ەلىمىزدىڭ 8 وڭىرىنەن – الماتى, اقمولا, اتىراۋ, باتىس قازاقستان, جامبىل, ماڭعىستاۋ, پاۆلودار وبلىستارىنان جانە نۇر-سۇلتان قالاسىنىڭ اتىنان بايقاۋعا قاتىسقان قۇسبەگىلەر سايىسقا 14 بۇركىت, 8 قارجىعا جانە 8 يتەلگى الىپ كەلگەن ەكەن. قۇسبەگىلەردىڭ كيىم ۇلگىسىنەن باستاپ قىرانداردىڭ بابى, يەسىن قاپىسىز تىڭداۋى, تاپسىرمالاردى مۇلتىكسىز ورىنداۋى سىنعا ءتۇستى.
بۇركىتشىلەر سايىسىندا نۇر-سۇلتان قالاسىنان كەلگەن سەرىكبەك كۇنتۋعاننىڭ «العىرى» بارلىق سىندا ۇزدىك بولدى. قۇستى قولعا شاقىرۋ, ەركىن ۇشىرۋ, شىرعاعا سالۋ, قويانعا سالۋ سىناقتارىندا تاڭداي قاقتىردى. مۇمكىن بولعان 50 ۇپايدى تۇگەل ولجالادى.
ەكىنشى ورىنعا الماتى وبلىسىنان كەلگەن عابيت تاڭاتوۆتىڭ «وتكىرى» شىقتى. ماڭعىستاۋلىق ايشۋاق تايمانوۆتىڭ «اقبالاعى» قويانعا قۇيىلىپ تۇسكەنىمەن, شىرعاعا سالۋ كەزىندە ءسال اعاتتىق جىبەرگەن. وعان جۇلدەلى ءۇشىنشى ورىن بۇيىردى.
قارشىعا قۇستار سايىسىندا الماتى وبلىسىنان كەلگەن ساعىنىش باەتبايدىڭ «كوكجەندەتى» ءبىرىنشى ورىندى ءىلىپ ءتۇستى. نۇرسۇلتاندىق ەراسىل سەرىكبەك ۇلىنىڭ «چيپوگى» مەن باتىسقازاقستاندىق مۇراتبەك بالتابەكوۆتىڭ «ۇشقىرى» كەپتەرگە سالۋ سىناعىندا باس جۇلدەگەرمەن تەڭ ۇپاي جيناعانىمەن, قازىلار القاسىنىڭ شەشىمىمەن ەكىنشى-ءۇشىنشى ورىنداردى ءوزارا ءبولىستى.
يتەلگى قۇستار اراسىندا وتكەن سىناقتا الماتى وبلىسىنان كەلگەن قۋانىش يسابەكوۆتىڭ «جۇلدىزبەگى» ەڭ كوپ 32 ۇپاي جينادى. ەكىنشى ورىندى اتىراۋدان كەلگەن «سومبالاق» (قۇس يەسى ارمان قوشقاروۆ) يەلەنسە, ءۇشىنشى جۇلدە ماڭعىستاۋلىق ايشۋاق تايمانوۆتىڭ «اقبالاعىنا» بۇيىردى. بايقاعانىڭىزداي, ماڭعىستاۋلىق قۇسبەگى باپتاعان قىراندار ەكى سايىستا جۇلدە الدى.
«جايىق قىرانى-2020» قۇسبەگىلەر سايىسى باتىس قازاقستان وبلىسىنىڭ تەرەكتى اۋدانىندا ءوتتى. رەسپۋبليكالىق ءتۋرنيردىڭ ءوز دارەجەسىندە وتۋىنە تەرەكتى اۋدانى مەن ءسارىومىر اۋىلدىق اكىمدىگى بارىنشا قولداۋ كورسەتتى. سونىمەن بىرگە وسى ىسكە العاشقى كۇننەن-اق بەلسەنە اتسالىسىپ, ۇيىمداستىرۋ شارالارىن جۇرگىزگەن ۆولونتەر, بەلگىلى ولكەتانۋشى, «TourWestKaz» اگەنتتىگىنىڭ جەتەكشىسى ايبولات قۇرىمباەۆتىڭ ەڭبەگىن ەرەكشە ايتىپ وتسە بولادى. ول الەۋمەتتىك جەلى ارقىلى باستاما كوتەرىپ, تۋرنير جەڭىمپازدارىنا ارنالعان جۇلدە قورىنىڭ قارجىسىن جيناپ بەردى.
