پارلامەنت • 21 اقپان، 2020

دەنساۋلىق ساقتاۋ كودەكسى جوباسىنداعى ماسەلەلەر وڭ شەشىمىن تاپتى

15 رەتكورسەتىلدى

بۇگىن ماجىلىستە پالاتا سپيكەرى نۇرلان نىعماتۋلين «Nur Otan» پارتياسى فراكتسياسىنىڭ كەڭەيتىلگەن وتىرىسىن وتكىزدى. دەپۋتاتتار حالىق دەنساۋلىعى تۋرالى كودەكسپەن جۇمىس ىستەۋ بارىسىندا ازاماتتىق قوعامنىڭ پىكىرلەرىن ەسكەردى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.

قازىرگى ۋاقىتتا ءماجىلىس «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسىن ءبىرىنشى وقىلىمدا قاراۋعا دايىندىق ۇستىندە. «Nur Otan» پارتياسى فراكتسياسىنىڭ دەپۋتاتتارى زاڭ جوباسىنىڭ ەڭ رەزونانستىق نورمالارىن مەملەكەتتىك ورگانداردىڭ باسشىلارىمەن، بەلگىلى قوعام قايراتكەرلەرىمەن، مەديتسينالىق قوعامداستىق پەن ازاماتتىق قوعام وكىلدەرىنىڭ قاتىسۋىمەن فراكتسيانىڭ كەڭەيتىلگەن وتىرىسىندا تالقىلادى.

فراكتسيانىڭ كەڭەيتىلگەن وتىرىسىن اشقان ءماجىلىس توراعاسى نۇرلان نىعماتۋلين: - ءبىز دەنساۋلىق ماسەلەسىن فراكتسيا وتىرىسىندا تالقىلاۋ تۋرالى ارنايى شەشىم قابىلداعان بولاتىنبىز. وزدەرىڭىز بىلەسىزدەر بۇل ماسەلە بۇگىندە بۇكىل حالىقتىڭ نازارىندا. ارينە دەنساۋلىق ماسەلەسى ول ءبىزدىڭ مەملەكەتتىڭ باستى بايلىعى. سول ءۇشىن وسى دەنساۋلىق كودەكسى ازىرلەندى. قازىر ءماجىلىستىڭ قاراۋىندا. كوپتەگەن ۇسىنىستار، پىكىرلەر ايتىلىپ جاتىر. ءبىزدىڭ دەپۋتاتتارىمىز ايماقتاردا بولعان كەزدە دە وسى كودەكس بويىنشا كوپتەگەن تالقىلاۋ بولدى. بۇگىن دە اشىق، جاريا تۇردە تاعى دا جان جاقتى تالقىلايتىن بولامىز. ناتيجەسىندە جوعارى دەڭگەيدەگى ساپالى زاڭ قابىلداۋىمىز كەرەك، - دەدى.

نۇرلان نىعماتۋلين كودەكس جوباسى ماجىلىسكە كەلىپ تۇسكەن ساتتەن باستاپ، دەپۋتاتتاردىڭ قاتىسۋىمەن ءتۇرلى الاڭداردا قىزۋ تالقىلانعانىن ايتتى. ناتيجەسىندە، كوپتەگەن كۇردەلى ماسەلەلەر بويىنشا ىمىراعا كەلدى. اتاپ ايتقاندا، بۇل ترانسپلانتولوگيا ماسەلەسى.

وتىرىستا ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ باسقارما توراعاسى بولاتبەك بايماحانوۆ، ء«ومىر سىيى» رەسپۋبليكالىق قوعامدىق قورىنىڭ باسشىسى ساندۋعاش ورىنباەۆا مەن «امان-ساۋلىق» قوعامدىق قورىنىڭ جەتەكشىسى باقىت تۇمەنوۆا ءوز ۇستانىمىن ءبىلدىردى. ال شەتەلگە اعزالاردى ەكسپورتتاۋ نورماسىنا قاتىستى ءماجىلىس توراعاسى نۇرلان نىعماتۋلين كودەكس جوباسىندا ءبىزدىڭ مەملەكەتىمىزدەن تىس جەردە جۇرگەن قازاقستان ازاماتتارىنا مەديتسينالىق كومەك كورسەتۋ قاجەت بولعان جاعدايدا عانا ترانسپلانتاتسيالاۋ ءۇشىن ەكسپورتتاۋ مۇمكىندىگى قاراستىرىلعانىن اتاپ ءوتتى.

سونداي-اق فراكتسيا وتىرىسىندا ۆاكتسيناتسيا نورماسىنا ەرەكشە نازار اۋدارىلدى. بۇل جايىندا جۇقپالى اۋرۋلار بويىنشا ماماندار، مەكتەپكە دەيىنگى مەكەمەلەردىڭ وكىلدەرى جانە قازاقستانداعى بالا قۇقىقتارى جونىندەگى ۋاكىل ارۋجان ساين ءوز ويلارىمەن ءبولىستى. قوعامداعى ءتۇرلى پىكىرلەردى ەسكەرە وتىرىپ، جۇمىس توبى حالىقتىڭ قاۋىپسىزدىگىن قامتاماسىز ەتەتىن، پروفيلاكتيكالىق ەگۋلەر مىندەتتى جانە ەرىكتى بولىپ بولىنگەنىن ۇسىندى. قازاقستاندا تۇراقتى تۇراتىن ادامدار مىندەتتى پروفيلاكتيكالىق ەگۋلەردەن ءوتۋى كەرەك. ەگەر بالانىڭ دەنساۋلىعىندا مەديتسينالىق قارسى كورسەتىلىمدەر بولماسا مىندەتتى ۆاكتسيناتسيالاردىڭ تىزىمىنە سايكەس ۆاكتسينا جاسالادى. الايدا، ساپاسىز ۆاكتسينالاردى جەتكىزۋ، ۆاكتسينالاردى ساقتاۋ، تاسىمالداۋ جانە پايدالانۋ ەرەجەلەرىن ساقتاۋعا قاتىستى جاۋاپكەرشىلىكتى كۇشەيتۋ ۇسىنىلادى. وسىعان سايكەس، تاۋارلار مەن قىزمەتتەر قاۋىپسىزدىگى جانە ساپاسىن باقىلاۋ كوميتەتىنىڭ قۇزىرەتى كۇشەيتىلمەك.

سونىمەن قاتار ناۋقاستىڭ ءومىرىن جاساندى قولداۋ شارالارىن توقتاتۋ تۋرالى ورتاق ۇستانىم ازىرلەندى، ول تۋىستارىنىڭ كەلىسىمىنسىز بۇل شارا توقتامايدى. فراكتسيانىڭ كەڭەيتىلگەن وتىرىسىندا دەنساۋلىق ساقتاۋ كودەكسى جوباسىنىڭ ءاربىر نورماسى جان-جاقتى، تەرەڭ تالقىلاندى. وتىرىستا تۇتىنۋشىلار قۇقىعىن قورعاۋعا ارنالعان ۇلتتىق كواليتسيا توراعاسى مۇرات ابەنوۆ، ساياساتتانۋشى دانيار اشىمباەۆ ءسوز سويلەدى.

سوڭعى جاڭالىقتار

ۇقساس جاڭالىقتار