ايماقتار • 21 اقپان، 2020

شاكىرتتەرى ءبىرىنشى ورىندى بەرگەن ەمەس

202 رەتكورسەتىلدى

تۇركىستان وبلىسىنىڭ سوزاق اۋدانىنداعى «سوزاق» جالپى ورتا مەكتەپ-گيمنازياسى ينفورماتيكا ءپانىنىڭ مۇعالىمى رومان قادىرقۇلوۆ ءبىر كەزدەرى «قۇداي قالاسا، زەينەتكەرلىككە شىققانشا، قىرىق جىل بويى ساباق بەرە ءجۇرىپ، جىلىنا وسى سالانى تەرەڭ مەڭگەرگەن ءبىر شاكىرت تاربيەلەپ، قىرىق جىلدا 40 شاكىرت تاربيەلەپ شىعامىن» دەگەن ماقسات قويعان ەكەن.

سودان شاكىرتتەرىنىڭ سانىنىڭ كوپ­تىگىن ەمەس، ساپاسىن، سولاردىڭ جە­تىس­­تىگىن ماقتان تۇتۋدى ماقسات ەتكەن رومان الاۋ ۇلى وقۋشىلارعا ساباقتان تىس ۋاقىتتا «جاس پروگراممالاۋشىلار» ۇيىرمەسىن اشىپ، وقۋشىلاردى قىزىقتىرىپ، پاندىك وليمپيادالارعا دايىنداۋعا كىرىسىپ كەتىپتى.

ءسويتىپ بۇگىنگە دەيىن سول ماقسا­تى­نان اينىماي كەلە جاتقان رومان 22 جىل ىشىندە ينفورماتيكا پانىنەن 22 شاكىرت قانا ەمەس، فيزيكا ءپانى بو­يىنشا دا 32 شاكىرت تاربيەلەپ ۇلگەردى. ءدارىس بەرگەن شاكىرتتەرىنىڭ ءاربىرى مەك­تەپ قابىرعاسىندا جۇرگەندە ينفور­ما­تيكا جانە فيزيكا پاندەرى بويىنشا وليمپيادا، ءبىلىم بايگەلەرىندە مەكتەپ، اۋدان، وبلىس جانە رەسپۋبليكا كولەمىندە ءبىلىم دەڭگەيلەرىنىڭ جوعارى ەكەندىگىن دالەلدەدى. «وسىنداي ءبىلىم جا­رىستارى ارقىلى شاكىرتتەرىمدى ومىر­گە بەيىمدەپ، ءبىلىمىن ۇشتاۋىنا، بو­لاشاق ماماندىق تاڭداۋعا كومەك­تە­سۋ ارقىلى ءوزىم دە كاسىبي دەڭگەيدە وسە وتىرىپ، پەداگوگيكالىق ەڭبەكتىڭ شى­ڭىنا ورمەلەدىم»، دەيدى ول.

سوڭعى 22 جىل كولەمىندە رومان الاۋ­ ۇلىنىڭ شاكىرتتەرى اۋداندىق پان­دىك وليمپيادالاردا ينفورماتيكا جانە فيزيكا پاندەرىنەن 9-11 سىنىپتار اراسىندا ءبىرىنشى ورىندى بەرگەن ەمەس. دايىنداعان شاكىرتتەرى 2000 جىلدان باستاپ ينفورماتيكا ءپانى بو­يىنشا بارلىق وبلىستىق پاندىك وليم­­پيادالارعا ۇزدىكسىز قاتىسىپ، ەلەۋ­­لى جەتىستىكتەرگە قول جەتكىزىپ كە­لە­­دى.

ء«بىزدىڭ مەكتەپ وقۋشىلارىنىڭ دەڭ­گەيى قالا دەڭگەيىنەن كەم ەمەس. وسى گيم­نازيانىڭ وقۋشىلارى تەك اۋدان، وبلىس ەمەس، رەسپۋبليكالىق وليمپيا­دالار مەن بايقاۋلاردا دا توپ جارىپ ءجۇر. بۇگىنگى تسيفرلى تەحنولوگيا مەن ينتەرنەتتىڭ دامۋى اۋىل مەن قالا با­لا­سىنىڭ ءبىلىمىن ءبىر-بىرىنە تەڭەستىرەدى دەسەك بولادى»، دەيدى رومان الاۋ ۇلى اعى­نان جارىلىپ.

