قوعام • 21 اقپان، 2020

«ءبىز بىرگەمىز» چەللەندج-اكتسياسى 50 مىڭعا جۋىق ەلوردالىقتى بىرىكتىردى

101 رەتكورسەتىلدى

ەلوردا جاستارى، بەلسەندىلەرى، ستۋدەنتتەرى، جۇمىسكەرلەرى بىرنەشە كۇن بويى قولعا كۇرەك الىپ، قالانى قار مەن مۇزدان تازارتۋعا ات سالىسۋدا. #بىزبىرگەمىز حەشتەگى ارقىلى قالا جاستارى الەۋمەتتىك جەلىلەرگە فوتو، ۆيدەو جۇكتەپ، قالا تۇرعىندارىن بەلسەندى بولۋعا شاقىردى. وسى ۋاقىت ارالىعىندا بەلسەندى جاستاردىڭ كۇشىمەن، قالا ىرگەسىندە تۇراتىن 100-دەن استام وتباسىنا كومەك كورسەتىلدى.

نۇر-سۇلتان قالاسى جاستار ساياساتى ماسەلەلەرى باسقارماcىنىڭ باسشىسى داۋلەت كارىبەكتىڭ ايتۋىنشا، #بىزبىرگەمىز چەللەندجى رەسپۋبليكاداعى ەرىكتىلەر قوزعالىسىنىڭ دامۋىنا قۋاتتى سەرپىن بەردى.

«چەللەندج يدەياسى ەلوردادا تولاسسىز جاۋعان قاردان پايدا بولدى. ارينە، كوممۋنالدىق قىزمەتشىلەر، تەحنيكا قالا يگىلىگىنە كۇندىز-ءتۇنى جۇمىس ىستەپ جاتىر. دەگەنمەن دە ءبىز جاستار وسىنداي ۋاقىتتا سۇيىكتى قالامىزبەن بىرگە بولىپ، قالامىزدى قاردان تازالايىق دەپ شەشتىك. ناتيجەسىندە جاستار، قالا تۇرعىندارىنا، اسىرەسە، مۇقتاج وتباسىلارعا، قارتتار مەن مۇگەدەكتەرگە ۇلكەن قولعابىس جاسادى. ءبىزدىڭ قوزعالىسقا بارلىق جاستار بىرلەستىكتەرى، قالانىڭ كەيبىر ۇيىمدارى مەن جوعارى وقۋ ورىندارى قوسىلدى. بۇل اكتسيا ءارى قاراي دا ءوز جالعاسىن تابادى دەگەن سەنىمدەمىن، - دەدى داۋلەت كارىبەك.

قازىرگى ۋاقىتتا ەرىكتىلەر قامقورلىقتى قاجەت ەتەتىن ەلوردا تۇرعىندارىنا قار جيناۋعا، ءۇيدىڭ اينالاسىن تازالاۋعا كومەكتەسۋدە. كۇنتىزبەدە قىستىڭ سوڭى جاقىن بولسا دا، اقپان ايى دەمالۋعا مۇمكىندىك بەرمەيدى. مىسالى، سينوپتيكتەردىڭ مالىمەتىنشە، 18-19 اقپان ارالىعىندا تۇندە جارتى ايلىق مولشەردەگى جاۋىن-شاشىن جاۋدى. اقپان ايىنىڭ باسىنان بەرى تۇسكەن جاۋىن-شاشىن 33 مم قۇرايدى.

سول سەبەپتەن دە وسى فاكتورلاردى ەسەپكە الا وتىرىپ، قالالىق كوممۋنالدىق قىزمەتتەر ەلوردا اۋماعىن قار مەن مۇزدان تازارتۋ قارقىنىن ارتتىرۋعا تىرىسادى. بۇل ىستە ولارعا ەرىكتىلەردىڭ كومەگى اسا ماڭىزدى. استانالىق ەرىكتىلەر وتكىزگەن بۇل ءىس-شارالار جەرگىلىكتى سۋ باسۋدى بارىنشا ازايتۋعا مۇمكىندىك بەرەدى.

سوڭعى جاڭالىقتار

ۇقساس جاڭالىقتار