«ۆەدومستۆوارالىق كوميسسيانىڭ كەلىسىمىمەن مەملەكەتتىك باس سانيتارلىق دارىگەردىڭ قاۋلىسىنا سايكەس كوروناۆيرۋستىق ينفەكتسيا (سينگاپۋر, جاپونيا, تايلاند, وڭتۇستىك كورەيا, گونكونگ سار جانە قحر ماكاو سار, تايۆان (قحر), تاراعان ەلدەردەن قازاقستانعا كەلگەن ازاماتتار شەكارادان وتكەن كۇننەن باستاپ 24 كۇن مەديتسينالىق باقىلاۋدا بولادى. ماماندار 14 كۇن بويى ءۇي-ءۇيدى ارالاپ تەكسەرەدى جانە 10 كۇن قاشىقتان مونيتورينگ جۇرگىزەدى. جالپى قازاقستانعا كەلگەن 488 مىڭنان استام ادام قارالدى. رەسپيراتورلىق اۋرۋ بەلگىلەرى جانە دەنە قىزۋى جوعارى 175 ادام اۋرۋحاناعا جاتقىزىلدى. ونىڭ ىشىندە 15 ناۋقاس ستاتسيونارلىق ەمدەۋدە قالادى. ەمدەلۋشىلەردىڭ جاعدايى قاناعاتتانارلىق, كوروناۆيرۋستىق ينفەكتسيا اۋرۋى راستالماعان. رەسمي جانە ۇكىمەتتىك دەلەگاتسيا وكىلدەرىنىڭ, سونداي-اق قىزمەتتىك جانە ديپلوماتتىق پاسپورتتار يەلەرىنىڭ, اۆياكومپانيا ۇشقىشتارىنىڭ جانە قولايسىز اۋماقتاردان كەلەتىن ەكيپاج مۇشەلەرىنىڭ دەنساۋلىعىنا دا 24 كۇن قاشىقتان مونيتورينگ جۇرگىزىلەدى. مەديتسينالىق ۇيىمدار 6 قاڭتاردان باستاپ قىتايدان كەلگەن ازاماتتاردىڭ دەنساۋلىعىنا تۇرعىلىقتى جەرى بويىنشا مونيتورينگ جۇرگىزۋدە. بۇگىنگە دەيىن 24 مىڭنان استام ادام قاتاڭ باقىلاۋدا بولدى, قازىر 23 647 ادام مونيتورينگتەن شىعارىلدى, ال سوڭعى 14 كۇندە كەلگەن 789 ادام, اۋرۋحاناعا جاتقىزىلعان. ياعني مەديتسينالىق باقىلاۋدا. ولار 14 كۇندىك ستاتسيونارلىق كارانتيندە بولعاننان كەيىن شىعارىلادى. دەنساۋلىق ساقتاۋ مينيسترلىگى قاۋىپتى, كۇماندى ايماقتاردان كەلگەن قازاقستاندىقتارعا وزگە ادامدارمەن بايلانىستى ءۇزىپ, ءۇي جاعدايىندا كارانتيندى جالعاستىرۋدى ۇسىنادى», دەدى ول.
سونىمەن قاتار ە.ءبىرتانوۆ زايسانداعى جاعدايعا قاتىستى پىكىر ءبىلدىردى.
«ەلىمىزگە كەلىپ جاتقان ترانزيتتىك تاۋارلار دا بار. سول كولىكتەر ارقىلى شەكارانى كەسىپ وتكەن جۇرگىزۋشىلەر شىعىس قازاقستانداعى باقتى جانە مايقاپشاعاي بەكەتى ارقىلى كەلەدى. ودان بولەك تەمىر جول ارقىلى وتەتىن پۋنكتتەر بار. ءبىز كۇندەلىكتى مونيتورينگ جاسايمىز. سانيتارلىق دارىگەر سول جەردە تۇرادى. تەپلوۆيزورلار بىزدە بار. رەزەرۆتەن الىنعان اقشا بويىنشا قوسىمشا تەپلوۆيزور الۋعا قازىر تىرىسىپ جاتىرمىز», دەدى ۆەدومستۆو باسشىسى.
ءمينيستردىڭ ايتۋىنا قاراعاندا, شەكارادان وتكەن بارلىق جۇرگىزۋشىگە باقىلاۋ جۇرگىزۋ كەرەك.
«مىسالى ءبىزدىڭ اقپارات بويىنشا قىتايدا بيزنەسپەن, ساۋدامەن اينالىساتىن بىرنەشە قازاقستان ازاماتى بار. ولار ەلگە قايتۋى قاجەت. ءبىز ولارعا مۇمكىندىك بەرۋىمىز كەرەك. ارينە تاۋەكەلدەر بار. ولار قاۋىپسىزدىككە بايلانىستى كەلگەننەن كەيىن باقىلاۋعا الىنۋى ءتيىس», دەدى مينيستر.
ە.ءبىرتانوۆ زايساندا «قىتاي ازاماتتارى كەلىپ جاتىر» دەگەن جالعان اقپارات تاراپ كەتكەنىن اتاپ ءوتتى.
«بۇل ارينە دۇرىس ەمەس. ماسەلەن, وتكەن تاۋلىك بويىنشا مايقاپشاعايدان ەشكىم وتكەن جوق. كۇندەلىكتى كوپ بولسا, شىعىس قازاقستان بويىنشا 10-15 ادام وتەدى. ولاردىڭ ءبارى – ءبىزدىڭ ازاماتتار. الماتى وبلىسى بويىنشا 20-30 ادام وتەدى. البەتتە ولار ەلگە كەلگەننەن كەيىن ءارى قاراي ينفەكتسيانى تاراتۋ قاۋپىن بولدىرماۋ ءۇشىن الدىن الۋىمىز قاجەت. سوعان بايلانىستى سول جەردە ارنايى كارانتيندىك ستانسا اشۋ كەرەك. سونداي بۇيرىعىمىز بولعان. ونى ازاماتتار سول اۋىلدىڭ امبۋلاتورياسىنا جاتقىزادى دەپ تۇسىنگەن. شەشىم بويىنشا ءبىزدىڭ ارنايى ستاتسيونار – زايسان اۋدانىنىڭ ورتالىق اۋرۋحاناسىنداعى ارنايى بولەك ينفەكتسيالىق اۋرۋعا ارنالعان كورپۋسقا ورنالاسادى», – دەدى ول. مينيستر سونىمەن قاتار شىعىس قازاقستاندا ينۆەستيتسيالىق جوبالار بويىنشا جۇمىس ىستەپ جاتقان قىتاي ازاماتتارى بارىن جاسىرمادى.
«قۇپيا جوق. ولاردىڭ اراسىندا جاقىندا قىتايدان كەلگەن ازاماتتار دا بار. ولار ءبىزدىڭ باقىلاۋىمىزدا. تىركەلگەن اۋرۋ ادامدار جوق. ولاردىڭ دەنساۋلىعى دۇرىس بولسا ءارى قاراي جۇمىس ىستەۋگە مۇمكىندىك بەرۋىمىز كەرەك. سەبەبى ولاردىڭ كەلىسىمشارتتار بويىنشا ءوز جاۋاپكەرشىلىكتەرى بار», دەدى ە.ءبىرتانوۆ.
