«ورتالىق ەڭ الدىمەن وسىنداعى ات توبەلىندەي از قازاققا انا ءتىلىن ۇيرەتۋدى ماقسات تۇتتى. ءتىل بولماعان سوڭ, مۇندا ۇلتتىق ءداستۇر-سالتىمىزدىڭ ساقتالۋى دا ماقتانارلىق دەپ ايتا المايمىن. ەندى جاستارعا حالقىمىزدىڭ سالت-داستۇرلەرى, تاريحى تۋرالى وسى ورتالىقتا ايتاتىن بولامىز», دەيدى ءاليا نۇعمانوۆا.
ورتالىق قازاقستانمەن بايلانىستى, اتامەكەنمەن تۋريستىك قارىم-قاتىناس ورناتۋعا مۇرىندىق بولۋدى ويلاستىرىپ وتىر. «جادىگەر» ورتالىعىندا ۇلى وتان سوعىسىنا قاتىسقان رەسەيلىك قازاقتار تۋرالى دا ماتەريالدار قويىلعان. بۇل ۇلى جەڭىستىڭ 75 جىلدىعىنا ارنالعان, سونىمەن قاتار جاستاردىڭ بويىندا ۇلتتىق سەزىمىنىڭ ويانۋىنا دا سەپتىگى بولادى دەگەن ويدان تۋىنداپتى.
