وتىرىسقا سونىمەن قاتار رەسەي فەدەراتسياسىنىڭ پرەمەر-ءمينيسترى ميحايل ميشۋستين, بەلارۋس پرەمەر-ءمينيسترى سەرگەي رۋماس, مولدوۆا پرەمەر-ءمينيسترى يون كيكۋ, قىرعىزستان پرەمەر-ءمينيسترى مۋحاممەدكالىي ابۋلگازيەۆ, ارمەنيا رەسپۋبليكاسىنىڭ پرەمەر-ءمينيسترى نيكول پاشينيان جانە ەۋرازيالىق ەكونوميكالىق كوميسسيا القاسىنىڭ توراعاسى تيگران ساركيسيان قاتىستى.
ادەتتەگىدەي, ۇكىمەتارالىق كەڭەس وتىرىسى شاعىن جانە كەڭەيتىلگەن قۇرامدا ءوتتى.
شاعىن قۇرامدا ەاەو اياسىنداعى ءوزارا ءىس-قيمىلدىڭ وزەكتى ماسەلەلەرى بويىنشا پىكىر الماسىلدى. ينتەگراتسيالىق بىرلەستىكتى نىعايتۋدى دامىتۋ ءۇشىن اسا ماڭىزدى ماسەلەلەردىڭ كەڭ اۋقىمى قارالدى. اتاپ ايتقاندا, ەاەو-عا مۇشە مەملەكەتتەردىڭ وداقتىڭ ىشكى نارىعىنىڭ جۇمىسى اياسىندا كەدەرگىلەردى جويۋ بويىنشا جۇمىس بارىسى قارالدى. سونىمەن قاتار ەۋرازيالىق ەكونوميكالىق وداق اياسىندا الكوگول نارىعىن رەتتەۋ تۋرالى كەلىسىم جوباسىنا قاتىستى جۇمىس بارىسى تۋرالى بايانداما تىڭدالدى.
كەڭەيتىلگەن فورماتتاعى وتىرىس ەۋرازيالىق ەكونوميكالىق وداقتىڭ تسيفرلىق كولىك دالىزدەرى ەكوجۇيەسىن قالىپتاستىرۋ ماسەلەلەرىنە ارنالدى. وتىرىسقا قاتىسۋشىلار ەۋرازيالىق ۇكىمەتارالىق وداقتىڭ كەيبىر شەشىمدەرىن تالقىلادى.
بارلىعى ەاەو مۇشە مەملەكەتتەردىڭ ساۋدا-ەكونوميكالىق ىنتىماقتاستىعىن دامىتۋعا باعىتتالعان 14 ماسەلە قارالدى.
كەڭەس وتىرىسىن اشقان قر پرەمەر-ءمينيسترى اسقار مامين 2019 جىلدىڭ ەاەو دامۋى ءۇشىن ماڭىزدى ءارى جەمىستى جىل بولعانىن اتاپ ءوتتى.
«بىرىنشىدەن, ءبىز ينتەگراتسيالىق بىرلەستىكتىڭ بەسجىلدىق مەرەيتويىن اتاپ وتتىك, الداعى بەسجىلدىق كەزەڭگە ينتەگراتسيالىق پروتسەستەردى دامىتۋدىڭ جاڭا كوكجيەكتەرى ءۇشىن نەگىز سالدىق, بىرقاتار ماڭىزدى قۇجاتتار قابىلداندى. ەاەو اعىمداعى جانە بۇدان ارعى دامۋى بويىنشا ءوزارا ءتيىمدى ۋاعدالاستىقتارعا قول جەتكىزىلدى. كەمە قاتىناسى تۋرالى كەلىسىمگە قول قويىلدى, ورتاق ەلەكتر ەنەرگەتيكالىق نارىقتى قۇرۋدىڭ قۇقىقتىق نەگىزى جاسالدى, ورتاق قارجى نارىعىن قۇرۋ تۇجىرىمداماسى بەكىتىلدى», — دەدى ا. مامين.
بەلارۋس پرەمەر-ءمينيسترى سەرگەي رۋماس 2020 جىلى 1 قاڭتاردان باستاپ ەاەو ورگاندارىندا توراعالىقتى قابىلداعان تاراپتىڭ وكىلى رەتىندە ەۋرازيالىق ينتەگراتسيانىڭ ودان ءارى جۇيەلى دامۋى ءۇشىن بارلىق كۇش-جىگەرىن سالۋعا نيەتتى.
