«اكىمدىكتەردىڭ وبليگاتسيالارىن ساتىپ الۋ تەتىگى ارقىلى كرەديتتىك تۇرعىن ءۇي سالۋ باعىتى بويىنشا 108,8 ملرد تەڭگەگە باعالى قاعازدار ساتىپ الىندى. وسى قاراجات ەسەبىنەن اكىمدىكتەر تۇرعىن ءۇي قۇرىلىس جيناق بانكىنىڭ (حولدينگتىڭ ەنشىلەس ۇيىمى) سالىمشىلارىنا جانە «7-20-25» باعدارلاماسىنىڭ قاتىسۋشىلارىنا بەلگىلەنگەن باعامەن 10,6 مىڭ كرەديتتىك پاتەردى تاپسىردى. بيىل اكىمدىكتەردى 101,2 ملرد تەڭگەگە قارجىلاندىرۋ جوسپارلانعان, بۇل شامامەن 10,4 مىڭ پاتەر. تۇرعىن ءۇي قۇرىلىس جيناق جۇيەسىنىڭ باعىتى بويىنشا 2019 جىلى تۇرعىن ءۇي قۇرىلىس جيناق بانكى تۇرعىندارعا 527 ملرد تەڭگەگە 50,3 مىڭ جەڭىلدەتىلگەن قارىز بەردى, سونىڭ 67 ملرد تەڭگەسىنە 8,6 مىڭ قارىز «نۇرلى جەر» مەملەكەتتىك باعدارلاماسى شەڭبەرىندە بەرىلدى. بۇل قارىزدار مەملەكەتتىك باعدارلاماعا قاتىسۋشىلارعا جىلدىق 5%-بەن, 20% باستاپقى جارنامەن بەرىلگەن. بۇگىنگى تاڭدا تۇرعىن ءۇي قۇرىلىس جيناق بانكى جۇيەسىندە 1,6 ملن شارت بار, جيناق سوماسى 806 ملرد تەڭگەنى قۇرادى. بانك تەڭگەمەن ۇزاقمەرزىمدى سالىمدار بويىنشا ءبىرىنشى ورىندا. سونىمەن قاتار, وتكەن جىلدىڭ شىلدەسىنەن باستاپ از قامتىلعان وتباسىلار ءۇشىن 20 جىلعا دەيىن جىلدىق 2%-بەن جەڭىلدەتىلگەن يپوتەكالىق كرەديت بەرۋ «باقىتتى وتباسى» باعدارلاماسى ارقىلى جۇزەگە اسىرىلۋدا. رەسپۋبليكالىق بيۋدجەتتەن 50 ملرد تەڭگە ءبولىندى. تۇرعىن ءۇي قۇرىلىس جيناق بانكىنە 51,7 ملرد تەڭگە جالپى سوماسىنا 5,2 مىڭ ءوتىنىم كەلىپ ءتۇستى, سونىڭ 50 ملرد تەڭگەسىنە 5 مىڭ ءوتىنىم ماقۇلداندى. بيىلدان باستاپ مەملەكەت باسشىسىنىڭ تاپسىرماسىنا سايكەس جىل سايىنعى بەرۋ جوسپارى 10 مىڭ قارىزدى قۇرايدى. تۇرعىن ءۇي قۇرىلىسىنا كەپىلدىك بەرۋ قورى (حولدينگتىڭ ەنشىلەس ۇيىمى) 71,4 ملرد تەڭگەگە جوسپارلاپ, 88,8 ملرد تەڭگە جالپى سوماسىنا جوبالاردى ماقۇلدادى. بۇل كوممەرتسيالىق نارىقتا 6 مىڭ پاتەر ساتىپ الۋ ءۇشىن حالىقتىڭ سالىمدارىن قورعاۋعا مۇمكىندىك بەردى. بيىل 90 ملرد تەڭگەدەن استام سوماعا قۇرىلىستى اياقتاۋعا كەپىلدىك بەرۋ جوسپارلانۋدا», دەدى ءا.ومارقوجاەۆ.
سونىمەن قاتار ول جەكە قۇرىلىس سالۋشىلارعا كرەديتتەردى سۋبسيديالاۋ باعىتى بويىنشا «دامۋ» كاسىپكەرلىكتى دامىتۋ قورى سۋبسيديالاۋ ءۇشىن جالپى سوماسى 49,6 ملرد تەڭگە بولاتىن 47 جوباعا قول قويعانىن اتاپ ءوتتى.
«قۇرىلىس كومپانيالارى ءۇشىن كوممەرتسيالىق كرەديتتەر قۇنى ورتا ەسەپپەن 50% ارزاندادى. سونىمەن بىرگە سالىنعان تۇرعىن ءۇيدىڭ جارتىسى تۇرعىن ءۇي قۇرىلىس جيناق بانكىنىڭ سالىمشىلارىنا, «7-20-25» باعدارلاماسىنا قاتىسۋشىلارعا جانە كوممەرتسيالىق بانكتەرگە بەلگىلەنگەن باعامەن ساتىلادى. مەملەكەت باسشىسىنىڭ تاپسىرماسىنا سايكەس جۇمىس ىستەپ تۇرعان وپەراتورلار سانى ەكىگە دەيىن ازايادى – حولدينگتىڭ تۇرعىن ءۇي بلوگى تۇرعىن ءۇي قۇرىلىس جيناق بانكىنەن الىنعان قارىزدار ارقىلى جۇمىس ىستەيتىن ازاماتتاردىڭ سۇرانىسىن ىنتالاندىرادى جانە بىرىڭعاي وپەراتور فۋنكتسيالارى ارقىلى تۇرعىن ءۇي سالۋ بويىنشا ۇسىنىستى قامتاماسىز ەتەدى», دەدى ول.
