ايماقتار • 16 اقپان، 2020

سارا نازارباەۆا «بوبەكتىڭ» تۇلەكتەرىمەن كەزدەستى

176 رەتكورسەتىلدى

الماتىدا ورنالاسقان «بوبەك» ۇلتتىق عىلىمي-پراكتيكالىق، ءبىلىم بەرۋ جانە ساۋىقتىرۋ ورتالىعىندا «بوبەك» قايىرىمدىلىق قورىنىڭ پرەزيدەنتى، ء«وزىن–وزى تانۋ» رۋحاني–ادامگەرشىلىك ءبىلىم بەرۋ باعدارلاماسىنىڭ اۆتورى سارا نازارباەۆانىڭ وسى گيمنازيا جانە كوللەدج تۇلەكتەرىمەن كەزدەسۋى ءوتتى.

كەزدەسۋ بارىسىندا ايتۋلى ورتالىقتا ءبىلىم نارىنە سۋسىنداپ، جاڭا ومىرگە العاشقى قادام جاساعان تۇلەكتەر وسىنداعى مۇعالىمدەر مەن پەدوگوگتارعا وزدەرىنىڭ ريزاشىلىقتارىن ءبىلدىرىپ، اقجارما كوڭىلدەرىن اقتاردى. اسىرەسە، ولاردىڭ وسى ورتالىقتىڭ باسشىسىنا دەگەن قۇرمەتتەرى ەرەكشە ەكەن. سانالى عۇمىرىنىڭ بارلىعىن مەيىرىمدى ىستەر مەن يگى شارالارعا جۇمساعان سارا الپىسقىزىنا اق العىستارىن جاۋدىرعان «بوبەكتىڭ» تۇلەكتەرىنىڭ ارقايسىسى نازارباەۆا حانىمدى ومىردەگى وزدەرىنىڭ ەڭ ۇلكەن ۇستازى دەپ ەسەپتەيتىندەرىن ايرىقشا ءبىر ماقتانىش سەزىمدەرىمەن باياندادى.

جيىن بارىسىندا اسەرلى اڭگىمەلەر ايتىلىپ، ادەمى اندەر شىرقالدى. «سۇيىسپەنشىلىك ساباقتارى» باعدارلاماسى جايىندا كەڭىنەن ءسوز قوزعالدى. ادامداردىڭ ءبىر-بىرىنە دەگەن مەيرىمدىلىگى، سىيلاستىعى، دوستىعى، ماحابباتى تۇرعىسىندا تالاي تارتىمدى اڭگىمەنىڭ تيەگى اعىتىلدى. ال باعدارلاما اۆتورى بولسا، جاستارمەن رۋحانيلىق، ادامگەرشىلىك جانە ادام بالاسىنىڭ ناعىز باقىتى تۋرالى ءوز ويلارىمەن پىكىر ءبولىستى.

«سۇيىسپەنشىلىك ساباقتارى» - بۇل سارا الپىسقىزىنىڭ پەداگوگتار، وقۋشىلار جانە تۇلەكتەرمەن ءداستۇرلى تۇردە ءوتىپ تۇراتىن كەزدەسۋى ەكەنى بارشاعا ءمالىم. ءسوز ورايى كەلگەندە، وسى ءىس-شارا ء«وزىن-ءوزى تانۋ: سۇيىسپەنشىلىك جانە شىعارماشىلىق پەداگوگيكاسى» جالپىرەسپۋبليكالىق پاندىك ونكۇندىك شەڭبەرىندە وتكەنىن ايتا كەتكەن ءجون.   

الماتى

سوڭعى جاڭالىقتار

بەنزين باعاسى ارزاندادى

ەكونوميكا • كەشە

14 وتباسىعا قول ۇشىن سوزدى

قازاقستان • كەشە

ۇقساس جاڭالىقتار