قازاقستان قۇراماسىنىڭ باس باپكەرى ريكاردو كاكا, كوماندا كاپيتانى دىنمۇحامبەت سۇلەيمەنوۆ, قاقپاشى يگيتا جانە قازاقستان فۋتبول فەدەراتسياسى فۋتزال دەپارتامەنتىنىڭ ديرەكتورى اسقار ابىلداەۆ باسەكە قارساڭىنداعى دايىندىق جۇمىستارى تۋرالى ايتتى.
فۋتزالشىلاردىڭ دايىندىعىن پىسىقتاي كەلە ريكاردو كاكا ماقسات - توپتا ءبىرىنشى ورىنمەن اقتىق سىنعا جولداما الۋ ەكەنىن جەتكىزدى.
«قۇرامانىڭ جاقسى دايىندالۋى ءۇشىن فەدەراتسيا باسشىلىعى بارلىق جاعدايدى جاسادى. تەك اۋا-رايىنىڭ قولايسىزدىعىنا بايلانىستى جوسپاردان ءسال كەشىگىپ كەلەمىز. دەگەنمەن الداعى كۇندەرى ۇلگەرەتىنىمىز انىق. قارسىلاستاردىڭ ويىن مانەرىن جان-جاقتى زەرتتەۋگە تىرىستىق. ماقسات-بىرەۋ. توپتان شىعىپ, جۇلدەگە تالاسۋ»,-دەدى باس باپكەر.
ال كوماندا كاپيتانى دىنمۇحامبەت سۇلەيمەنوۆ بارلىق ويىنشىلاردىڭ باسەكەگە دايىن ەكەندىكتەرىن ايتتى.
«چەحياداعى ۋاقىت بەلدەۋىنە بەيىمدەلۋ ءۇشىن تۇندە دە جاتتىعۋ جاساپ جاتىرمىز. سوندىقتان بۇل تۇرعىدان ەشقانداي قيىندىق بولماۋى ءتيىس»,-دەدى ول.
ۇلتتىق قۇراما 23-31 قاڭتار ارالىعىندا نۇر-سۇلتاندا وقۋ-جاتتىعۋ جيىنىن وتكىزىپ, چەحيانىڭ برنو قالاسىنا اتتانادى.
D توبىنا تۇسكەن قازاقستان قۇراماسى 2 اقپاندا رۋمىنيا, 3 اقپاندا سلوۆەنيا, 5-ءى كۇنى چەحيامەن وينايدى.
جالپى ەليتالىق كەزەڭدە 4 توپقا بولىنگەن 16 قۇراما جولداماعا تالاسادى. سونىمەن قاتار, توپتا ەكىنشى ورىن العان قۇرامالار وتپەلى ويىندار وتكىزىپ, تاعى 2 كوماندا فينالدىق كەزەڭگە وتەدى. ال فۋتزالدان IX الەم چەمپيوناتىنىڭ فينالدىق كەزەڭىن 12 قىركۇيەك پەن 4 قازان ارالىعىندا ليتۆا قابىلدايدى.
