ايماقتار • 24 قاڭتار، 2020

الماتى وبلىسىندا بەتىمەن كەتكەن بالا كوبەيدى

111 رەتكورسەتىلدى

الماتى وبلىسىندا مەكتەپ وقۋشىلارىنىڭ ەسكەرتۋسىز ۇيدەن كەتىپ قالۋ وقيعاسى جيىلەپ كەتتى. وكىنىشتىسى، سوڭعى ءبىر اي اراسىندا ايماقتىڭ ءتارتىپ ساقشىلارى مەن ەرىكتىلەرى جاسوسپىرىمدەردىڭ ءىز-ءتۇزسىز جوعالۋىنا قاتىستى 3 رەت ىزدەۋ جۇمىسىن جۇرگىزدى.

ماسەلەن، وتكەن جىلدىڭ 21 جەلتوقسانى كۇنى ەڭبەكشىقازاق اۋدانىنىڭ پوليتسياسى 16 جاسار وقۋشى قىزدى تاباندارىنان تاۋسىلىپ ىزدەپ، 4 كۇن ابىگەرگە تۇسكەن بولاتىن. ىزدەۋ جۇمىسىنا الماتى قالاسىنىڭ ءتارتىپ ساقشىلارى مەن ەرىكتىلەر تارتىلىپ، گۇلجان ەسىمدى قىز بالا قالا ورتالىعىنداعى اربات دەمالىس اۋماعىنان تابىلعان ەدى. وقۋشى قىز ۇيدەن كەتۋ قالۋ سەبەبىن تۇسىندىرە الماعان ەكەن. جالپى، وسى ەڭبەكشىقازاق اۋدانىندا ادام جوعالۋ دەرەگى ءجيى تىركەلىپ وتىر. بىلتىر 30 ادامعا ىزدەۋ جاريالانسا، ونىڭ ۇشەۋى كامەلەتكە تولماعان بالا.

سونداي-اق قاڭتار ايىنىڭ ون ەكىسىندە قاراتال اۋدانىنىڭ ءتارتىپ ساقشىلارىنا ەكى بالانىڭ ءىز-ءتۇسسىز جوعالعانى تۋرالى دابىل تۇسكەن. ورتاتوبە اۋىلىندا تۇراتىن لۋنيندەر وتباسىنىڭ 2004 جىلعى ەليزاۆەتا جانە 2006 جىلى تۋعان ۆيتالي ەسىمدى ۇل-قىزى ۇيدەن شىعىپ كەتكەننەن ورالماپتى. پوليتسيا كۇنى بويى اينالانى شولىپ، وقۋشىلار بارۋى مۇمكىن باعىتتاردىڭ ءبارىن تەكسەرگەن. قۋانىشقا قاراي، اعايىندىلار باسقا اۋىلداعى تۋىسقاندارىنىڭ ۇيىنە بارا جاتقان جولدا اداسىپ، كەرى قايتقان ەكەن. پوليتسيا ولاردى اتا-اناسىنىڭ قولىنا تاپسىردى.

ال كۇنى كەشە عانا ەسكەلدى اۋدانىنىڭ نۇرمولدا الدابەرگەنوۆ اۋىلى، ماتاي بايىسوۆ اتىنداعى ورتا مەكتەپتىڭ 8 جانە 6 سىنىبىندا وقيتىن 2 قىز جوعالىپ،  ءبىر تاۋلىكتەن كەيىن الماتى قالاسىنداعى «سايران» اۆتوبەكەتىنىڭ ماڭىنداعى پاتەردەن تابىلدى. وقۋشىلار ۇيدەن كەتىپ قالۋ ارەكەتىن «قالا ارالاپ قايتپاق» بولعاندارىمەن ءتۇسىندىرىپتى. ولاردىڭ قالتاسىندا 17 000 تەڭگە اقشا بولعان. قازىر پوليتسيا ەرەسەكتەردىڭ قاراۋىنسىز جۇرگەن جاسوسپىرىمدەردىڭ الماتىعا دەيىن قانداي كولىكپەن بارعاندارىن جانە كامەلەتتىك جاسقا تولماعاندارعا پاتەردى كىمنىڭ جالعا بەرگەنىن انىقتاپ جاتىر.

سوڭعى جاڭالىقتار

بەتپەردە كيگەن كوكتەم - 7

قوعام • بۇگىن، 16:07

Samsung تاعى نە پاتەنتتەدى؟

تەحنولوگيا • بۇگىن، 15:23

تاسقىنعا – توسقىن

ايماقتار • بۇگىن، 13:25

قايىقشى اتانىڭ حيكاياسى

رۋحانيات • بۇگىن، 12:39

ۇقساس جاڭالىقتار