ايماقتار • 21 اقپان، 2020

نەگىزسىز تەكسەرۋ – كاسىپكە كەدەرگى

23 رەتكورسەتىلدى

سوڭعى ۋاقىتتا شىمكەنت قا­لاسىندا جەر تەلىمىنە بايلانىس­تى داۋ-شارلار كوبەيىپ كەلەدى. مۇنىڭ سەبەبىن ار­كىم ارقالاي ايتىپ ءجۇر. ءبىرى قالاعا قوسىل­عان ەلدى مەكەندەردىڭ «ەسكى جىرى» دەسە، ەندى ءبىرى كەزىندە شاھارداعى اۋىل­شا­­رۋا­شىلىق ماقساتىنداعى جەر­لەر­دى تۇرعىن ءۇي سالۋ باعىتى بويىنشا زاڭ­سىز زاڭداستىرۋدان شىققان دەيدى.

 

بۇگىندە وسى ماسەلە ءۇشىنشى مەگاپوليس تۇرعىندارىنىڭ ءبىرازىنىڭ «باس اۋرۋىنا» اينالىپ وتىر. ءتىپتى جاڭادان بيزنەس باستاعان كاسىپكەرلەردىڭ الدىنان دا وسى ءتۇيىن كەس-كەستەۋدە.

ماسەلەن، بىلتىر شىمكەنتتە 200-دەن استام كاسىپكەردەن جەر تەلىمىنە قاتىستى ارىز تۇسكەن. كاسىپكە بەت بۇرعانداردىڭ باستى ماسەلەسى شارۋاشىلىعىن شىرق يىرۋگە ىڭعايلى جەر تەلىمىن تاپپاۋ بولىپ وتىر. بۇل تۋرالى «اتامەكەن» كاسىپكەرلەر پالاتاسى شىمكەنت قالالىق فيليالىنىڭ ديرەكتورى نۇرلان قابىشتاەۆتىڭ قاتىسۋىمەن وتكەن بريفينگتە ايتىلدى.

بۇگىندە ەلباسى نۇرسۇلتان نازارباەۆ، پرەزيدەنت قاسىم-جومارت توقاەۆتىڭ قولداۋىمەن ەلىمىزدە شاعىن جانە ورتا كاسىپكەرلىككە كوپتەپ كوڭىل بولىنۋدە. سونىڭ ءبىر دالەلى رەتىندە ءۇشىنشى مەگاپوليستە بيزنەسكە بەت بۇرعاندار كوبەيىپ كەلەدى. ناقتىراق ايتار بولساق، 2019 جىلى شىمكەنت قالاسىندا «جاس كاسىپكەر» جوباسى اياسىندا 1400، «بيزنەس باستاۋ» جوباسىمەن 2955 ازامات ءبىلىم العان. سونداي-اق «ەڭبەك» مەملەكەتتىك باعدارلاماسى اياسىندا 3602 ازامات 200 اەك كولەمىندەگى گرانتتىق قارجىلاندىرۋعا مۇمكىندىك العان.

الايدا جەر تەلىمىنەن بولەك، اكىمشى­لىك كەدەرگىلەرگە تاپ بولىپ نەگىزسىز تەك­سەرۋ­لەرمەن الەككە تۇسكەن ىسكەرلەر دە جوق ەمەس.

«قالادا كاسىپورىندار مەن كاسىپكەر­لەردى نەگىزسىز تەكسەرۋ ءالى دە بەلەڭ الۋدا. كاسىپكەرلەردىڭ قۇقىقتىق ساۋاتتىلىعىن كوتەرۋدە دە بىرقاتار شارانى جۇرگىزىپ جاتىرمىز. وسى باعىتتا پروكۋراتۋرامەن سەرىكتەستىكتە جۇمىس جۇرگىزەمىز. كو­بىنە بيزنەس وكىلدەرىنىڭ بەلگىلى ءبىر­ زاڭنامالاردى بىلمەيتىندىگىنەن قيىن­­دىقتار تۋىنداپ جاتادى»، دەيدى ن.قا­بىشتاەۆ.

مۇنان بولەك، وتكەن جىلى بيزنەستى قورعاۋ بويىنشا شىمكەنت قالالىق كاسىپكەرلەر پالاتاسىنا 221 ءوتىنىش كەلىپ تۇسكەن. ونىڭ 193-ءى قارالسا، 75-ءى وڭ شەشىمىن تاۋىپتى. بارلىعى 854 ملن تەڭگەگە بيزنەس مۇددەسى قورعالدى.

