جيىندا پارتيانىڭ وبلىستىق فيليالى توراعاسىنىڭ ءبىرىنشى ورىنباسارى اقمارال ءالنازاروۆا ارنايى توپ بۇعان دەيىن وڭىردەگى وقۋ ورىندارىنىڭ جاتاقحانالارىنا مونيتورينگ جۇرگىزىپ, بىرقاتار كەمشىلىك انىقتاعانىن اتاپ ءوتتى.
ماسەلەن, قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ №1 ستۋدەنتتىك جاتاقحاناسى كۇردەلى جوندەۋدى قاجەت ەتەدى. ستۋدەنتتەردىڭ جاتىن ورىندارى بەلگىلەنگەن نورماتيۆتىك تالاپتارعا ساي ەمەس. كومپيۋتەرلىك زال تولىق جابدىقتالماعان. جاتاقحاناداعى 345 ستۋدەنتكە بولىنگەنى 3-اق كومپيۋتەر.
«اقمەشىت» گۋمانيتارلىق-تەحنيكالىق ينستيتۋتىنىڭ تۇرعىن ءۇيدىڭ 1 قاباتىندا ورنالاسقان جاتاقحاناسى مەديتسينالىق پۋنكتپەن قامتاماسىز ەتىلمەگەن, ونداعى 21 ستۋدەنت ءۇشىن نە وقۋ زالى, نە كومپيۋتەرلىك كابينەت جوق. مۇنداي كەمشىلىكتەر قازانعاپ اتىنداعى قىزىلوردا مۋزىكالىق جوعارى كوللەدج جاتاقحاناسىنان دا انىقتالعان, – دەدى اقمارال ءالنازاروۆا.
مونيتورينگ بارىسىندا سىرداريا اگرارلىق-تەحنيكالىق كوللەدج جاتاقحاناسىنىڭ كىرەبەرىسىندەگى پاندۋستاردىڭ تالاپقا ساي ەمەستىگى, جالاعاش يندۋستريالدى-اگرارلىق كوللەدج جاتاقحاناسىندا مەديتسينالىق پۋنكتتىڭ جوقتىعى جانە جاڭاقورعان اگرارلى-تەحنيكالىق كوللەدج جاتاقحاناسىنىڭ كۇردەلى جوندەۋدى قاجەت ەتەتىندىگى انىقتالعان.
جيىن بارىسىندا وقۋ ورىندارى مەن ءتيىستى سالا باسشىلارىنىڭ حابارلامالارى تىڭدالىپ, ولارعا كەمشىلىكتى قالىپقا كەلتتىرۋ ءۇشىن ناقتى تاپسىرمالار بەرىلدى.
قىزىلوردا وبلىسى
