ساياسات • 24 اقپان، 2020

ءتيىمدى ديولوگقا جول اشادى

24 رەتكورسەتىلدى

ميتينگ تۋرالى جاڭا زاڭ جوباسىندا بىرقاتار ماڭىزدى ماسەلەلەر قاراستىرىلعان. ول بەيبىت جينالىس، ميتينگ، پيكەت، جينالىس، دەمونستراتسيا، شەرۋ سەكىلدى ۇعىمداردىڭ ءمانىن ناقتىلاپ، ولاردىڭ ايىرماشىلىقتارىن كورسەتىپ بەرمەك.

مۇنداي قادامنىڭ ارتىقشىلىعى مول. ويتكەنى قازىرگى تاڭدا وسى ۇعىمداردىڭ ارا-جىگىن بىلايعى جۇرت بىلە بەرمەيدى. ماسەلەن، بۇگىندە ميتينگ اتالىپ جۇرگەن بەيبىت جينالىستاردىڭ كەيبىرى دەمونستراتسيا بولسا، كەلەسىسى – شەرۋ. ونىڭ ۇستىنە، ميتينگ رەتىندە باستالعان كەي جيىنداردىڭ سوڭى دەمونستراتسياعا ۇلاسىپ كەتەدى.

بۇدان بولەك، جاڭا زاڭ جوباسىندا ميتينگتى ۇيىمداستىرۋشىنىڭ، قاتىسۋشىلاردىڭ جانە جۋرناليستەردىڭ مارتەبەسى، قۇقىقتارى مەن مىن­دەتتەرى بەلگىلەنبەك. قازىرگى قولدانىستاعى زاڭدا ولاردىڭ ايىرماشىلىقتارى ناقتى كورسەتىلمەگەن. جوعارىدا ايتىلعان مىندەتتەر مەن مارتەبە ناق­تىلانسا، شەرۋشىلەر مەن بيلىك اراسىندا ناقتى ديالوگ ورناتۋعا مول مۇمكىندىك بەرمەك.

زاڭ جوباسىندا قاراستىرىلعان تاعى ءبىر ەرەكشەلىك – بەيبىت جيىندى حابارلاما بەرۋ ارقىلى وتكىزۋ ءتارتىبى ەنگىزىلمەك. بۇعان دەيىن اكىمشىلىك ورگانداردان ارنايى رۇقسات الۋ قاجەت بولاتىن. ەندىگى جەردە، ميتينگتىڭ ماقساتى، وتكىزىلەتىن جەرى سەكىلدى مالىمەتتەردى حابارلاسا جەتكىلىكتى.

بۇل – حالىقارالىق تاجىريبە. كوپتەگەن دامىعان ەلدە ميتينگ وتكىزۋ ءۇشىن جاۋاپتى مەكەمەگە حابارلاسا جەتكىلىكتى. قۇقىق قورعاۋ قىزمەتكەرلەرى مەن اكىمشىلىك وكىلدەرى بەيبىت جيىن وتكىزۋگە بۇكىل جاعداي جاساپ بەرۋى ءتيىس. ماسەلەن، شەرۋ كەزىندە كوشەلەردى جاۋىپ، وعان قاتىسۋشىلاردىڭ قاۋىپسىزدىگىن قامتاماسىز ەتۋ كەرەك.

قىسقاشا ايتقاندا، ميتينگتى وتكىزۋ جانە ونىڭ قاۋىپسىزدىگىن قامتاماسىز ەتۋ ەڭ اۋەلى حالىق ءۇشىن جانە بيلىك ءۇشىن قاجەت. وسىنداي بەيبىت جيىندار ارقىلى بيلىك تۇرعىنداردىڭ مۇڭ-مۇقتاجىن تىڭدايدى. سوعان بايلانىستى شەشىم قابىلدايدى. ال حالىقتىڭ ميتينگ وتكىزۋىنە توسقاۋىل قويۋ ىشتەگى رەنىشتى ارتتىرا بەرمەك. مۇنداي جاعدايدىڭ سالدارى اۋىر بولاتىنىن تاريح دالەلدەپ بەردى.

وسى تۇرعىدان الىپ قاراعاندا، مەملەكەت باسشىسى قاسىم-جومارت توقاەۆتىڭ ميتينگتەردى وتكىزۋ ءتارتىبىن قايتا قاراۋ جونىندەگى تاپسىرماسى ۋاقتىلى جاسالعان شەشىم دەپ ايتۋعا تولىق نەگىز بار.

 

جامبىل احمەتبەكوۆ،

ءماجىلىس دەپۋتاتى، قازاقستان كوممۋنيستىك حالىق پارتياسى ورتالىق كوميتەتىنىڭ حاتشىسى

 

سوڭعى جاڭالىقتار

ۇقساس جاڭالىقتار