پارلامەنت • 24 اقپان، 2020

س.جاقسىبەكوۆ: جەڭىل ونەركاسىپ سالاسى تەرەڭ زەرتتەۋدى تالاپ ەتەدى

14 رەتكورسەتىلدى

پارلامەنت سەناتى ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ دەپۋتاتتارى شىمكەنت قالاسىندا كاسىپكەرلەرمەن جانە «قازاقستاننىڭ ينۆەستيتسيالىق قورى»، «Shymkent» اكك» اكتسيونەرلىك قوعامدارى مەن «اتامەكەن» وڭىرلىك كاسىپكەرلىك پالاتاسىنىڭ باسشىلارىمەن كەزدەستى. بۇل شارا «قازاقستاننىڭ جەڭىل ونەركاسىبى: جوعارى ءونىمدى بيزنەستىڭ قازىرگى جاي-كۇيى جانە دامۋ كەلەشەگى» تاقىرىبى بويىنشا پارلامەنتتىك تىڭداۋلارعا دايىندىق اياسىندا وتكەن بولاتىن. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ توراعاسى سەرىك جاقسىبەكوۆ باستاعان جانە دەپۋتاتتار مانات كوبەنوۆ پەن ءالىمجان قۇرتاەۆ قۇرامىنا ەنگەن جۇمىس توبى شىمكەنت قالاسىنداعى بىرقاتار كاسىپورىنداردا بولدى.

سەناتورلار جۇمىس ساپارى اياسىندا «گاۋھار» تىگىن فابريكاسى مەن تولىق تسيكلدى «AZALA Textile» توقىما كومبيناتىنىڭ جۇمىسىمەن تانىستى. «گاۋھار» تىگىن فابريكاسى بۇگىنگى تاڭدا قازاقستانداعى ارنايى كيىم مەن اسكەري جانە مەكەمە ۇلگىسىندەگى، مەكتەپكە ارنالعان كيىمدى، ۇيدە پايدالاناتىن توقىما ونىمدەرىن شىعاراتىن ءىرى ءوندىرىس ورىندارىنىڭ ءبىرى بولىپ تابىلادى.

«AZALA Textile» كاسىپورنىنىڭ ديرەكتورى ەلىمىزدە توقىلاتىن AZALA Textile ماتالارىنا ىشكى نارىققا قاراعاندا يتاليادا نەمەسە گەرمانيادا سۇرانىس كوبىرەك ەكەنىن اتاپ ءوتتى. كومبينات ونىمدەرىنىڭ 90%-ى ەكسپورتقا جىبەرىلەدى.

سەنات دەپۋتاتتارى توقىما جانە تىگىن ونەركاسىبىن دامىتۋ ءۇشىن جاعداي جاساۋ ماقساتىندا قۇرىلعان «وڭتۇستىك» ارنايى ەكونوميكالىق ايماعىندا دا بولدى. دەپۋتاتتار ارنايى ەكونوميكالىق ايماقتا «AZALA Cotton»، «بال تەكستيل» جانە «اگف-گرۋپپ» سەرىكتەستەرىنىڭ جۇمىسىمەن تانىستى. سەناتورلار ءوندىرىس ورىندارىنداعى بارلىق تسەحتاردى ارالادى جانە ولارعا وسىندا شىعارىلاتىن ونىمدەر عانا ەمەس، سونىمەن قاتار كاسىپورىن جۇمىسىنىڭ بارلىق پروتسەسى كورسەتىلدى.

1

شىمكەنت قالاسىنىڭ كاسىپكەرلەرىمەن بولعان كەزدەسۋدە سەناتورلار جەڭىل ونەركاسىپ سەكتورىنداعى بيزنەستىڭ نەگىزگى ماسەلەلەرىن تالقىلادى.

سەنات دەپۋتاتى سەرىك جاقسىبەكوۆ جەڭىل ونەركاسىپتى دامىتۋ قازاقستانداعى باسىم باعىتتاردىڭ ءبىرى ءارى حالىقتى جۇمىسپەن كوبىرەك قامتۋدا الەۋمەتتىك ءمانى زور ەكەنىن اتاپ ءوتتى. سوندىقتان دا جەڭىل ونەركاسىپتىڭ وسى سالاسى كاسىپورىنداردىڭ جۇمىس پروتسەسىندە تۋىندايتىن نەگىزگى پروبلەمالاردى تەرەڭ زەردەلەۋدى جانە جان-جاقتى تالداۋدى تالاپ ەتەدى. دەپۋتاتتار شىعارىلاتىن ءونىمنىڭ ساپاسى باعاسىنا سايكەس كەلۋى ءارى باسەكەگە قابىلەتتى بولۋى كەرەكتىگىن جانە ءار كاسىپورىن ءوز ونىمدەرىنىڭ ساپاسىن جاقسارتۋ ءۇشىن مۇمكىندىكتەر ىزدەۋگە مۇددەلى بولۋى ءتيىس ەكەنىن اتاپ ءوتتى.

سوڭعى جاڭالىقتار

ۇقساس جاڭالىقتار