407 جەكەمەنشىك مەكتەپكە دەيىن­گى ۇيىمداردا بيۋدجەت قاراجاتى ەسە­بىنەن قارجىلاندىرۋ ءبىلىم جانە عىلىم مينيسترلىگى بەكىتكەن ادىستەمەگە سايكەس جۇزەگە اسىرىلماعانى انىقتالىپ، قا­لا­لىق بيۋدجەتتەن 294 ملن تەڭگە قو­سىم­شا قارجى بولۋگە ىقپال ەتىلسە، فار­ماتسيا سالاسىنداعى بيزنەستى نەگىز­سىز تەكسەرۋ توقتاتىلدى. سون­داي-اق قالالىق جولاۋشىلار كولىگى جانە اۆتوموبيل جولدارى باسقارماسى باس­شىسىنىڭ «ShymkentBus» باسقارۋشى كومپانياسى» جشس اۆتوبۋستارىن كونكۋرسسىز جىبەرۋ تۋرالى زاڭسىز بۇيرىعى جويىلدى. باسقارمانىڭ 2 قىزمەتكەرى تارتىپتىك جاۋاپكەرشىلىككە تارتىلدى.

بىلتىر شىمكەنتتە مەملەكەتتىك ساتىپ الۋدىڭ جالپى سوماسى 154 ملرد تەڭگەنى قۇراعان. ساتىپ الۋداعى جەرگىلىكتى قامتۋ ۇلەسىن تەندەر الدىنداعى باقىلاۋ اياسىندا شىمكەنت قالاسى اكىمىنىڭ وكىمىمەن كوميسسيا قۇرىلىپ، ونىڭ جۇمىس رەگلامەنتى بەكىتىلگەن. ناتيجەسىندە بىرنەشە فاكتىلەر انىقتالعان. سونىڭ ءبىرى وتاندىق ءونىم وندىرۋشىلەردىڭ تاۋارلارىن العا جىلجىتۋ جونىندە تۋىنداعان پروبلەمالار ەكەن. جەرگىلىكتى ءونىم قۇ­نىنىڭ جوعارىلىعى، ساپاسىنىڭ تومەندىگى، يمپورتتىق شيكىزاتقا تاۋەل­دىلىگى، بىرقاتار تاپسىرىس بەرۋشىلەرمەن ءبىر كوزدەن ساتىپ الۋدى جۇزەگە اسىرۋ ماسەلەنىڭ كۇرمەۋلى ءتۇيىنى بولعان.

پالاتا ديرەكتورىنىڭ ايتۋىن­شا، بىرقاتار ساتىپ الۋلاردى ءوز قىزمەت­تەرىمىز دەپ كورسەتكەنىمەن، ناقتى تا­ۋارلار ساتىپ الىنادى ەكەن. سونىمەن قاتار ساتىپ الۋلاردا وتاندىق ءونىم وندىرۋشىلەردىڭ ونىمدەرىن وتكىزۋدى قولداۋ جانە قامتاماسىز ەتۋدە پالاتا قولداۋ بىلدىرۋدە. اتالعان مەكەمە بىلتىر تاۋاردى وتكىزۋ باعىتىندا بىرقاتار جۇمىس اتقارعان. جەرگىلىكتى تاۋار وندىرۋشىلەردىڭ ونىمدەرىن قالاداعى سۋپەرماركەتتەرگە وتكىزۋگە جاردەمدەسۋ ارقىلى 13 كەلىسىمشارتقا قول جەتكىزىپ، 35 جاڭا جۇمىس ورنىن قۇرۋعا سەپتىگىن تيگىزگەن. 39 كاسىپورىندى سۇيەمەلدەۋ ارقىلى 10 كاسىپورىن 6 ەكونوميكالىق-ساۋدا ميسسيالارىنا قاتىسىپ، 8،6 ملن اقش دوللارىنا كونتراكت ءتۇزىپتى.

وتكەن جىلدا اتقارىلعان جۇمىستاردى قورىتا كەلە سالا باسشىسى الداعى جوس­پارلارىمەن دە ءبولىستى. ايتۋىنشا، بىرنەشە جىل بۇرىن جابىلىپ قالعان كاسىپكەرلەرگە قىزمەت كورسەتۋ ورتالىعى قايتا جاندانباق. سونىمەن قاتار ناۋ­رىز ايىندا اشىلاتىن كاسىپكەرلەرگە ارنالعان ورتالىقتا بيزنەس وكىلدەرىنە كەشەندى قىزمەت كورسەتىلەتىنىن جەتكىزدى.

 

شىمكەنت

 

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار