رۋحانيات • 24 اقپان، 2020

«استانا وپەرادا» پ.چايكوۆسكيدىڭ مەرەيتويى اتاپ وتىلەدى

15 رەتكورسەتىلدى

1 ناۋرىز كۇنى «استانا وپەرا» تەاترىنىڭ ۇلكەن زالى ساحناسىندا ەلوردا تۇرعىندارى مەن قالا قوناقتارىنىڭ نازارىنا اتاقتى كومپوزيتور پ.چايكوۆسكيدىڭ 180 جىلدىعىنا ارنالعان سيمفونيالىق مۋزىكا كونتسەرتى ۇسىنىلادى. بۇل تۋرالى «استانا وپەرا» تەاترىنىڭ ءباسپاسوز قىزمەتى حابارلادى.


«پەتر يليچ چايكوۆسكي – ادامزات تاريحىنداعى ۇلى مۋزىكا كەمەڭگەرلەرىنىڭ ءبىرى، رومانتيزم باعىتىنىڭ جارقىن وكىلى، ونىڭ تۋىندىلارى الەمدە ءجيى ورىندالاتىن شىعارمالار قاتارىنا جاتادى. بەينەلەردىڭ شىنايىلىعى، نازىك سىرشىلدىعى، پسيحولوگيالىق تەرەڭدىگى، درامالىق كۇش-قۋاتى، ومىرلىك شىندىعى ونىڭ مۋزىكاسىن بارلىق حالىقارالىق كەڭىستىكتەگى تىڭدارمانداردىڭ قالىڭ بۇقاراسىنا جاقىن ءارى تۇسىنىكتى ەتتى. پ.چايكوۆسكيدىڭ ماڭگىلىك تۋىندىلارى الەمدىك مادەنيەتكە قوسىلعان باعا جەتپەس ۇلەس بولىپ تابىلادى، سونىمەن قاتار مۋزىكالىق ونەردەگى دامۋدىڭ جاڭا ساتىسىنا جول اشقان باتىل سەرپىلىستى كورسەتەدى»، دەپ اتاپ ءوتتى ماەسترو ابزال مۇحيتدين.

پ.چايكوۆسكيدىڭ مۋزىكاسى جەر شارىنىڭ تۇكپىر-تۇكپىرىندەگى بار حالىقتىڭ ماحابباتىنا بولەنگەن، كەمەڭگەر كومپوزيتوردىڭ باي مۇراسىنىڭ جاۋھارلارى قوعامىمىزدىڭ رۋحاني يگىلىگىنىڭ ماڭىزدى بولشەگىنە اينالعان. بۇل كەشتە پ.چايكوۆسكي مەن ك.سەن-سانستىڭ تاماشا شىعارمالارى قازاقستاننىڭ ەڭبەك سىڭىرگەن قايراتكەرى ابزال ءمۇحيتديننىڭ جەتەكشىلىگىندەگى «استانا وپەرا» سيمفونيالىق وركەسترى مەن سوليست – تانىمال سكريپكاشى، قازاقستاننىڭ ەڭبەك سىڭىرگەن قايراتكەرى باعدات ءابىلحانوۆتىڭ ورىنداۋىندا شىرقالادى.

مۋزىكالىق كەشتى ك.سەن-سانستىڭ سكريپكا مەن وركەسترگە ارنالعان №3 كونتسەرتى، سي مينور، op.61 تاڭداۋلى تۋىندىسى اشادى. فرانتسۋز كومپوزيتورىنىڭ ەڭ تانىمال كونتسەرتى ءسوليستىڭ تەحنيكالىق جاعىنان كۇردەلى، ۇزدىك پارتياسىمەن ەرەكشەلەنەدى. باعدارلاما پ.چايكوۆسكيدىڭ سكريپكا مەن وركەسترگە ارنالعان مەلانحوليالىق سەرەناداسى، سي-بەمول مينور، op.26 شىعارماسىمەن جالعاسادى. شابىتقا تولى تۋىندى تىڭدارمانداردىڭ سان ۇرپاعىن ەرىكسىز ەلجىرەتەدى. ەكىنشى بولىمدە پ.چايكوۆسكيدىڭ №5 سيمفونياسى، مي مينور، op. 64 ۇسىنىلادى. ونىڭ نەگىزىنە ادام جانە تاعدىر، جازمىش ۇعىمدارى الىنعان، كومپوزيتور دراما مەن تراگەديانى تالعاممەن ۇيلەستىرە وتىرىپ، تەرەڭ فيلوسوفيالىق ماسەلەلەردى كوتەرەدى. وسى مۋزىكانىڭ ينتەللەكتۋالدىق تەرەڭدىگى، ويىنىڭ قاتاڭدىعى، قۇلاشىنىڭ قاۋقارى مەن اۋقىمدىلىعى زالداعى ەشبىر جاندى بەي-جاي قالدىرمايدى.


سوڭعى جاڭالىقتار

عاسىر زۇلماتى

قوعام • كەشە

ۇقساس جاڭالىقتار