«اقتاۋ اگرو» جشس-نىڭ تۇپقاراعان اۋدانىنىڭ 43 كم ايماعىنان 120 ادامدى جۇمىسپەن قامتيتىن قۇس فابريكاسى اشىلادى دەپ جوسپارلانۋدا. قۇنى 4 ملرد تەڭگەنى قۇرايتىن جوبادان جىلىنا 5 مىڭ توننا ءونىم الىنباق. بۇگىنگى تاڭدا قۇرىلىس جۇمىستارى اياقتالىپ, يران, تۇرىك, قىتاي ەلىنەن اكەلىنگەن قۇرال-جابدىقتارىن ورنالاستىرۋ جۇمىستارى جۇرگىزىلۋدە. 4 شاعىن زاۋىتتان تۇراتىن قۇس فابريكاسىنا مەملەكەت تاراپىنان ينفروقۇرىلىم جاسالعان. ال, اتالعان قۇس فابريكاسىنا مۇنايلى اۋدانىنان ىسكە قوسىلاتىن تۇيىرشىكتەلگەن قۇراما جەم ءوندىرۋ فابريكاسى ءونىم دايىندايتىن بولادى. بۇدان بولەك وسى جىلدىڭ اقپان ايىندا «ماڭعىستاۋ قۇس» جشس مۇنايلى اۋدانىندا قۇنى 5 ملرد تەڭگەنى قۇرايتىن جۇمىرتقا وندىرەتىن زاۋىتتىڭ قۇرىلىسىن باستاماقشى.
- وڭىردە سۋ تاپشىلىعىنا بايلانىستى جىلىجاي كەشەندەرىن ىسكە قوسۋ ونىمدىلىگى جوعارى بولىپ وتىر. وسىعان وراي, وبلىس كولەمىندە بۇگىندە 27 گا جىلىجاي بولسا, ولاردى تاعى دا كوبەيتۋ ءۇشىن ءار قالا اۋداننان كەمىندە ءبىر گا جىلىجاي قوسۋ ءۇشىن جۇمىستار اتقارىلۋدا. مەملەكەت تاراپىنان بەرىلەتىن كومەكتى ءتيىمدى پايدالانىپ, جۇمىس ىستەيمىن دەگەن ازاماتتار بولسا, سىرتتان كەلەتىن ءونىم ازايار ەدى, - دەدى ماڭعىستاۋ وبلىسى اۋىل شارۋاشىلىعى باسقارماسىنىڭ باسشىسى سەرىك قالدىعۇل.
2019 جىلدىڭ قورىتىندىسى بويىنشا اۋىل, ورمان جانە بالىق شارۋاشىلىعى سەكتورىندا 20, 4 ملرد تەڭگەنىڭ ءونىمى ءوندىرىلىپ, سالانىڭ ناقتى كولەم يندەكسىنىڭ 105,6 پايىزىن قۇرادى. بۇگىنگى تاڭدا وبلىسىمىزدا مال شارۋاشىلىعىندا 1444 شارۋا قوجالىق جۇمىس ىستەيدى. 2019 جىلى 37 بريگادا ارقىلى 55,0 مىڭ توننا ءشوپ دايىندالعان. 2014 جىلدان بەرى وبلىس بويىنشا شارۋا قوجالىقتارىنا 300 قۇدىق قازىلعان. بۇگىندە ءىرى-قارا مال باس سانى كوبەيىپ كەلەدى. وعان دالەل, وبلىسقا بىلتىر رەسپۋبليكا قارجىسىنان بولىنگەن 6 پايىزبەن بەرىلگەن 1 ملرد. 530 ملن. تەڭگە 100 پايىز يگەرىلگەن. «سىباعا» باعدارلاماسى اياسىندا مال باس سانىن كوبەيتۋگە 12 ملن-عا دەيىن قاراجات بەرىلەتىن بولادى. «قاراعان تۇبەك» جشس ءسۇتتى باعىتتا الماتى, شىمكەنت وبلىستارىنان 150 ارۋانا تۇيەسىن اكەلىپ, حالىق يگىلىگىنە قىزمەت ەتىپ جاتىر. «قاراپايىم زاتتار ەكونوميكاسى» باعدارلاماسى اياسىندا ءتورت ت ۇلىك مال باسىن كوبەيتۋ شارالارى جۇرگىزىلۋدە.
