اقپان ايىنىڭ العاشقى كۇنى تۇنگى ساعات 23:00 شاماسىندا كۇرە جولمەن كەلە جاتقان پوليتسيا قىزمەتكەرلەرى سۋناق اتا اۋىلى مەن 19 رازەزد ارالىعىندا جۇرگەن بالانى بايقاپ قالعان. توقتاپ, ءجون سۇراسقان ولار بالانىڭ جولعا اكە-شەشەسىمەن بىرگە شىققانىن انىقتاپتى. اۆتوكولىك ايالداعان تۇستا بالانىڭ سىرتقا شىققانىن بايقاماعان اكە-شەشەسى جولعا شىعىپ كەتە بارعان.
بالا ايتقان بەلگىلەر بويىنشا «لادا-ۆەستا» كولىگىنە ىزدەۋ سالعان پوليتسەيلەر كوپ ۇزاماي جولاۋشىلاردى تاپتى. ءبىر تاڭعالارلىعى, رەسەيدەن تاجىكستانعا بەت العاندار بالانىڭ جولدا ءتۇسىپ قالعانىن ءتارتىپ ساقشىلارى توقتاتقان كەزدە عانا ءبىلىپتى.
پوليتسەيلەر بالا مەن ەرلى-زايىپتىلاردىڭ تۋىستىق قاتىناستارىن راستايتىن قۇجاتتارىن تەكسەرىپ, ساتتىلىك تىلەپ شىعارىپ سالدى.
