ايماقتار • 17 اقپان، 2020

«ساياتشىلىق – سال-سەرىنىڭ سارقىتى» ەتنوگرافيالىق شاراسى وتكىزىلدى

68 رەتكورسەتىلدى

ماڭعىستاۋدا «اداي اتا – وتپان تاۋ» كەشەنىندە جەرگىلىكتى ساياتشى، قۇسبەگىلەردىڭ قاتىسۋىمەن ءداستۇرلى «ساياتشىلىق – سال-سەرىنىڭ سارقىتى» اتتى ەتنوگرافيالىق شارا بولىپ ءوتتى. بۇل تۋرالى كەشەننىڭ كوپشىلىك-ەكسكۋرسيا بولىمىنەن حابارلادى.

شارانىڭ ماقساتى قازاقتىڭ بەكزات ونەرى ءارى ۇلتتىق سپورتى قۇسبەگىلىك پەن ساياتشىلىقتى حالىق اراسىندا ناسيحاتتاۋ، وعان جاستار مەن ستۋدەنتتەردىڭ، وقۋشىلاردىڭ قىزىعۋشىلىعىن ارتتىرۋ جانە شارانى جالپى جۇرتشىلىق قاتىساتىن ۇلتتىق مەرەكەگە اينالدىرۋ.

-شارا 2013 جىلدان بەرى وتكىزىلىپ كەلەدى. شاراعا 30-عا جۋىق ساياتشىلار مەن اتالمىش ونەرگە جانى قۇمار جاندار، ماڭعىستاۋ تۋريزم كوللەدجىنىڭ ستۋدەنتتەرى مەن وقىتۋشىلارى قاتىستى. جاستارعا ولكەمىزدە وتكەن اتاقتى اڭشىلار مەن ساياتشىلىق، قۇسبەگىلىك ونەرى تۋرالى ايتىلدى. بيىلعى شاراعا وبلىس ساياتشىلارىمەن قاتار كورشى اتىراۋ وبلىسىنىڭ قۇلسارى قالاسىنان ساياتشىلار قاتىستى، دەيدى «وتپان» مكقك كوپشىلىك-ەكسكۋرسيا ءبولىمىنىڭ مەڭگەرۋشىسى ج.ايداربەك.

سونىمەن قاتار «تازى توبەت ءبورىباسار» ۇلتتىق سپورت فەدەراتسياسى» رقب-ءنىڭ ماڭعىستاۋ وبلىستىق فيليالىنىڭ توراعاسى جۇلدىزباي قوسماعامبەتوۆ، زاڭگەرى ەركىن بالدەكوۆ پەن رەسپۋبليكالىق دارەجەدەگى تورەشى ءابۋناسىر بايجاناقوۆ قاتىسىپ، فەدەراتسيانىڭ قازاقى تازى مەن توبەتتەردى سۇرىپتاۋ، تۇقىمىن جاڭعىرتۋ باعىتىنداعى جۇمىستارى تۋرالى ايتىپ بەرىپ، كەلۋشىلەرگە ارناپ توبەتتەردىڭ قىسقاشا جەكپە-جەگىن وتكىزدى.

شاراعا ارنايى شاقىرىلعان ءدىلجانوۆ جۇماعالي اقساقال قازاقتىڭ قاسيەتتى ونەرىن دامىتىپ جاتقان جاستارعا اق باتاسىن ارنادى.

شولىركەپ، اشىققان قوناقتارعا «اداي اتا – وتپان تاۋ» كەشەنى داستارحان جايىپ، ساماۋرىندى بۇرق-بۇرق قايناعان، قيدىڭ شوق ءيسى ارالاسقان كۇرەڭ ءشاي، ىسسى باۋىرساق پەن پالاۋىن بەرىپ، جۇرتتىڭ ىستىق ىقىلاسىنا بولەندى.

سوڭعى جاڭالىقتار

ۇقساس جاڭالىقتار