وبلىس بيۋدجەتى جىل باسىندا 239,2 ملرد تەڭگە بولىپ بەكىتىلىپ, جىل سوڭىندا 304,6 ملرد تەڭگەگە دەيىن ۇلعايدى. بيۋدجەت قاراجاتىنىڭ 60 پايىزى الەۋمەتتىك مىندەتتەردى شەشۋگە جۇمسالدى. جالپى, جان باسىنا شاققانداعى الەۋمەتتىك شىعىستار بويىنشا سىر ءوڭىرى وبلىستار اراسىندا كوش باستاپ تۇر.
نەگىزگى كاپيتالعا تارتىلعان ينۆەستيتسيا ءوستى, قۇرىلىس جۇمىستارىنىڭ كولەمى 54,3, تۇرعىن ءۇيدى پايدالانۋعا بەرۋ 8,8 پايىزعا ۇلعايدى. سونداي-اق اۋىل شارۋاشىلىعىنىڭ جالپى ءونىمى 4,3%, وڭدەۋ ونەركاسىبىنىڭ كولەمى 1,3%, بولشەك تاۋار اينالىمى 1,5%-عا ۇلعايدى.
جىل ىشىندە وڭىردە 17291 جۇمىس ورنى قۇرىلدى, ونىڭ 12678-ءى تۇراقتى.
وتكەن جىلدىڭ قورىتىندىسىمەن قىزىلوردا ەكونوميكالىق دامۋدىڭ 7 كورسەتكىشى بويىنشا 8 ۇزدىك وبلىستىڭ قاتارىنا كىردى.
– يندۋستريالىق-يننوۆاتسيالىق دامۋ باعىتىندا دا ناتيجە جامان ەمەس. 2018 جىلدىڭ جەلتوقسانىندا قولدانىسقا بەرىلگەن تامپوناجدى تسەمەنت زاۋىتى قازىر ءونىمنىڭ التى ءتۇرىن شىعارادى. تسەمەنت تۇركىستان, اقتوبە, الماتى, جامبىل وبلىستارىنا جانە شىمكەنت قالاسىنا ساتىلادى. سونىمەن قاتار بىلتىرعى شىلدە ايىنان باستاپ وزبەكستانعا ەكسپورتقا جىبەرىلەدى, – دەدى وبلىس اكىمى.
وتكەن جىلدى قورىتىندىلاپ, الداعى كەزەڭگە باعدار جاسايتىن ەسەپتە ءوڭىر باسشىسى وبلىس ەكونوميكاسىنداعى ءتۇيىندى ماسەلەلەرگە دە توقتالىپ ءوتتى. وبلىستا جىل سايىن مۇناي ءوندىرىسى كورسەتكىشى تومەندەپ بارادى. سوڭعى 7 جىلدا وندىرىلگەن «قارا التىن» مولشەرى 5 ملن تونناعا ازايعان. سوندىقتان دا جاڭا كەن ورىندارىن زەرتتەۋ جۇمىستارىن قولعا الۋىمىز قاجەت. ويتكەنى وبلىس ەكونوميكاسىنىڭ ءوسىمى وسى جەراستى بايلىقتارىنا تىكەلەي بايلانىستى. ونىڭ سىرتىندا, وسى سالادا جۇمىس ىستەيتىن 15 مىڭنان استام ادامنىڭ جاعدايىن دا ويلاعانىمىز ءجون. وسىعان بايلانىستى وبلىستىڭ الەۋمەتتىك-ەكونوميكالىق دامۋىنىڭ 2019-2022 جىلدارعا ارنالعان كەشەندى جوسپارى اياسىندا بيىل شۋ – سارىسۋ شوگىندى باسسەينىندە مۇناي-گازدىڭ پەرسپەكتيۆالى قۇرىلىمدارىن انىقتاۋ ماقساتىندا جەر قويناۋىن زەرتتەۋ جۇمىستارى باستالادى. بەينەتى كوپ بۇل جۇمىستىڭ ناتيجەسى دە تەرىس بولمايدى دەگەن بولجام بار.
وبلىس اكىمى قۇرىلىسى ۇزاققا سوزىلعان شىنى زاۋىتى تۋرالى دا ايتىپ ءوتتى. ءوڭىر ەكونوميكاسىنا ۇلەسى مول بولادى دەپ جوسپارلانىپ وتىرعان جوبا اياسىندا اتقارىلىپ جاتقان جۇمىستار جايلى «Orda Glass» جشس باسقارما توراعاسى ەرجان ساعىمباەۆ قىسقاشا بايانداپ ءوتتى.