«ەڭ الدىمەن, ءبىزدىڭ نازارىمىز كەدەرگىلەردى جويۋعا, ەاەو نارىقتارىنداعى شەكتەۋلەردى الىپ تاستاۋعا, سونداي-اق توسقاۋىلداردىڭ جاڭا تۇرلەرىنىڭ پايدا بولۋ مۇمكىندىگىنىڭ الدىن الۋعا اۋدارىلاتىن بولادى», — دەدى سەرگەي رۋماس.
بۇل ماقساتقا قول جەتكىزۋ قۇرالدارىنىڭ ءبىرى — ءبىرىنشى كەزەكتە تەحنيكالىق رەتتەۋ, سانيتاريالىق, ۆەتەريناريالىق جانە فيتوسانيتاريالىق شارالارىن قولدانۋ, مەملەكەتتىك ساتىپ الۋلاردى جۇزەگە اسىرۋ, سۋبسيديالار ۇسىنۋ ءتارىزدى سالالاردا ەەك-نىڭ ۇلتتىق ورگانداردان جوعارعى قۇزىرەتتەرىن كۇشەيتۋ.
ارمەنيا رەسپۋبليكاسىنىڭ پرەمەر-ءمينيسترى نيكول پاشينيان بەلارۋس ايقىنداعان ينتەگراتسيانىڭ باسىمدىقتى باعىتتارىنا قولداۋ ءبىلدىردى. ول ورتاق ەكونوميكالىق كەڭىستىكتى قالىپتاستىرۋعا بوگەت بولاتىن قالعان كەدەرگىلەردى جويۋدىڭ ماڭىزدىلىعىن اتاپ ايتتى, تاريفتەردە باعانى بەلگىلەۋ جانە تابيعي مونوپوليالار قىزمەتتەرىنە قولجەتىمدىلىك سالاسىندا كەمسىتىلمەيتىن تاسىلدەردى قامتاماسىز ەتۋمەن ەاەو نارىعىندا ەنەرگەتيكالىق جانە كولىك نارىعىن قالىپتاستىرۋعا باعىتتالعان كۇش-جىگەردى بەلسەندىرۋ قاجەتتىگىن ناقتىلادى.
«وداق ورگاندارىنىڭ جۇمىسىنىڭ تيىمدىلىگىن راتتىرۋ جانە كولىك-لوگيستيكا ينفراقۇرىلىمىن دامىتۋ – ءبىزدىڭ باستى نازارىمىزدا بولۋى ءتيىس تاعى ءبىر باعىت. ارمەنيا رەسپۋبليكاسى ادەتتە ەاەو تسيفرلىق كۇن ءتارتىبىن قۇرۋ جانە ىسكە اسىرۋ پروتسەستەرىنە بەلسەنە قاتىسادى جانە ولاردى قولدايدى. تسيفرلىق كولىك دالىزدەرى ەكوجۇيەسىن قالىپتاستىرۋ تاۋارلار مەن قىزمەتتەردى تۇتىنۋشىلار مەن ءوندىرۋشىنىڭ جانە ساتۋشىنىڭ اراسىنداعى ديستانتسيالاردى ازايتۋعا مۇمكىندىك بەرەدى دەپ سانايمىز. بۇل تاۋارلاردى جەتكىزۋ ۋاقىتىن جانە ونىڭ قوزعالىسىنىڭ وڭتايلى جولدارى مەن ادىستەرىن ىزدەۋگە جۇمسالاتىن ۋاقىتتى ءبىرشاما ازايتادى, وسىلايشا, بۇل تۇرعىدا نارىقتى ەداۋىر جەتىلدىرەدى», — دەدى ارمەنيا پرەمەر-ءمينيسترى.
قىرعىزستان پرەمەر-ءمينيسترى مۋحاممەدكالىي ابۋلگازيەۆ ءوز كەزەگىندە قىرعىز تاراپىنىڭ وداق اياسىنداعى تەڭدىك, سەنىم مەن ءوزارا ىنتىماقتاستىق نەگىزىندەگى ءىس-قيمىلدارىنا باسا ءمان بەرەتىنىن اتاپ ايتتى.
