– ءوزىڭىز باسقارىپ وتىرعان «الاش پرايد» كومپانياسى بۇعان دەيىن دە رەسپۋبليكامىزدىڭ بىرقاتار ايماعىندا ءدۇبىرلى دودالار ۇيىمداستىرىپ, جەكپە-جەك دەسە دەلەبەسى قوزاتىن جانكۇيەرلەردىڭ ىستىق ىقىلاسىنا بولەنگەنى بەلگىلى. ال بۇل جولى قالىڭ كورەرمەنگە قانداي سىي دايارلاپ وتىرسىزدار؟
– 22 اقپاندا كونە شاھار – تۇركىستاندا «گران-پري الاش پرايد – 2020» ءتۋرنيرىنىڭ تۇساۋى كەسىلەدى. بۇل رەتتە ءبىز 61,2 كيلو سالماق دارەجەسى بويىنشا وتەتىن باسەكەلەر بارىسىندا ورتالىق ازيانىڭ ەڭ ۇزدىك ورەنىن انىقتايمىز. سول كەشتە جارىس جولىنا سەگىز سپورتشى شىعادى: قازاقستاننان – مۇقاعالي نەسىپباي مەن الىشەر عابدۋللين, وزبەكستاننان – ءنۇرالى ماجيدوۆ پەن مۇراتجان قادىروۆ, قىرعىزستاننان – ءاليماردان ابدىقاروۆ پەن بوستون اناربەكوۆ جانە تاجىكستاننان – سايدشوح رۋزيمەتوۆ پەن مەحروز ۋماروۆ. وسىلاردىڭ اراسىنان وزعان وعلانعا التىن بەلبەۋ جانە 1 ميلليون تەڭگە كولەمىندە سىياقى تابىستالادى. سونىمەن قاتار قارشىعا داۋىتبەك, عالىمجان قاناەۆ, جاندوس يسابەكوۆ, ولجاس ەسقاراەۆ سىندى سايىپقىرانداردىڭ قاتىسۋىمەن بىرنەشە رەيتينگتىك باسەكەلەر ۇيىمداستىرىلادى.
– تاڭداۋلارىڭىز نەلىكتەن ءدال وسى سالماق دارەجەسىنە تۇسكەنىن تۇسىندىرە كەتسەڭىز؟
– ونىڭ ەش قۇپياسى جوق. الداعى ۋاقىتتا ءبىز بارلىق سالماق دارەجەلەرى بويىنشا مىقتىلاردى انىقتاۋ ماقساتىندا ەل اۋماعىندا وسىنداي جارىستار ۇيىمداستىرۋدى كوزدەپ وتىرمىز. بۇل ءبىر جىل كولەمىندە جۇزەگە اساتىن شارۋا. ماسەلەن, 11 ساۋىردە شىمكەنتتە وتەتىن تۋرنيردە 66 كيلو سالماقتاعى سايىپقىراندار سايىسقا تۇسەدى. سولاردىڭ اراسىنان دا ۇزدىكتى انىقتايمىز. وسىلايشا حالىقارالىق فەدەراتسيا بەكىتكەن بارلىق سەگىز سالماق دارەجەسى بويىنشا «الاش پرايد» نۇسقاسى بويىنشا التىن بەلبەۋ يەگەرلەرى بەلگىلى بولادى.
– وسى جارىستاردا كۇش سىناساتىن سپورتشىلار قانداي تالاپتار بويىنشا انىقتالادى؟
– ۇيىمداستىرۋ جۇمىستارى وڭ شەشىمىن تاپقاننان كەيىن ءوزىمىزدىڭ رەسمي سايتىمىز ارقىلى «پالەنباي كۇنى قازاقستاندا وسىنداي بايراقتى باسەكە وتكەلى جاتىر» دەپ بارشا جۇرتقا حابارلايمىز. كورشىلەس ەلدەردىڭ فەدەراتسيالارى مەن ءتۇرلى كلۋب وكىلدەرىنە ارنايى حات جولدانادى. باق سىناۋعا نيەت بىلدىرگەندەر بىزبەن بايلانىسقا شىعادى. وسىلايشا كوپتەگەن ۇمىتكەرلەر اراسىنان كورسەتكىشتەرى ەڭ جاقسى جىگىتتەردى ىرىكتەپ الامىز.
