سول كەزدە بۇگىن پاريجدە كورسەتىلىپ جاتقان كينونىڭ جوباسى قازاقستاندىق جۋرناليستەر نازارىنا ۇسىنىلعان. كينو-جوبانى دايىنداۋشى شىعارماشىلىق توپتىڭ اللانىڭ قوبىز ءۇنىنىڭ سۇيەمەلدەۋىمەن اپپاق كەڭىستىككە – بولاشاقا بەتتەپ بارا جاتۋىمەن اياقتاۋ تۋرالى ۇسىنىسىن الماتىلىق جۋرناليستەر ىقىلاسپەن قابىلداعانبىز.
بۇگىن ول اياقتالىپ, پاريجدىك تالعامپاز كورەرمەننىڭ نازارىنا ۇسىنىلعانى جايلى حابار ەسىتتىك.
اپتا باسىندا پاريجدە دۇنيەجۇزىلىك ءسان اڭىزى كريستيان ديوردىڭ ميۋزيكلى, قازاق اللا ەلشىنگە ارنالعان العاشقى ءفيلمنىڭ جابىق پرەمەراسى ءوتتى. بۇل تۋرالى حابار24 ءتىلشىسى حابارلادى. ءسان ساراپشىلارى مەن فرانتسياداعى قازاقستاندىقتار قاۋىمداستىعىنىڭ مۇشەلەرى ءبىزدىڭ ەلشىلىك عيماراتىندا العاشقى كورسەتىلىمگە جينالدى. ءدال وسى ۇيىم ءوز قاراجاتى ەسەبىنەن اللا تۋرالى فيلم ءتۇسىردى.
ءبىر جارىم جىل ىشىندە بەلسەندىلەر مۇراعاتتا مودەلدىڭ ءومىرى تۋرالى اقپاراتتار جينادى, اللا ەلشىندى بىلگەن ادامدارمەن كەزدەستى. ەگەر بۇرىن مودەلدەر مانچجۋ تامىرىنا بايلانىستى بولسا, وندا ونىڭ ءومىرىنىڭ نەگىزگى زەرتتەۋشىسى بەرلين يريشەۆ ديور جۇلدىزىنىڭ ەتنيكالىق قازاق ەكەنىن دالەلدەي الدى. كورەرمەندەر نازارىنا ۇسىنىلعان كينو-كارتينادا اللاعا قاتىستى كوپتەگەن دەرەكتى فاكتى العاش رەت ۇسىنىلعان. 52 مينۋتتىق فيلم كەيىن فرانتسيادا دا, قازاقستاندا دا كوپشىلىككە كورسەتىلەدى.
اڭىزعا اينالعان قازاق ايەلىنىڭ دەرەكتى ءومىربايانى سونشالىقتى ۇلكەن قىزىعۋشىلىق تۋدىردى, ونىڭ اۆتورلارى اللا ەلشىن تۋرالى كوركەم فيلم جاساۋدى ويلادى. جوعارى ءسان مامانى دجۋليا گايون جۋرناليستەرمەن كەزدەسكەن كەزدە فرانتسيادا تۇراتىن ادامدار ونى ديوردىڭ ءسان سيقىرشىسى رەتىندە تانيتىنىن, قۇرمەتىنىڭ ەرەكشە ەكەنىن ايتىپتى. «اللا تاعدىرى تۋرالى جاسالعان زەرتتەۋ جۇمىسىنىڭ ساپاسى تاڭعالدىرادى» دەيدى ول.
اللا ەلشىن تەك سۇلۋ, سىمباتتى مانەكەنشى عانا ەمەس, ول جەكە كوزقاراسى قالىپتاسقان تۇلعا, تالعامى بيىك ايەل بولعانىن زامانداستارى كۇنى بۇگىنگە دەيىن ايتىپ كەلدى.
سۇحباتتاردىڭ بىرىندە نيۋ-يورك جانە ءپاريجدىڭ تۇنگى ساۋىق-ورىندارىن سالىستىرا وتىرىپ, بىلاي دەپ سيپاتتايدى: «لاتىن كۆارتالىنىڭ» قوناقتارىنا قايران قالامىن. مۇنداي كيىمدەرمەن مەن ەشقايدا ۇيدەن اتتاپ باسپاس ەدىم, بۇدان دا جالاڭاش جۇرگەن ارتىق. پاريجدەگى Folies Bergere قوناقتارى دا پۋريتاندىعىمەن ەرەكشەلەنبەيدى. الايدا ولار جالاڭاشتانۋدى اشىق ءارى ەكىجۇزدىلىكسىز ناسيحاتتايدى».
اللانىڭ ءوزى پوديۋمداردا دەكولتە مەن قىسقا يۋبكالاردى كيۋدەن قىسىلعان ەمەس. يۆ-سەن لوراننىڭ اشىق كوللەكتسيالارىن دا تالاي كورسەتكەن. الايدا ومىردە ول ۇستامدى ءستيلدى ۇناتاتىن ەدى. 1957 جىلى Lubbock Avalanche باسىلىمىنا بەرگەن سۇحباتىندا بىلاي دەپتى: «مەن ءوزىمدى سۆيتەر, كەڭ شالبار مەن يۋبكا كيىپ جۇرگەندە جاقسى سەزىنەمىن. كەشكىلىك جولداسىم ەكەۋمىز ءبىر جاققا شىققاندا مەن قارا ءتۇستى كيىمدى جانە ومىراۋى جابىق كيىمدەر تاڭدايمىن».
ءپاريجدىڭ, سودان سوڭ الەمنىڭ سانقوي بيكەشتەرى اللادان كەيىن كوزىن قيعاش ەتىپ بوياي باستاعانىن پاريجدە شىققان باسىلىمداردىڭ ءبارى جاريالاعان كەزىندە. قيعاش قاس پەن قارا قولاڭ شاش سول كەزدە ءسان الەمى ءۇشىن ترەندكە اينالىپتى. اللا ديور كوللەكتسياسىمەن الەمنىڭ تۇكپىر-تۇكپىرىن ارالادى. ول مودەل مانسابىن 1967 جىلى اياقتادى. دەگەنمەن سوڭعى رەت مودەل 1987 دىلى ديور ءۇيىنىڭ 40 جىلدىق مەرەيتويىنا وراي پوديۋمعا شىعىپتى. بەرلين يريشەۆتىڭ «مۋزا Dior. يستوريا اللى يلچۋن» كىتابىندا الەمگە تانىلعان مودەلدىڭ ءومىر دەرەكتەرى, سيرەك سۋرەتتەرى, ول تۋرالى ەستەلىكتەر جيناقتالعان.
اۆتوردىڭ ايتۋى بويىنشا, كىتاپتى جازۋ بارىسىندا ءتۇرلى ميستيكاعا تولى وقيعالار بولعان. كينو جەلىسى دە ب. يريشەۆ جازعان كىتاپ بويىنشا تۇسىرىلگەن.
بەرلين يريشەۆ كەشە الەۋمەتتىك جەلىدەگى پاراقشاسىندا اللا تۋرالى كينو-كارتينانىڭ تولىق نۇسقاسى قازاقستاندا قاشان كورسەتىلەتىنى جايلى قوسىمشا حابارلايتىنىن ايتىپتى.
دەمەك, قازاقستانعا ءسان الەمىنىڭ پاديشاسى اللا تۋرالى جاڭا تۋىندى كەلە جاتىر دەپ ايتۋعا بولادى.
الماتى
