اۋىل • 24 اقپان، 2020

اۋىل – ۇلتتىڭ ۇيتقىسى دەيدى قارجى سالاسىنىڭ ارداگەرى مۇحيت قابىل ۇلى

17 رەتكورسەتىلدى

قازىرگى كەزدە ەلىمىزدىڭ شالعاي اۋداندارى مەن ءىرى ەلدى مەكەندەرىندە «اۋىل – ەل بەسىگى» جوباسى اياسىندا ورەلى وزگەرىستەر بولىپ جاتقانىن ەشكىم دە جوققا شىعارا المايدى. ايتسە دە «كورمەس تۇيەنى دە كورمەس» دەگەندەي مۇنداي ومىرشەڭ جوبالار مەن اۋقىمدى ىستەردى كورگىسى، ەلەگىسى كەلمەيتىن ادامدار دا جوق ەمەس. كەرىسىنشە ەل ىشىندەگى جاقسىلىقتار مەن جاڭالىقتاردى جانى سۇيەتىن، ونى ماقتان تۇتا الاتىن وي-ءورىسى جوعارى، پاراسات-پايىمى بيىك ازاماتتار دا جەتەرلىك.

«ەگەمەننىڭ» اقتوبە قالاسىنداعى ءتىلشى قوسىمىنا شالعايداعى تەمىر اۋدانىنان ارنايى كەلگەن اقساقال، قارجى سالاسىنىڭ ارداگەرى مۇحيت قابىل ۇلىن ءدال وسى قاتارعا قويۋعا ابدەن بولادى-اۋ دەگەن ويعا كەلدىك. ويتكەنى ول «ەگەمەنگە» جەكە باستىڭ قامىمەن ەمەس، ەل ىشىندە اتقارىلىپ جاتقان سان الۋان ىستەر مەن تىندىرىمدى جۇمىستار جونىندە ايتۋدى قاجەت دەپ تاۋىپتى.

– باسەكەگە قابىلەتتى ەل بولۋ ءۇشىن ءبىز ەڭ الدىمەن ەجەلگى ءتول مادەنيەتىمىز بەن سالت-ءداستۇرىمىزدى جانە ۇلتتىق كودىمىز بەن وتانشىلدىق سەزىمدى ساقتاي ءبىلۋىمىز كەرەك. مۇنىڭ ءبارى تۋعان جەرگە دەگەن سۇيىسپەنشىلىتەن باستاۋ الادى دەپ بىلەمىن. اۋىلداستارىمنىڭ بويىندا وسىنداي قاسيەتتەردىڭ توعىسۋى مەنى ءار كەز ريزاشىلىق سەزىمگە بولەيدى. اۋىل – ۇلتتىق رۋحتىڭ قۋات الار قاينار كوزى، ۇلتتىڭ ۇيتقىسى ەمەس پە؟! وركەنيەتتى ەلدەر كوشىنىڭ قاتارىندا بولۋمىز جولىندا اۋىلدىڭ ارقالايتىن ورنى مەن جۇگى قاشاندا ەرەكشە، – دەپ باستادى ول ءوز اڭگىمەسىن.

كەلەسى كەزەكتە مۇحيت اعا بۇدان ەكى جىل بۇرىن قر تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسى بويىنشا قابىلدانعان «اۋىل – ەل بەسىگى» جوباسى بارلىق جەردەگىدەي تەمىر اۋدانىندا دا قىزۋ قولداۋ تاپقانىن، ءارى اتالعان جوبا اياسىندا اجەپتاۋىر ىستەر قولعا الىنعانىن ايتىپ بەردى. ونىڭ ايتۋىنشا مۇندا قوردالانىپ قالعان باستى پروبلەمانىڭ ءبىرى –  جول قاتىناسى بولسا، وتكەن جىلى  90 ميلليون تەڭگەگە جۋىق قاراجاتقا اۋدان ورتالىعى شۇبارقۇدىقتاعى كوشەلەرگە كۇردەلى جوندەۋ جۇمىستارى جۇرگىزىلىپتى. ۇزىندىعى ءۇش كيلومەترگە جۋىق اۆتوموبيل جولى سالىنىپ، ەل يگىلىگىنە پايدالانۋعا بەرىلىپتى.

