ماڭعىستاۋ وبلىسىنىڭ مادەنيەت جانە ونەر ۇيىمدارى 2019 جىلى بىرقاتار ءىرى مادەني-كوپشىلىك شارا وتكىزدى. اتاپ ايتساق, قازاقستاننىڭ ەڭبەك ەرى, حالىق جازۋشىسى ءا.كەكىلباي ۇلىنىڭ 80 جىلدىق مەرەيتويى كەڭ كولەمدە اتالىپ ءوتتى. شارا بارىسىندا قازاقستان پرەزيدەنتى ق.ك. توقاەۆتىڭ قاتىسۋىمەن ءابىش كەكىلباەۆ اتىنداعى ماڭعىستاۋ وبلىستىق تاريحي-ولكەتانۋ مۋزەيى مەن ءابىش كەكىلباي ۇلى ەسكەرتكىشى سالتاناتتى تۇردە اشىلدى.
ءا.كەكىلباي ۇلىنىڭ 80 جىلدىعىنا ارنالعان ادەبيەت جانە ونەر قايراتكەرلەرىنىڭ حالىقارالىق كونگرەسى, سونداي-اق ءبىرىنشى حالىقارالىق «ABISH ALEMI» تەاتر فەستيۆالى ۇيىمداستىرىلىپ, وعان ارمەنيا, گرۋزيا, يران, وزبەكستان, تۇركمەنستان, تاجىكستان, تۇركيا جانە قازاقستاندىق تەاتر ۇجىمدارى بەلسەندى قاتىستى.
«ماڭعىستاۋدىڭ تاريحي-مادەني مۇرالارىن زەرتتەۋدەگى جاڭا كوزقاراستار مەن پەرسپەكتيۆالار» حالىقارالىق عىلىمي-پراكتيكالىق كونفەرەنتسياسى ۇلىبريتانيا (وكسفورد ۋنيۆەرسيتەتى), ءازىربايجان, يران, رەسەي, تۇرىكمەنستان, وزبەكستان ەلدەرىنەن كەلگەن عالىمدار مەن مامانداردىڭ باسىن قوستى. بارلىعى 100-گە جۋىق قاتىسۋشى جينالدى.
«قىرىمنىڭ قىرىق باتىرى» قازاق حالقىنىڭ تەڭدەسسىز ەپوپەيالىق شىعارماسى مەن ونى وسى زامانعا تولىق جەتكىزۋشى, داڭعايىر جىراۋ مۇرىن سەڭگىربەك ۇلىنىڭ ەسىمىن كەڭىنەن ناسيحاتتاۋ ماقساتىندا جىراۋدىڭ 160 جىلدىعىنا ارنالعان «مۇحيتتان قالمىش تەڭىز-جىر» رەسپۋبليكالىق جىرشىلار كونكۋرسى ءوتتى.
ماڭعىستاۋدا 14 ناۋرىزدا تويلاناتىن امال مەرەكەسى ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا ەكىنشى جىل رەسپۋبليكالىق دەڭگەيدە اتالىپ ءوتتى. شاراعا اقمەشىتتەن, سارايشىق كەسەنەسىنەن, وزبەكستاننان, يچانكالا مەموريالدىق كەشەنىنەن, حورەزم وبلىسىنان جانە نوعاي ەلىنەن كەلگەن قوناقتار مەن قازاق ۇلتتىق مادەنيەت ورتالىعىنىڭ وكىلدەرى بەلسەنە اتسالىستى. 50-دەن استام كيىز ءۇي تىگىلىپ, 200-دەن استام ونەرپاز ونەر كورسەتتى. سونداي-اق, ۇلتتىق سپورت ويىندارىنان جارىستار وتكىزىلىپ, الامان بايگە ۇيىمداستىرىلدى.
