بۇگىنگى تاڭدا «مەن – الماتىلىقپىن» قوعامدىق بىرلەستىگى سەگىز باعىتتا جۇمىس جاساۋدا: 1). ءبىلىم بەرۋ جوبالارى; 2). توتەنشە جاعدايلاردىڭ سالدارىن جويۋ جانە زارداپ شەككەن ايماقتارعا گۋممانيتارلىق كومەك كورسەتۋ; 3). سپورتتىق ليگا; 4). دەمورگانيزاتسيا جۇمىستارى; 5). «يۋستۋس» زاڭ پالاتاسى; 6). ارنايى ماقساتتاعى كۇشتەردىڭ ارداگەرلەر وداعىمەن بىرلەسكەن جۇمىس; 7). ەكولوگيا ماسەلەسى; 8). جاستار قاناتى.
راسىندا دا, وسى باعاتتاردا ايتۋلى ۇيىم ءبىراز شارۋا تىندىرعان ەكەن. ماسەلەن, رەسپۋبليكامىزدىڭ بىرقاتار وڭىرىندە (ارىس پەن الماتى قالالارى, قاراعاندى مەن اقتوبە وبلىستارى جانە ت.ب ), تىپتەن شەت مەملەكەتتەردە ورىن العان توتەنشە جاعدايلاردىڭ سالدارىن جويۋعا اتسالىسىپ, گۋممانيتارلىق كومەك كورسەتتى. قارتتتار مەن جەتىمدەر ءۇيىن ءوز قامقورلىعىنا الدى. كەمباعال جاندار مەن تۇرمىسى تومەن وتباسىلارعا كومەك كورسەتۋدە.
ءبىلىم بەرۋ جوباسى بويىنشا نۇر-سۇلتان مەن الماتى قالالارىندا 1700-دەن اسا بالانى جاڭا تەحنولوگيالار بويىنشا اعىلشىن تىلىنە ۇيرەتتى. سپورتتىق سايىستار جانە اسكەري-پاتريوتتىق شارالاردى ۇزدىكسىز ۇيىمداستىرىپ تۇرادى. وسىلايشا, حالىقتىڭ دەنساۋلىعىن نىعايتىپ, ولاردى سالاۋاتتى ءومىر سالتىنا ىنتالاندىرۋعا جانە جاس جەتكىنشەكتەردى وتانسۇيگىشتىك رۋحتا تاربيەلەۋگە بارىنشا ۇلەس قوسۋدا.
ەكولوگيا ماسەلەسى دە «مەن – الماتىلىقپىن» قوعامدىق بىرلەستىگى نازارىنان تىس قالعان ەمەس. وسى ورايدا, ەرىكتىلەر قالانى كورىكتەندىرۋ, گۇلدەندىرۋ باعىتىندا ۇزدىكسىز جۇمىستار جۇرگىزىپ كەلەدى. مىنە, وسىلاي تىزبەكتەي بەرسەك, ايتۋلى ۇيىم تاراپىنان اتقارىلىپ وتىرعان شارۋانىڭ از ەمەستىگىنە انىق كوز جەتكىزۋگە بولادى.
