اتىراۋ وبلىستىق دەنەشىنىقتىرۋ, تۋريزم جانە سپورت باسقارماسىنىڭ بۇرىنعى باستىعى بەرىك جانكەەۆكە حالىقارالىق ىزدەۋ جاريالاندى. بۇل تۋرالى «اك جايىك» گازەتى حابارلاپ وتىر.
ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ (قارجى پوليتسياسى) سايتىندا 37 جاسار ب.جانكەەۆتىڭ قىلمىستىق كودەكستىڭ 235-بابى 3-بولىگى مەن 176-بابى 4-بولىگى («ءبىر نەمەسە بىرنەشە قىلمىس جاساۋ ماقساتىندا ۇيىمداسقان قىلمىستىق توپ قۇرۋ» جانە «ۇيىمداسقان قىلمىستىق توپتىڭ سەنىپ تاپسىرىلعان وزگەنىڭ مۇلكىن يەمدەنىپ كەتۋ نەمەسە تالان-تاراجعا سالۋ») بويىنشا قاراستىرىلعان قىلمىستاردى جاساعانى ءۇشىن ىزدەستىرىلىپ جاتقانى حابارلانعان.
بۇدان بۇرىن جانكەەۆتىڭ باسشىلىعىنداعى ۇيىمداسقان توپتىڭ 2008-2012 جىلدارى بيۋدجەتتىڭ شيرەك ملرد. تەڭگەگە جۋىق, ياعني 250 ملن. تەڭگەگە تارتا اقشاسىن ۇرلاعانى ايتىلعان. ءبىز سونىڭ ىشىندە اتىراۋ وبلىستىق قارجى پوليتسياسىنىڭ بيۋدجەت قارجىسىن قولدى ەتكەن فاكتىلەرى بويىنشا بەرىك جانكەەۆ پەن «اتىراۋ» ۆولەيبول كومانداسى باسشىلارىنا قاتىستى قىلمىستىق ءىس قوزعاعانى جازعان ەدىك.
قۇرىش نۇرىمبەت.
