قوعام • 19 اقپان، 2020

الىستى جاقىنداتاتىن قۇرىلعى

24 رەتكورسەتىلدى

كوكشەتاۋداعى «تىنىس» زاۋىتى جاڭا جىلدان باستاپ العاشقى وتاندىق ەلەكتر قوزعالتقىشتى مۇگەدەكتەر ارباسىن قۇراستىرۋدى قولعا الدى. بۇعان دەيىن ەلەكتر قۋاتىمەن جۇرەتىن اربالار رەسەي، قىتاي، جانە ەۋروپا ەلدەرىنەن تاسىمالدانىپ كەلگەن بولاتىن.

ەلەكتر قوزعالتقىشتى مۇگەدەكتەر ارباسىن قۇراستىرۋ ءىسى بيىل قازاقستان رەسپۋبليكاسىنىڭ ەڭبەك جانە الەۋمەتتىك قورعاۋ مينيسترلىگىنىڭ ارنايى تاپسىرىسىنان سوڭ قولعا الىنعان. قازىرگى تاڭدا ەلىمىزدە 14 مىڭنان استام مۇمكىندىگى شەكتەۋلى جان مۇگەدەكتەر ارباسىنا ءزارۋ ەكەن. وبلىستا ارباعا قولى جەتپەي وتىرعان 600-گە جۋىق ادام بار. وتكەن جىلى ايماقتاعى مۇمكىندىگى شەكتەۋلى ازاماتتاردى قاجەتتى تەحنيكالىق جابدىقتارمەن قامتۋ مەن وزگە دە وڭالتۋ ءىس-شارالارىنا وبلىس بيۋدجەتىنەن 466 ميلليون تەڭگە كولەمىندە قاراجات قاراستىرىلىپتى.

–وسى قاراجات ەسەبىنەن 504 ادام بولمەىشىلىك جانە سەرۋەندەۋگە ارنالعان  مۇگەدەكتەر ارباسىنا يە بولدى. بيىل 1231 ارباعا تاپسىرىس بەرىلدى. ونىڭ 777-سىنە رەسپۋبليكالىق بيۋدجەتتەن قارجى قاراستىرىلماقشى. ءسويتىپ، ءبىز ايماقتاعى قاجەتتىلىكتى تولىق وتەۋگە  مۇمكىندىك الامىز. وتىنىشتەر جىل سوڭىنا دەيىن قابىلدانادى،–دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باسشىسىنىڭ ورىنباسارى التىن اقباروۆا.       

ەلەكتر قۋاتىمەن جۇرەتىن اربالار ءار 5 جىل سايىن اۋىستىرىلىپ وتىرۋى كەرەك ەكەن. ياعني، ورتاشا العاندا جىلىنا 2 مىڭعا جۋىق  اربا قاجەت. وزدىگىنەن جۇرەتىن ەلەكتر قوزعالتقىشتى اربا  سەرۋەن قۇرۋعا جاراپ تۇر. جالپى سالماعى 70 كەلى شاماسىندا. 15 جانە 30 شاقىرىمعا ارنالعان ەكى اككۋمۋلياتورمەن جابدىقتالعان. 140 كەلىگە دەيىن سالماقتى كوتەرە الادى. ال، جىلدامدىعى ساعاتىنا 6 شاقىرىم. ەلەكتر قوزعالتقىشى ىستەن شىققان جاعدايدا اربانى قولمەن يتەرىپ جۇرۋگە دە بولادى. سونداي-اق ونى جيناپ، اۆتوكولىكتىڭ جۇك سالعىشىنا دا سالۋعا ىڭعايلى. قوسالقى بولشەكتەردى دە «تىنىس» كاسىپورنىنان الۋعا بولادى.

–2018 جىلى وسى بۇيىمداردىڭ ءبىرىنشى دانالارىن تۇتىنۋشىلارعا قولدانىسقا بەردىك. ارمەن قاراي كەمشىلىكتەرىن تۇزەپ، قازىر ەندى مىنا سەريالىق جاعدايدا شىعارۋعا دايىندالىپ وتىرمىز. نەگىزى بۇل جوبانى يگەرۋ سالاسىندا ۇكىمەت تاراپىنان ەشقانداي قارجى سۇراعان جوقپىز. قازىرگى ۋاقىتتا مەملەكەتتىك تاپسىرىسپەن 1379 ارباعا سۇرانىس ءتۇستى،–دەيدى «تىنىس» اكتسيونەرلىك قوعامىنىڭ باس ديرەكتورى قايرات قالمانباەۆ.

قازىرگى تاڭدا زاۋىتتا ەرەسەكتەر مەن بالالارعا ارنالعان مۇگەدەكتەر ارباسىن قۇراستىراتىن ارنايى ءبولىم اشىلعان. مۇندا 60-قا جۋىق ادام ەڭبەك ەتەدى. زاۋىتتىڭ وندىرىستىك قۋاتى جىلىنا 2700 اربا شىعارۋعا قاپتال جەتەدى.

 

 

كوكشەتاۋ قالاسى

سوڭعى جاڭالىقتار

ۇقساس جاڭالىقتار