تالدىقورعان قالاسىنداعى نازارباەۆ زياتكەرلىك مەكتەبىنىڭ ەكى وقۋشىسى شەتەلدەگى بەلەدى وقۋ ورىنىنىڭ ستۋدەنتى بالاۋسا تۇرسىنبەك پەن قۇندىز مۇحتار ابۋ-دابيدەگى «نيۋ-يورك ۋنيۆەرسيتەتىنىڭ» گرانت يەگەرى اتاندى. ون ەكىنشى سىنىپ وقۋشىلارى بىرىككەن اراب امىرلىكتەرىنە بارىپ, اڭگىمەلەسۋ كەزەڭىنەن ءوتتى. بۇل سىناقتان ءساتتى وتكەن ولار الەمدەگى رەيتينگى جوعارى وقۋ ورنىنا بىردەن قابىلداندى.
ابۋ-دابيدەگى «نيۋ-يورك ۋنيۆەرسيتەتى» گۋمانيتارلىق باعىتتاعى زەرتتەۋ جۇمىستارىن جۇرگىزەتىن ماڭداي الدى وقۋ ورىنى. بۇل ءبىلىم ورداسىندا ونەر, گۋمانيتارلىق عىلىمدار, الەۋمەتتىك عىلىمدار جانە ينجينيرينگ بويىنشا 22 ءپان وقىتىلادى.
-ۋنيۆەرسيتەت الەمدەگى ەڭ جوعارى تالاپتارعا يە. تاڭداۋ وتە قاتال بولدى. ەكى كۇن بويى ءبىز تەستىلەۋدەن ءوتىپ, ۋنيۆەرسيتەت پروفەسسورلارىنىڭ ساباقتارىنا قاتىستىق. ءوزىم تالدىقورعانداعى زياتكەرلىك مەكتەپتى بىتىرگەننەن كەيىن «بيوتەحنولوگيا» ماماندىعى بويىنشا باكالاۆر باعدارلاماسىن وقىپ شىعۋدى جوسپارلاپ وتىرمىن, - دەيدى قۋانىش قوينىنا سىيماعان بالاۋسا.
ال مەكتەپتىڭ تاعى ءبىر ماقتانىشى بولىپ جۇرگەن قۇندىز مۇقتار بولسا, ابۋ-دابيدەگى «نيۋ-يورك ۋنيۆەرسيتەتى» «كومپيۋتەرلىك تەحنولوگيالار» فاكۋلتەتىندە وقۋىن جالعاستىراتىن بولادى.