– ال الماتى تورىندە وتەتىن جارىس جايىندا نە ايتاسىز؟ وسى تۋرنيرگە قاتىسۋشىلاردىڭ اتاق-داڭقىنا قاراپ-اق, 6 ناۋرىزدا الاتاۋ باۋرايىندا الاپات ايقاستىڭ كۋاسى بولاتىنىمىزدى سەزىپ تۇرعاندايمىز...
– 6 ناۋرىزداعى جارىستى ءبىز چەشەنستاننىڭ اسا-سىمەن (Absolute Championship Akhmat) بىرلەسىپ ۇيىمداستىرامىز. بۇگىنگى تاڭدا اسا ەرەجەسىز جەكپە-جەك الەمىندەگى ەڭ بەلدى ۇيىمداردىڭ ءبىرى. دەڭگەيى مەن بەدەلى جاعىنان ولار ازىرگە UFC مەن Bellator پروموۋشەندەرىنەن عانا قالىپ كەلەدى. «الاش پرايدتىڭ» سول ۇيىممەن ىسكەرلىك بايلانىس ورناتقانىنا ەكى-ءۇش جىلدىڭ ءجۇزى بولدى. سول كەزدەن بەرى الماتىدا ەكى بىردەي ءتۋرنيردىڭ جالاۋى جەلبىرەدى. سول باسەكەلەردىڭ اسا جوعارى دەڭگەيدە وتكەنىنە سان مىڭ جانكۇيەر كۋا. بۇل جولى دا «الماتى ارەناعا» جينالعان كورەرمەندەر ءار جەكپە-جەكتى ايىزدارى قانىپ تاماشالاپ, ۇيلەرىنە كەرەمەت اسەرمەن ورالاتىنىنا كۇمانىم جوق.
– داعىستاندىق راسۋل ميرزاەۆ ەرجان ەستانوۆپەن ەكى رەت جۇدىرىقتاسىپ, ەكەۋىندە دە جەڭىسكە جەتتى. ودان كەيىن ارمان وسپانوۆپەن كۇش سىناسۋعا ءتيىس ەدى. الايدا ءتۇرلى سەبەپتەرمەن قوس مىقتىنىڭ جولدارى قيىسپادى. سول كەزدە باق وكىلدەرىنە بەرگەن سۇحباتىنىڭ بىرىندە راسۋلىڭ «ەرجان با, ارمان با! ماعان ءبارىبىر» دەپ ايتقانى بار. شىنى كەرەك, قاپ تاۋى قىرانىنىڭ بۇل سوزىنە كادىمگىدەي شامدانىپ قالدىق. ءسىز قالاي ويلايسىز, قازاقتىڭ قايسار ۇلى «قارا جولبارىستى» جەڭە الا ما؟
– ارينە كۇنى بۇرىن بولجام ايتۋ قيىن. ءبىر انىعى, بۇل جولى ەكەۋىنە دە وڭاي بولمايدى. ميرزاەۆ تا (18 جەڭىس,
2 جەڭىلىس), وسپانوۆ تا (9 جەڭىس,
3 جەڭىلىس) وزدەرىنىڭ سپورتتىق مانسابىندا مول تاجىريبە جيىپ, تالاي بيىك بەلەستى باعىندىرعانى بارشاعا ءمالىم. الايدا سوڭعى كەزدەرى ولاردىڭ جولى بولماي ءجۇر. سوڭعى ەكى جارىم جىل ارالىعىندا ارمان ءۇش رەت ۇتىلدى. راسۋل دا ەكى رەت جەڭىلىستىڭ كەرمەك ءدامىن تاتتى. ەندى سول ولقىلىقتىڭ ورنىن تولتىرۋ كەرەك. سوندىقتان دا وزدەرىنىڭ مىقتىلىعىن دالەلدەۋ ءۇشىن قوس سپورتشىنىڭ دا الماتىدا ەش ايانىپ قالمايتىنى انىق.
