رۋحانيات • 17 اقپان، 2020

اقمەشىتتە الامان ايتىس ءوتتى

91 رەتكورسەتىلدى

قىزىلوردا قالاسى اكىمدىگىنىڭ ۇيىمداستىرۋىمەن ا.توقماعامبەتوۆ اتىنداعى  مادەنيەت ۇيىندە التىن وردانىڭ 750، اباي قۇنانباەۆتىڭ 175 جىلدىعىنا ارنالعان « ۇلى دالانىڭ ۇلاعاتى» اتتى رەسپۋبليكالىق اقىندار ايتىسى ءوتتى.

ءداستۇرلى ونەردىڭ بايراعىن بيىك كوتەرگەن سىر جەرىندەگى ءسوز الامانى قالالىق جاستار تەاترى ارتىستەرىنىڭ قويىلىمىمەن اشىلدى. ساحنا تورىنە بەلگىلى ايتىس اقىندارى بەكارىس شويبەكوۆ، ديدار قاميەۆ، رۇستەم قايىرتاي ۇلى، نۇرمات مانسۇروۆ، ديدار اپباسوۆ، ءبىرجان بايتۋوۆ، مۇرادىم مەيىرلانوۆ، ەرجەڭىس ابديەۆ، ەرجان ءامىروۆ جانە بولاشاعىنان زور ءۇمىت كۇتتىرەتىن جاس اقىن بەكسۇلتان ورىنباساروۆ كوتەرىلدى. قالا اكىمى نۇرلىبەك نالىباەۆ بيىلعى ۆولونتەرلار جىلىنا بايلانىستى ەرىكتىلەر ايتىسى تۇرىندە وتەتىن  ءدۇبىرلى دوداعا قاتىساتىن جۇيرىكتەرگە ساتتىلىك تىلەدى.

كىل جۇيرىك باق سىناعان ءدۇبىرلى دودانى «التىن دومبىرانىڭ» ەكى مارتە يەگەرى، جۋىردا عانا نۇر-سۇلتان قالاسىندا وتكەن «ادامزاتتىڭ الىبى – حاكىم اباي» اتتى رەسپۋبليكالىق ايتىستىڭ باس جۇلدەسىن سىرعا الىپ كەلگەن مۇحتار نيازوۆ جۇرگىزىپ وتىردى. ءسوز سايىسىنا بەلگىلى جىراۋ، قازاقستاننىڭ ەڭبەك سىڭىرگەن قايراتكەرى الماس الماتوۆ، اقىن، مەملەكەتتىك «دارىن» جاستار سىيلىعىنىڭ يەگەرى، قازاقستاننىڭ ەڭبەك سىڭىرگەن قايراتكەرى داۋلەتكەرەي كاپ ۇلى مەن اقىن، قازاقستان جازۋشىلار وداعىنىڭ مۇشەسى دۇيسەنبەك اياش ۇلى قازىلىق جاسادى.

العاشقى جۇپتىڭ ءسوز قاعىستىرۋى شاشىراڭقىلاۋ شىققانىمەن، ودان كەيىن ساحناعا كوتەرىلگەن تارازدىق ديدار اپباسوۆ پەن جەرگىلىكتى اقىن بەكسۇلتان ورىنباساروۆ ءسوز سايىسىن شيراتا ءتۇستى. ال بىلتىرعى «التىن دومبىرا» سايىسىنىڭ باس جۇلدەسىن العان سەمەيلىك رۇستەم قايىرتاي مەن قىزىلوردالىق ەرجەڭىس ابديەۆتىڭ ايتىسى كورەرمەننىڭ ايىزىن قاندىردى.

وسىدان كەيىن شىققان جۇپتار دا ادامزات اقىل-ويىنىڭ بيىگىندە تۇرعان ءال-ءفارابيدى الەم تانىعانمەن ءوزىمىز ءالى تولىق ءبىلىپ بولماعانىمىزدى، التىن ورداداي مەملەكەت قۇرعان بابالار اماناتىنا ادالدىقتى، ارتىندا «ولمەيتۇعىن ءسوزى، وشپەيتۇعىن شامى» (رۇستەم قايىرتاي) قالعان ۇلى اباي مۇراسىن جەر جۇزىنە تانىتۋ كەرەكتىگىن جىرعا قوستى. ودان بولەك، اقىندار اۋزىمەن قازىرگى قوعامداعى كۇيىپ تۇرعان وتكىر ماسەلەلەر دە ايتىلدى.

قازىلار القاسىنىڭ شەشىمىمەن ءسوز الامانىنىڭ باس جۇلدەسىن رۇستەم قايىرتاي ەنشىلەسە، ءى ورىن قىزىلوردالىق ەرجەڭىس ابديەۆكە بۇيىردى. قالعان ەكى ورىندى قاراعاندىلىق ديدار قاميەۆ پەن تۇركىستان وبلىسىنان كەلگەن بەكارىس شويبەكوۆ ءوزارا ءبولىستى.

قىزىلوردا

سوڭعى جاڭالىقتار

ۇقساس جاڭالىقتار