ايماقتار • 24 قاڭتار، 2020

حالىق قالاۋلىلارى جامبىل جاستارىمەن جۇزدەستى

113 رەتكورسەتىلدى

تاراز قالاسىنداعى «شەرحانتانۋ» رۋحاني-مادەني ورتالىعىندا قازاقستان رەسپۋبليكاسى پارلامەنتى ءماجىلىسى الەۋمەتتىك-مادەني دامۋ كوميتەتىنىڭ كوشپەلى وتىرىسى ءوتتى. اتالعان جيىنعا پارلامەنت ءماجىلىسى الەۋمەتتىك-مادەني دامۋ كوميتەتىنىڭ ءتورايىمى گۇلشارا ابدىحالىقوۆا جانە ءابدىماناپ بەكتۇرعانوۆ، باقىتبەك سماعۇل، جامبىل احمەتبەكوۆ، نۇرلان ءالىمجانوۆ جانە دە بىرقاتار ءماجىلىس دەپۋتاتتارى قاتىستى. «جاستار جىلىنىڭ» قورىتىندىسىنا ارنالعان جيىندى گۇلشارا ابدىحالىقوۆا اشىپ، جۇرگىزىپ وتىردى.

گۇلشارا ابدىحالىقوۆا ءوز سوزىندە مەملەكەت تاراپىنان جاستارعا ءتيىستى قامقورلىق جاسالىپ وتىرعانىن باسا ايتتى. «جاستار جىلىنىڭ» جابىلۋ سالتاناتىندا مەملەكەت باسشىسى قاسىم-جومارت توقاەۆ جاستاردى قولداۋ جانە ولاردىڭ ماسەلەلەرىن شەشۋ ماقساتىندا ۇكىمەتكە بىرىڭعاي كەشەندى باعدارلامالار قۇرۋدى تاپسىردى. اتالعان تاپسىرما بويىنشا ۇكىمەت جۇمىس اتقارۋدا. جالپى، ەلىمىزدە جاستاردىڭ جۇمىسىن ۇيلەستىرۋ ماقساتىندا 208 جاستار ورتالىقتارى قۇرىلعان. ەلىمىزدە 500-دەن استام ۇكىمەتتىك ەمەس ۇيىمدار جۇمىس ىستەيدى. وتكەن جىلى مەملەكەتتىك ورگاندار ۇلكەن جۇمىستار اتقاردى. «ەڭبەك» مەملەكەتتىك باعدارلاماسى تابىستى ىسكە اسىرىلۋدا»، دەدى گۇلشارا ابدىحالىقوۆا. سونىمەن قاتار گۇلشارا ناۋشاقىزى جاستاردىڭ كاسىپتىك باستامالارىن قولداۋ، ولاردىڭ تۇرعىن ءۇي ماسەلەسىن شەشۋ، جاستاردىڭ بوس ۋاقىتىن ءتيىمدى پايدالانۋدى ۇيىمداستىرۋ ماسەلەلەرىنە دە توقتالدى. سونداي-اق ەلىمىزدە ەشبىر ساناتتا جوق NEET جاستارعا ءتيىستى كوڭىل بولىنبەي وتىرعانىن، ولارعا ءبىلىم بەرۋ، جاستاردى قوعامدىق جۇمىسقا تارتۋ ماسەلەلەرى ءالى دە وزەكتى ەكەنىن جەتكىزدى. ال، ەلىمىزدىڭ ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ەرجان جىلقىباەۆ ءوز سوزىندە جاستاردى قولداۋعا مەملەكەت تاراپىنان ۇلكەن باسىمدىق بەرىلگەنىن، جاستاردىڭ ءتۇرلى ماسەلەلەرىن جۇيەلى شەشۋگە بەتبۇرىس بار ەكەنىن اتاپ ءوتتى. «ەلىمىزدە 3 ميلليون 800 مىڭنان استام جاستار بار. NEET جاستاردىڭ سانى 7،3 پايىزعا جەتكەن. وتكەن جىلى ەلىمىزدە جاس كاسىپكەر، جاس مامان جوباسى قولعا الىندى. ناتيجەسىندە 26 مىڭنان استام ادام قايتارىمسىز نەسيە الىپ، ءوز كاسىبىن جۇرگىزۋدە. الداعى 5 جىلدا 2 ميلليونعا جۋىق جاستىڭ ەڭبەك نارىعىنا شىعۋى جوسپارلانعان» دەدى ەرجان جىلقىباەۆ.