رومان قادىرقۇلوۆتىڭ ءوزى «7-سىنىپ. ينفورماتيكا» وقۋلىعى مەن ادىستەمەلىك جيناعىنىڭ اۆتورى. بۇل – قازاقستاندا تۇڭعىش رەت قازاق تىلىندە جازىلىپ، ورىس تىلىنە اۋدارىلعان وقۋلىق. سونداي-اق قازاق، وزبەك جانە ورىس تىلدەرىندەگى «8-سىنىپ. ين­فورماتيكا، «3-كلاسس. يكت»، 9-سىنىپ جانە 10-سىنىپ جاراتىلىس­تا­ن­ۋ-ماتەماتيكا باعىتىنداعى ين­فور­ماتيكا وقۋلىقتارىنىڭ، ادىس­تە­­مەلىك جيناقتارىنىڭ اۆتورى. ۇس­تاز 2005 جىلى وبلىستىق «ال­تىن ديسك» بايقاۋىندا ءبىرىنشى ورىن السا، وسى جىلى وبلىستىق «ال­تىن قور» بايقاۋىندا باس جۇل­دە­نى يەلەندى. «ينفورماتيكادان وليمپياداعا دا­يىنداۋ – وقۋشىنىڭ لوگيكالىق ويلاۋ قابىلەتىن دامىتۋ جانە دۇنيەتانىمىن كەڭەيتۋ كەپىلى» تاقى­رىبىندا جاساعان بايانداماسى «التىن قور» جيناعىنا ەنگەن. 2018 جىلى ماتەماتيكا، فيزيكا جانە ينفورماتيكا پاندەرى مۇعالىمدەرىنىڭ رەسپۋبليكالىق وليمپياداسىندا جۇلدەلى ءىى ورىن يەلەندى.

ول مۇعالىمدىك جۇمىسىن مەكتەپ ديرەكتورىنىڭ عىلىمي-ادىس­تە­مە­لىك جۇمىستار جونىندەگى ورىنبا­سا­رى قىزمەتىمەن ۇشتاستىرىپ وتىر­دى. سونداي-اق مەكتەپ-گيمنا­زيا­نىڭ يننوۆاتسيالىق جانە ەكس­پەري­مەن­تال­دىق الاڭىندا 11 گيمنازيا جانە 12 جىلدىق 4 ەكسپەريمەنت سىنىبىن 15 جىل بويى باسقاردى. وسى كە­زەڭ­دە مەكتەپتەگى وقۋ پروتسەسىن ۇي­ىم­­داستىرۋ مەن مۇعالىمدەردىڭ شىعارماشىلىعىنا، يننوۆاتسيالىق پرو­تسەستەرگە، وقۋشىلاردىڭ پاندىك وليم­­پياداسى، عىلىمي شىعار­ما­شى­لىق جۇمىستار سياقتى مەكتەپتەگى شى­­­عار­ماشىلىق ىزدەنىستىڭ شاكىلى بول­عان باعىتتارعا تىكەلەي جاۋاپ بەر­­­دى. سونىڭ ناتيجەسى بولۋ كەرەك، اتال­عان ءبىلىم وشاعى سوڭعى التى جىل­دان بەرى اۋداننىڭ ەڭ ۇزدىك مەكتە­بى اتا­نىپ ءجۇر. جىل سايىن بۇل مەك­تەپ­تەن 8-10 وقۋشى وبلىستىق پان­دىك وليم­پيا­دالارعا قاتىسىپ وتىرا­دى. 2016 جىلى وبلىستىق پاندىك وليم­پيا­داعا قا­تىسقان 8 وقۋشىنىڭ ۇشەۋى ءى ورىن يەلەندى.

 

ازامات وسپانوۆ،

تۇركىستان وبلىستىق ادامي الەۋەتتى دامىتۋ باسقارماسىنىڭ ءباسپاسوز حاتشىسى

 

سوڭعى جاڭالىقتار

قىرشىن كەتكەن ساڭلاق

سپورت • بۇگىن، 17:35

ۇقساس جاڭالىقتار