وسىدان 3 جىل بۇرىن وبلىستىڭ اۋىل شارۋاشىلىعى ونىمدەرىن ەكسپورتتاۋ باعىتىندا كەشەندى ماركەتينگتىك زەرتتەۋلەر جۇرگىزىلگەن بولاتىن. سونىڭ نەگىزىندە وڭىردە اگروونەركاسىپتىك كەشەننىڭ «اگروكارتاسى» جۇزەگە اسىرىلۋدا.
بۇگىندە جيىرما شاقتى ەلگە ەكسپورتتالاتىن اگروونەركاسىپتىك كەشەن ونىمدەرىنىڭ تىزبەسى 3-تەن 19-عا دەيىن ارتتى. اۋىل شارۋاشىلىعى ونىمدەرىن قالدىقسىز وڭدەۋگە جاڭا تەحنولوگيالار تارتىلۋدا. تاۋارلاردىڭ الەۋمەتتىك ماڭىزى بار تۇرلەرىنە باعانى وسىرمەۋگە تۇراقتاندىرۋ قورىنىڭ سەرىكتەس ساۋدا جەلىلەرىنىڭ سەپتىگى ءتيىپ وتىر.
حالىقتى تۇراقتى جۇمىسپەن قامتاماسىز ەتۋ, جۇمىسسىزدىق دەڭگەيىن تومەندەتۋ ماقساتىندا 2018-2020 جىلدار ارالىعى وڭىردە جاپپاي كاسىپكەرلىكتى دامىتۋ جىلى بولىپ جاريالانعان. جۇيەلى شارالار ناتيجەسىندە جۇمىس ىستەپ تۇرعان كاسىپكەرلىك سۋبەكتىلەرىنىڭ سانى سوڭعى جىلى 9,3%-عا ءوسىپ, 46297 بىرلىكتى قۇرادى. كاسىپكەرلىك سۋبەكتىلەرىنەن تۇسكەن سالىق تۇسىمدەرىنىڭ كولەمى 11 پايىزعا ۇلعايدى.
بىلتىر ەكىنشى دەڭگەيلى بانكتەر شاعىن جانە ورتا بيزنەس سۋبەكتىلەرىنە جالپى سوماسى 21,9 ملرد تەڭگە نەسيە بەردى, ونىڭ ىشىندە مەملەكەتتىك باعدارلامالار شەڭبەرىندە جالپى سوماسى 5,6 ملرد تەڭگەگە 166 جوبا قارجىلاندىرىلدى.
وبلىس اكىمىنىڭ ەسەپ بەرۋ بايانداماسىنان كەيىن تۇرعىندار ساۋال قويدى. ارال اۋدانى سەكسەۋىل كەنتىنەن كەلگەن تۇرعىن تەمىر جولدى جاعالاي تۇراقتانعان حالىققا جاڭا مەكتەپ قاجەت ەكەنىن ايتتى. بۇل ماسەلە جايلى مەملەكەت باسشىسى رەسپۋبليكالىق «Egemen Qazaqstan» گازەتىنەن وقىپ, ءتيىستى ورىندارعا تاپسىرما بەرگەن بولاتىن. وبلىس اكىمى كەنت تۇرعىنىنىڭ ساۋالىنا وراي وسى تاپسىرمانىڭ ورىندالۋ بارىسى جايلى ايتىپ ءوتتى.
– وسى مەكتەپ جايىندا مەملەكەت باسشىسىنىڭ تاپسىرما بەرگەنىن بىلەسىزدەر. ول ورىندالادى. بيىل 24 قاڭتاردا ۇكىمەتتىڭ كەڭەيتىلگەن وتىرىسىنان كەيىن وسى ماسەلە تاعى ءبىر پىسىقتالدى. جوبا-سمەتالىق قۇجات بويىنشا مەكتەپتىڭ قۇنى 800 ملن تەڭگەنى قۇراپ وتىر. مەكتەپ 300 ورىنعا ارنالعان. جاقىن ارادا رەسپۋبليكالىق بيۋدجەتتەن قارجى الىپ, مەكتەپ قۇرىلىسىن باستايمىز, – دەدى ايماق باسشىسى.
ءوڭىر باسشىسىنا مۇگەدەكتەرگە ارنالعان تاكسي قىزمەتىن ۇلعايتۋ, كەيبىر ەلدى مەكەندەرگە اۋىز سۋ جەتكىزۋ, جول مەن كوپىر سالۋ سەكىلدى ۇسىنىس-تىلەكتەر ايتىلدى. اۋدانداردان تۇسكەن ۇسىنىس-تىلەكتەر Call-ورتالىق ارقىلى قويىلدى.
وبلىس باسشىسى بارلىق ساۋالدارعا جاۋاپ بەرىپ, وسى باعىتتا اتقارىلاتىن شارالار جايلى ايتىپ ءوتتى.
قىزىلوردا وبلىسى
