىرمانىمىز كوپ دەيتىن بە ەدى, كىم ءبىلسىن.
ارۋناي نۇرلان,
حالىقارالىق اقپاراتتىق تەحنولوگيالار ۋنيۆەرسيتەتىنىڭ ءى كۋرس ستۋدەنتى