– «الماتى ارەنادا» وتەتىن جارىستا قازاقستاننىڭ جالپى قانشا سپورتشىسى ونەر كورسەتەدى؟
– ارمان وسپانوۆتان بولەك, ءبىزدىڭ ەلدەن تاعى بەس جىگىت جەكپە-جەككە شىعادى. اتاپ ايتساق, 65,9 كيلو سالماقتاعى ەرمەك تلاۋوۆ (16 جەڭىس, 6 جەڭىلىس) چەشەنستاندىق ءاليحان سۋلەيمانوۆپەن (10 جەڭىس, 2 جەڭىلىس) جانە نۇرسۇلتان قاسىمحانوۆ (9 جەڭىس, 2 جەڭىلىس) بەلارۋستىك يۆان جۆيربليامەن (7 جەڭىس, 3 جەڭىلىس) جۇدىرىقتاسادى. 70,4 كيلو سالماق دارەجەسىندەگى ارتەم رەزنيكوۆ (20 جەڭىس, 6 جەڭىلىس) ينگۋشەتيالىق حامزات اۋشەۆپەن (13 جەڭىس, 3 جەڭىلىس) ايقاسادى. 93 كيلو سالماقتاعى اسىلجان باقىتجان ۇلى (10 جەڭىس, 1 جەڭىلىس) يسپانيالىق دانيەل تولەدو (9 جەڭىس, 7 جەڭىلىس) جانە ەۆگەني ەگەمبەرديەۆ (10 جەڭىس, 2 جەڭىلىس) پولشالىق كارل سەلينسكيمەن (17 جەڭىس, 8 جەڭىلىس) كۇش سىناسادى.
– ايتۋلى جارىستىڭ باستى جەكپە-جەگىندە كىمدەر ايقاسادى؟
– باستى ايقاس برازيليالىق 61,2 كيلو سالماقتاعى دانيەل دە المەيدا (26 جەڭىس, 6 جەڭىلىس) مەن چەشەنستاندىق ءشامىل شاحبۋلاتوۆ (11 جەڭىس, 2 جەڭىلىس) اراسىندا وتەدى. ولاردىڭ ەكەۋىنىڭ دە ەسىمدەرى ءدۇيىم جۇرتقا جاقسى تانىس. ماسەلەن, ءداپ وسى شاحبۋلاتوۆ بىلتىر كۇزدە وتكەن جارىستا راسۋل ميرزاەۆتى اۋىر نوكاۋتقا جىبەرگەن. برازيليا وكىلىنىڭ دە اتاعى الىسقا جايىلعان.
– وتكەن جىلدىڭ قاراشا ايىندا اسا ۇيىمداستىرعان تۋرنيردە جەتى جىگىتىمىز جەكپە-جەككە شىعىپ, سولاردىڭ اراسىنان تەك نۇرسۇلتان قاسىمحانوۆ قانا جەڭىسكە جەتكەن ەدى. وسى جولى دا سونداي جاعداي قايتالانسا, جەرگىلىكتى جانكۇيەرلەردىڭ كوڭىلىنە كىربىڭ تۇسپەي مە؟
– بىردەن ايتا كەتەيىك, اسا تۋرنيرلەرىنە كىل مىقتىلار عانا قاتىسادى. بۇل جارىستا كىمنىڭ جەڭىپ, كىمنىڭ جەڭىلەتىنىن كۇنى بۇرىن جورامالداۋ مۇمكىن ەمەس. ءيا, بىلتىر نۇرسۇلتاننان باسقا جىگىتتەرىمىزدىڭ تەگىستەي ۇتىلعانى راس. بىراق ءتۇرلى سەبەپتەرمەن ول جارىسقا ارمان, اسىلجان, ارتەم جانە ەۆگەني سىندى مىقتىلار قاتىسقان جوق. سودان كوپتى كورگەن كانىگى سپورتشىلاردى وزگە ورەندەرمەن الماستىرۋعا ءماجبۇر بولدىق. وكىنىشكە قاراي, ولاردىڭ دەنى ۇتىلىپ قالدى. دەسەك تە بۇل ەرەجەسىز جەكپە-جەك الەمىندەگى ەڭ ۇزدىك پروموۋشەننىڭ ءبىرى ۇيىمداستىرعان ءتۋرنيرى ەكەنىن ەستەن شىعارماعان ءجون. ءبىز دە ءوز شاكىرتتەرىمىزدىڭ تەك كۇشتىلەرمەن عانا ايقاسقانىن قالايمىز. ويتكەنى سپورتشىلاردىڭ شەبەرلىك دەڭگەيى تەك مىقتى باسەكەلەستىك جاعدايىندا عانا وسەدى. ءبىزدىڭ ۇستانعان پوزيتسيامىز وسىنداي. سوندىقتان بۇل جولى دا الداعى باسەكەلەرگە بولجام جاساۋعا اسىقپايمىز.
– اڭگىمەڭىزگە راحمەت. الداعى جارىستاردا جەرلەستەرىمىزگە ساتتىلىك تىلەيمىز.
اڭگىمەلەسكەن
عالىم سۇلەيمەن,
«Egemen Qazaqstan»
الماتى