سونداي-اق ەلدىڭ قادىرمەندى اقساقالى اۋدان ورتالىعىندا بۇعان دەيىن ارنايى تۇرعىزىلعان ورىن بولماعاندىقتان كۇرەسپەن شۇعىلدانۋعا بەكەم بەل بۋعان جاستار جاتتىعۋلاردى مادەنيەت ۇيىمەن جاپسارلاس ورنالاسقان بولمەدە جاساپ كەلگەنىنە توقتالدى. ال ەكىنشى ءبىر كۇرەس زالىنىڭ ءبىرىن حالىققا قىزمەت كورسەتۋ ورتالىعىنداعى كابينەتتەردىڭ ءبىرى اتقارعان.

جەرگىلىكتى اتقارۋشى ورگان جەتەكشىلەرى مەن ەل تۇرعىندارىنىڭ ءوزارا اۋىزبىرشىلىگىمەن ءىس-قيمىلدارى ناتيجەسىندە بۇل ماسەلە دە «اۋىل –  ەل بەسىگى» جوباسى شەڭبەرىندە شەشىمىن تابا باستاپتى. ءسويتىپ «قىزىلجار» دەپ اتالاتىن شاعىن اۋداندا دەنە شىنىقتىرۋ جانە ساۋىقتىرۋ كەشەنىنىڭ قۇرىلىس جۇمىستارى باستالىپتى. بيىلعى 2020 جىلدىڭ باسىندا وعان رەسپۋبليكالىق جانە وبلىستىق بيۋدجەتتەردەن تاعى دا قوسىمشا 130 ميلليون تەڭگە كولەمىندە قاراجات بولىنگەن ەكەن.

سالاماتتى ءومىر سالتىن قالىپتاستىرۋ مەن بۇقارالىق سپورتتى دامىتۋ ىسىنە ۇلكەن سەپتىگىن تيگىزە الاتىن كەلىستى كەشەننىڭ جالپى قۇنى 580 ميلليون تەڭگەنى قۇرايدى. ونى پايدالانۋعا بەرۋ بيىلعى جىلدىڭ كۇز ايلارىنا بەلگىلەنگەن، – دەدى «ەگەمەنگە» ەلدەن كەلگەن اقساقال مۇحيت قابىل ۇلى. ءسوز اراسىندا ول سانالدى عۇمىرىن قارجى سالاسىنا ارناعاندىقتان دا وسىنداي ناقتى دەرەكتەردى العا تارتا سويلەگەندى جانى قالاپ تۇراتىنىن جەتكىزدى.

اڭگىمەسىنىڭ اياعىندا ول تەمىر اۋدانىندا بۇدان وزگە دە اتقارىلىپ جۇرگەن ءىس-شارالار مەن جوبالار بارشىلىق ەكەنىن، سوندىقتان دا بۇل باعىتتاعى باستامالار باس باسىلىم بەتىندە جارىق كورۋىن امانات ەتە كەلگەنىن ايتتى. البەتتە، اماناتقا قيانات جاساۋعا بولمايدى. ونى ورىنداماۋ كۇنالى ءىستىڭ قاتارىنا كىرەدى. سول سەبەپتەن دە الىستاعى اۋداننان ارنايى كەلگەن اقساقالدىڭ اماناتىن ورىنداۋ ءۇشىن وسى جولداردى جازىپ، رەداكتسياعا جولداعاندى ءجون كوردىك

 

اقتوبە وبلىسى

تەمىر اۋدانى

سوڭعى جاڭالىقتار

تولەم الۋعا – Telegram-بوت

قوعام • بۇگىن، 08:05

پەتروپاۆل كارانتينگە جابىلدى

ايماقتار • بۇگىن، 08:00

قارجى حالىققا باعىتتالادى

ۇكىمەت • بۇگىن، 07:53

قۇپتارلىق قادام

پارلامەنت • بۇگىن، 07:47

مەشىتتە بەتپەردە تسەحى اشىلدى

ايماقتار • بۇگىن، 07:35

ەلگە پايداسى تيگەن ادام جاقسى

پارلامەنت • بۇگىن، 07:30

اۋدان ءومىرىنىڭ ايناسى

ايماقتار • بۇگىن، 07:27

ارمان الاسارماسىن

رۋحانيات • بۇگىن، 07:22

ديقان ديزەلدى تومەن باعاعا الادى

ەكونوميكا • بۇگىن، 07:11

كوروناۆيرۋسسىز قوستاناي

ايماقتار • كەشە

ۇقساس جاڭالىقتار