«ەاەو ەكونوميكالىق دامۋىنىڭ ورتاق ماقساتتارى مەن مىندەتتەرىن ايقىنداۋ نەگىزىندە ۇلتتىق مۇددەلەردى ەسكەرۋ, وعان مۇشە مەملەكەتتەردىڭ ەكونوميكالىق ءوسۋىنىڭ قوسىمشا كوزدەرىن قالىپتاستىرۋ پرينتسيپتەرى جاتۋى ءتيىس. قىرعىز رەسپۋبليكاسى وداقتى ودان ءارى دامىتۋ ماقساتىندا ىنتىماقتاستىقتى تەرەڭدەتۋگە جانە ينتەگراتسيالىق پروتسەستەردى جەتىلدىرۋگە ۇمتىلاتىن بولادى», — دەدى م. ابۋلگازيەۆ.
رف ۇكىمەتىنىڭ توراعاسى ميحايل ميشۋستين رەسەيدىڭ ەۋرازيالىق ينتەگراتسيانىڭ ديناميكاسىن ونىڭ قىزمەتىنىڭ بارلىق نەگىزگى باعىتتارى بويىنشا وڭ باعالاپ وتىرعانىن جەتكىزدى. سونىمەن قوسا, ۇلتتىق ورگاننان جوعارى تۇرعىدا رەتتەۋ تيىمدىرەك بولىپ كەلەدى.
«الدىمىزعا مىناداي ماقسات قويدىق – “بەستىك” ەلدەرىنىڭ ەكونوميكاسىنىڭ ءوسىمىن قامتاماسىز ەتۋ, سوندا وداقتا ءومىر سۇرەتىن ادامدار ورتاق كەڭىستىكتىڭ ارتىقشىلىقتارىن سەزىنىپ, تەڭ مۇمكىندىكتەردى پايدالانا الادى», — دەدى رەسەي ۇكىمەتىنىڭ باسشىسى.
2019 جىلدىڭ العاشقى ءۇش توقسانىندا وداقتىڭ جيىنتىق ءجىو 1,4%-عا ارتتى, اۋىل شارۋاشىلىعىندا ونەركاسىپ ءوسىمى 2,7% قۇرادى.
كەڭەيتىلگەن فورماتتاعى تالقىلاۋ سوڭىندا ۇكىمەتتەر باسشىلارى ەاەو مۇشە ەلدەردىڭ ينتەگراتسياسىن جالعاستىرۋعا باعىتتالعان بىرقاتار قۇجاتتارعا قول قويدى. بارلىعى 10 قۇجاتقا قول قويىلدى.
رف ۇكىمەتىنىڭ توراعاسى ميحايل ميشۋستين ەۋرازيالىق ەكونوميكالىق كوميسسيا (ەەك) القاسىنىڭ توراعاسى تيگران ساركيسيانعا ەاەو دامىتۋ مەن نىعايتۋداعى زور ۇلەسى ءۇشىن ءبىرىنشى دارەجەلى ستولىپين مەدالىن تابىستادى.
«ەەك القاسىنىڭ توراعاسى لاۋازىمىندا ءسىز ارىپتەستەرىڭىزبەن بىرگە ونىڭ قالىپتاسۋىنىڭ, ەۋرازيالىق ەكونوميكالىق وداقتىڭ قالىپتاسۋىنىڭ ەڭ كۇردەلى كەزەڭدەرىنەن وتتىڭىزدەر. سىزگە وسى اۋقىمدى جۇمىسىڭىز ءۇشىن العىس ايتقىم كەلەدى جانە وسى ساتتە پايدالانا وتىرىپ, بۇعان دەيىن ايتىپ كەتكەنىمدەي, ءسىزدى جۋىردا اتاپ وتكەن مەرەيتويىڭىزبەن قۇتتىقتاعىم كەلەدى. سىزگە دەنساۋلىق, زور تابىس تىلەيمىن. مۇنداعى قاتىسۋشىلاردىڭ بارلىعى بۇل تىلەگىمە قوسىلاتىنىنا سەنىمدىمىن», — دەدى م. ميشۋستين.
بەلارۋس رەسپۋبليكاسىنىڭ پرەمەر-ءمينيسترى س. رۋماس پەن ەۋرازيالىق ەكونوميكالىق كوميسسيا القاسىنىڭ توراعاسى تيگران ساركيسيان ءباسپاسوز كونفەرەنتسياسىندا كەلىسسوزدەردىڭ نەگىزگى ناتيجەلەرى تۋرالى حابارلادى.
ەاۇك كەلەسى وتىرىسى 2020 جىلى 9-10 ساۋىردە مينسك قالاسىندا وتەدى.
