مەملەكەتتىك دەڭگەيدە قولداۋ تاپقان جوبا اياسىندا وڭىردەگى ون اۋداننان پيلوتتىق جوباعا ەنگەن اۋىلداردىڭ تۇرعىندارى نەسيەگە مال الىپ, تىرلىگىن تىكتەۋدە. سونىمەن قاتار, ءاربىر تۇرعىن ءوز اۋلاسىنداعى جەرلەردى ءتيىمدى پايدالانۋ ارقىلى تۇراقتى ءونىم الۋعا قول جەتكىزىپ وتىر. ەندى اتالعان جوبا اياسىندا اۋىل تۇرعىندارىن قولداۋ ماقساتىندا بىرقاتار تەحنيكالار ساتىپ الىنعان بولاتىن. بۇگىن تاراز قالاسىنداعى «اتاكەنت-تاراز» ساۋدا ورتالىعىندا وڭىردە قۇرىلعان كووپەراتيۆتەرگە اۋىل شارۋاشىلىق تەحنيكالارىن سالتاناتتى تابىستاۋ ءراسىمى ءوتتى. وعان جامبىل وبلىسىنىڭ اكىمى اسقار مىرزاحمەتوۆ ارنايى قاتىسىپ, پيلوتتىق 11 وكرۋگتە قۇرىلعان كووپەراتيۆتەرگە 194 بىرلىك تەحنيكانى تابىستادى.
شارا بارىسىندا اسقار مىرزاحمەتوۆ قۇتتىقتاۋ ءسوز سويلەپ, الداعى ۋاقىتتا اتالعان پيلوتتىق جوبا وبلىس تۇرعىندارىنىڭ تابىسىن ارتتىرىپ قانا قويماي, ءوڭىردىڭ الەۋمەتتىك-ەكونوميكالىق دامۋىنا دا ءوز سەپتىگىن تيگىزەتىنىن اتاپ ءوتتى. سونىمەن قاتار, بۇل باستاماعا مەملەكەت باسشىسىنىڭ, ۇكىمەت باسشىسىنىڭ كوڭىل ءبولىپ وتىرعانىن, سوندىقتان دا ءاربىر ازامات بۇل باستاماعا ەرەكشە قىزىعۋشىلىق تانىتۋ كەرەكتىگىن ءارى جەمىستى بولۋىنا اتسالىسۋ قاجەتتىگىن جەتكىزدى. «جامبىل وڭىرىندە الەۋمەتتىك ماڭىزى زور جوبا باستالدى. بۇل جوبانىڭ ارتىقشىلىعى – حالىقتىڭ تۇرمىسىن جاقسارتۋعا كوڭىل ءبولۋ. جوبانى ىسكە اسىرۋدىڭ بىردەن-ءبىر ءتيىمدى تەتىگى – بۇل كووپەراتيۆ قۇرۋ. كووپەراتيۆتەرگە قاجەتتى تەحنيكالار الۋ ءۇشىن رەسپۋبليكالىق بيۋدجەتتەن 7,2 ميلليارد تەڭگە بولىنسە, وبلىستىق بيۋدجەتتەن 2 ميلليارد تەڭگە قاراستىرىلدى. جوبامىزدى پرەزيدەنت تە, ۇكىمەت تە قولدادى. ايتپەسە مۇنشا تەحنيكانى ساتىپ الۋ دەگەن وڭاي ەمەس. ەندى تۇرعىنداردىڭ تۇرمىسىن جاقسارتۋ ماقساتىندا 40 مىڭعا جۋىق مال باسى مەن قۇس ساتىپ الىنادى. بۇل تەك قانا ءىستىڭ باستاماسى», دەدى اكىم. سونىمەن قاتار, اسقار مىرزاحمەتوۆ تۇرعىنداردىڭ تۇرمىسىن جاقسارتۋ جۇمىستارىن باستاۋ ءۇشىن ازىرگە كووپەراتيۆتەردىڭ ەت پەن ءسۇت باعىتىن الىپ وتىرعانىن, ەندىگى ماقسات الىنعان ونىمدەردى وڭدەيتىن شاعىن تسەحتار قۇرۋ ەكەنىن دە اتاپ ءوتتى. اتالعان جوبانىڭ ءتورتىنشى باعىتى – قۇرىلعان اۋىل شارۋاشىلىعى كووپەراتيۆتەرىن قاجەتتى تەحنيكالارمەن قامتاماسىز ەتۋ بولاتىن. بۇل باعىتقا 1 070,9 ميلليون تەڭگە قاراستىرىلىپ, ول قارجىعا كووپەراتيۆتەرگە قاجەتتى اۋىل شارۋاشىلىعى تەحنيكالارىنىڭ 29 تۇرىنەن 194 دانا تەحنيكا الىنعان ەدى. ونىڭ ىشىندە 33 تراكتور, 11 كومباين, 3 كاماز كولىگى جانە تاعى باسقا 149 دانا اگروسالاعا قاجەتتى تەحنيكالار بار.