جيىن بارىسىندا جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ جاستار ماسەلەسىنە باعىتتالعان جۇمىستاردىڭ قورىتىندىسىن باياندادى. ء«بىزدىڭ وڭىردە 239 151 جاس بار. جاستار جالپى وبلىس حالقىنىڭ 21،2 پايىزىن قۇرايدى. جالپى، جۇمىسسىز ازاماتتاردى، سونىڭ ىشىندە جاستاردى جۇمىسپەن قامتۋ شارالارى مەملەكەتتىك «ەڭبەك» باعدارلاماسى اياسىندا جۇزەگە اسىرىلىپ كەلەدى. وتكەن جىلى وسى باعدارلاما اياسىندا 14،4 ميلليارد تەڭگە قارجى ءبولىنىپ، جۇمىسپەن قامتۋدىڭ بەلسەندى شارالارىمەن بارلىعى 48 523 ادام قامتىلدى. باعدارلاماعا قاتىسقان ازاماتتاردىڭ 21 652-ءسى نەمەسە 44،6 پايىزى 29 جاسقا دەيىنگى جاستار قاتارىنان قامتىلدى. بارلىعى 33451 ادام جۇمىسقا ورنالاستىرىلدى»، دەدى بەكبولات ورىنبەكوۆ. سونداي-اق ول مەملەكەتتىك «ەڭبەك» باعدارلاماسىنىڭ ءۇش باعىتىنا دا توقتالىپ، بۇل ورايدا جاستاردىڭ كوپتەگەن ماسەلەلەرىنىڭ شەشىلگەنىن جەتكىزدى.

ءوز سوزىندە كاسىپكەر ديلافرۋز ماحمادۋلوەۆا مۇمكىندىگى شەكتەۋلى جانداردى جۇمىسپەن قامتىپ وتىرعانىن جەتكىزسە، تاراز سەرۆيس جانە تەحنولوگيا كوللەدجىنىڭ ديرەكتورى بەكبول مايمىشەۆ اتالعان وقۋ ورنىن وتكەن جىلى 166 جاس بىتىرگەنىن، ونىڭ بۇگىندە 95 پايىزىنىڭ جۇمىسقا ورنالاسقانىن ايتتى. ال، شوحيستا مۋحامەدجانوۆا بولسا جاستارعا بۇگىندە مەملەكەت تاراپىنان كورسەتىلىپ وتىرعان قولداۋدىڭ ناتيجەسىندە ءوزىنىڭ جەكە كاسىبىن اشقانىن اتاپ ءوتتى. جيىندا حالىق قالاۋلىلارى جامبىلدىق جاستارمەن ءوزارا پىكىرلەسىپ، جاستارعا ارنالعان ءتۇرلى باعدارلامالاردىڭ تيىمدىلىگىن تالقىلادى. جيىندى جۇرگىزىپ وتىرعان گۇلشارا ابدىحالىقوۆا بۇگىندە كوپ جاستاردىڭ ءالى دە جالقاۋلىقتان ارىلا الماي وتىرعانىن، قايتا ءوز كاسىبىن اشىپ جاتقان مۇمكىندىگى شەكتەۋلى جانداردىڭ ولارعا ۇلگى بولۋ كەرەكتىگىن ايتتى.

سوڭعى جاڭالىقتار

بەتپەردە كيگەن كوكتەم - 7

قوعام • بۇگىن، 16:07

Samsung تاعى نە پاتەنتتەدى؟

تەحنولوگيا • بۇگىن، 15:23

تاسقىنعا – توسقىن

ايماقتار • بۇگىن، 13:25

قايىقشى اتانىڭ حيكاياسى

رۋحانيات • بۇگىن، 12:39

ۇقساس جاڭالىقتار