پرەزيدەنت • 01 اقپان، 2020

قازاقستان پرەزيدەنتى رف ۇكىمەتىنىڭ توراعاسى ميحايل ميشۋستينمەن كەزدەستى

126 رەتكورسەتىلدى

قاسىم-جومارت توقاەۆ ميحايل ءميشۋستيندى رەسەي ۇكىمەتىنىڭ توراعالىعىنا تاعايىندالۋىمەن قۇتتىقتاپ، رەسەي فەدەراتسياسىمەن اراداعى ەكىجاقتى ىنتىماقتاستىقتىڭ ستراتەگيالىق جانە وداقتاستىق قاتىناستاردى ودان ءارى تەرەڭدەتە بەرۋدىڭ ماڭىزدىلىعىن اتاپ ءوتتى. بۇل تۋرالى اقوردانىڭ ءباسپاسوز قىزمەتى حابارلادى.

– ءسىز ۇكىمەت توراعاسى رەتىندەگى العاشقى شەتەلدىك ساپارىڭىزدى قازاقستانعا جاساپ وتىرسىز. بۇنىڭ سيمۆوليكالىق ءمانى بار ءارى ءبىزدىڭ ەۋرازيالىق ەكونوميكالىق وداق اياسىنداعى ستراتەگيالىق ىنتىماقتاستىقتى جانە ءوزارا ءىس-قيمىلداردى دامىتۋ تۇرعىسىنان دا ماڭىزى زور، – دەدى پرەزيدەنت.

كەزدەسۋدە 31 قاڭتار كۇنى الماتى قالاسىندا ەۋرازيالىق ەكونوميكالىق وداقتى ودان ءارى دامىتۋدىڭ وزەكتى ماسەلەلەرى تالقىلانعان ەۋرازيالىق ۇكىمەتارالىق كەڭەس وتىرىسىنىڭ  قورىتىندىلارى ءسوز بولدى.

– ەۋرازيالىق ۇكىمەتارالىق كەڭەستىڭ وتىرىسىنا قاتىسقانىڭىزدى بىلەمىن. وندا بۇگىنگى كۇننىڭ وتە وزەكتى ماسەلەسى – تسيفرلاندىرۋ تالقىلاندى. قازاقستان بۇل ىسپەن بەلسەندى اينالىسۋدا. ءدال وسى سالا بويىنشا سىزدەردىڭ تاجىريبەلەرىڭىز مول. سوندىقتان ىنتىماقتاستىققا نيەتتىمىز، – دەدى مەملەكەت باسشىسى.

قازاقستان پرەزيدەنتى قابىلدانعان كەلىسىمدەر ەۋرازيالىق ەكونوميكالىق وداقتىڭ وركەندەۋىنە تىڭ سەرپىن بەرەتىنىنە سەنىم ءبىلدىردى.

وسى ورايدا قاسىم-جومارت توقاەۆ تاۋار اينالىمىنىڭ، قىزمەت كورسەتۋدىڭ، كاپيتال جانە جۇمىس كۇشىنىڭ ەركىن قوزعالىسىن قامتاماسىز ەتۋ ءۇشىن كەدەرگىلەردى بىرتىندەپ جويۋ شارالارىن قابىلداۋ قاجەتتىگىن اتاپ ءوتتى.

رەسەي پرەمەر-ءمينيسترى مەملەكەت باسشىسىنا نۇر-سۇلتان قالاسىنا ساپارلاپ كەلۋگە مۇمكىندىك جاساعانى ءۇشىن العىس ءبىلدىردى.

– رەسەي مەن قازاقستاندى باۋىرلاستىق، سەرىكتەستىك جانە وداقتاستىق قارىم-قاتىناستار بايلانىستىرادى. ساۋدا-ەكونوميكالىق جانە ينۆەستيتسيالىق ءوزارا ءىس-قيمىلدار قارقىندى دامىپ، ايماقارالىق بايلانىستار مەن ىسكەرلىك توپتاردىڭ قارىم-قاتىناستارى نىعايىپ كەلەدى. ەۋرازيالىق ەكونوميكالىق ينتەگراتسيالار پروتسەسىندە، ۇقشۇ، تمد، شىۇ جانە باسقا دا كوپجاقتى بايلانىستاردا ءبىزدىڭ ەلدەرىمىز جەتەكشى ءرول اتقارادى، – دەدى ميحايل ميشۋستين.

رەسەي ۇكىمەتىنىڭ توراعاسى قازاقستان پرەزيدەنتىنە ۆلاديمير ءپۋتيننىڭ سالەمىن جەتكىزىپ، 2020 جىلدىڭ 9 مامىر كۇنى ماسكەۋ قالاسىندا وتەتىن جەڭىس كۇنىنە ارنالعان شاراعا قاتىسۋعا شاقىردى.

– جەڭىستىڭ 75-جىلدىعىنا شاقىرۋدى ۇلكەن ىقىلاسپەن قابىلداپ، ءدال سول كۇنى قىزىل الاڭدا وتەتىن جەڭىس پارادىن تاماشالاۋعا بارامىن. بۇل ءبىزدىڭ ورتاق مەرەكەمىز، – دەدى قاسىم-جومارت توقاەۆ.

تاراپتار قازاقستان مەن رەسەي اراسىنداعى ىقپالداستىقتىڭ باسىم باعىتتارىن، اتاپ ايتقاندا، جايىق ترانسشەكارالىق وزەنىنىڭ سۋ رەسۋرستارىن ءتيىمدى پايدالانۋ جانە ەكولوگيا ماسەلەلەرىن تالقىلادى.

قازاقستان پرەزيدەنتى ەكىجاقتى ساۋدا-ەكونوميكالىق جانە مادەني-گۋمانيتارلىق بايلانىستاردى ودان ءارى نىعايتۋ ماقساتىندا ەكى ەل ۇكىمەتتەرىنىڭ تىعىز جۇمىس ىستەۋى قاجەت ەكەنىن ايتتى.

مەملەكەت باسشىسى بيىل كۇزدە كوكشەتاۋدا وتەتىن، ەكولوگيا ماسەلەلەرىنە ارنالعان XVII ايماقارالىق ىنتىماقتاستىق فورۋمىنا رەسەي پرەزيدەنتى ۆلاديمير ءپۋتيننىڭ قاتىساتىنىنا سەنىم ءبىلدىردى. 

سوڭعى جاڭالىقتار

ۇقساس جاڭالىقتار