«اتاكەنت-تاراز» ساۋدا كەشەنىندە وتكەن جيىندا بايزاق اۋدانى, قوستوبە اۋىلىنداعى «قوستوبە-2019» كووپەراتيۆىنە 14 دانا, تۇيمەكەنت اۋىلىنداعى «تۇيمەكەنت-2019» كووپەراتيۆىنە 18 دانا, جامبىل اۋدانى, بەساعاش اۋىلىنداعى «ىسكە ءسات» كووپەراتيۆىنە 22 دانا, جۋالى اۋدانى, بايتەرەك اۋىلىنداعى «اتامەكەن باستاۋ» كووپەراتيۆىنە 19 دانا, قورداي اۋدانى, جاڭاتۇرمىس اۋىلىنداعى «جاڭاتۇرمىس-بىرلىك» كووپەراتيۆىنە 19 دانا, مەركى اۋدانى, سۇرات اۋىلىنداعى «سۇرات دامۋ» كووپەراتيۆىنە 19 دانا, مويىنقۇم اۋدانى, ايدارلى اۋىلىنداعى «ايدارلى اگرو-2019» كووپەراتيۆىنە 13 دانا, سارىسۋ اۋدانى, ساۋداكەنت اۋىلىنداعى «ساۋداكەنت 2019» كووپەراتيۆىنە 20 دانا, تالاس اۋدانى, ءۇشارال اۋىلىنداعى «تالاس-2020» كووپەراتيۆىنە 18 دانا, ت.رىسقۇلوۆ اۋدانى, قۇمارىق اۋىلىنداعى «قۇمارىق-تاۋ» كووپەراتيۆىنە 17 دانا, شۋ اۋدانى, جاڭاقوعام اۋىلىنداعى «ومار-شۋ» كووپەراتيۆىنە 15 دانا تەحنيكا بەرىلدى. بۇل جاڭا تەحنيكالار بەلارۋس, ۋكراينا, تۇركيا, رەسەي, پولشا جانە ءوزىمىزدىڭ وتاندىق زاۋىتتاردان شىققان. تالاس اۋدانى, ءۇشارال اۋىلىنان قۇرىلعان «تالاس-2020» اۋىل شارۋاشىلىعى كووپەراتيۆىنىڭ توراعاسى راحىمجان ادەنوۆ مەملەكەتتىڭ, وبلىستىڭ بۇل قامقورلىعىنا ءوز ريزاشىلىعىن بىلدىرسە, ت.رىسقۇلوۆ اۋدانى, قۇمارىق اۋىلىنان قۇرىلعان «قۇمارىق-تاۋ» اۋىل شارۋاشىلىعى كووپەراتيۆىنىڭ توراعاسى ەركىن سارسەباەۆ بۇل باستامانىڭ بارلىق تۇرعىندارعا بەرىلىپ وتىرعان ۇلكەن مۇمكىندىك ەكەندىگىن, ەندى تەك قانا ايانباي جۇمىس ىستەۋ قاجەتتىگىن جەتكىزدى.
تابىستالعان اۋىل شارۋاشىلىعى تەحنيكالارى «تاراز» الەۋمەتتىك كاسىپكەرلىك كورپوراتسياسى ارقىلى 5 پايىزبەن قوسىمشا كەپىلسىز ليزينگكە بەرىلىپ وتىر. الداعى ۋاقىتتا وسى تەحنيكالاردىڭ كۇشىمەن بارلىق ءۇي ىرگەسىندەگى 1071,7 گەكتار جانە اۋىل سىرتىنداعى 77362 گەكتار جەرلەر يگەرىلەتىن بولادى. وبلىستىڭ 10 اۋدانىنان پيلوتتىق جوباعا ەنگەن 11 اۋىلدىڭ وزىندە 50 مىڭ ادام تۇراتىنىن ەسكەرسەك, بۇل تۇرعىنداردىڭ تۇرمىسىن جاقسارتۋعا ەلەۋلى كومەك. سوندىقتان دا اسقار مىرزاحمەتوۆ ءوز سوزىندە اتالعان جوبا جەمىسىن بەرگەن كەزدە بۇل باستامانىڭ ءوڭىردىڭ بارلىق اۋىلدارىنا تاراتىلاتىنىن ايتتى.
جامبىل وبلىسى
