ەستەرىڭىزگە سالا كەتسەك, بىلتىر جىل باسىندا وسكەمەندەگى يدەولوگيالىق تۇرعىدان ەسكىرگەن, كەڭەستىك كوسەمدەر ەسىمىمەن اتالعان ۆوروشيلوۆ داڭعىلى شاكارىم, وردجەنيكيدزە كوشەسى ساعادات نۇرماعامبەتوۆ, رەۆوليۋتسيوننايا قاليحان ىسقاق, دزەرجينسكي امىرە قاشاۋباەۆ, وكتيابرسكايا مۇحامەدجان تىنىشپاەۆ, پيتەر كوممۋنارلارى لەۆ تولستوي, كيروۆ انتون چەحوۆ, كرۋپسكايا ەۆگەني برۋسيلوۆسكي, ەكى سوۆەتسكايا كوشەسىنىڭ ءبىرى الەكساندر زاتاەۆيچ, ەكىنشىسى ادولف يانۋشكەۆيچ, لەنينوگور كوشەسى تەمىرجولشىلار, كومسومول كوشەسى جاستار, گولوۆكوۆ كوشەسى بەيبىتشىلىك, ايتىقوۆ كوشەسى اسار اتاۋلارىن يەلەنگەن-ءدى. ال سەمەيدەگى كرۋپسكايا كوشەسى ءازىلحان نۇرشايىقوۆ, سترويتەلنايا كوشەسى تۇرسىنعازى راحيموۆ, كومسومولسكايا كوشەسى جىبەك جولى, كۋتۋزوۆ كوشەسى ارداگەرلەر, كولحوزنايا كوشەسى بەرەل, سوتسياليستيچەسكايا كوشەسى سامال, دەكابريستوۆ كوشەسى نۇرسايا دەگەن اتاۋلار العان-دى.
بيىل دا بۇل تاراپتا اۋدانداردىڭ بەلسەندىلىگى بايقالادى. جاقىندا بىزگە كوكپەكتى اۋداندىق «جۇلدىز» گازەتىنىڭ باس رەداكتورى, اۋداندىق ونوماستيكالىق كوميسسيانىڭ مۇشەسى دارحان بەردىبەك حابارلاسىپ, كوكپەكتىدە 62 كوشە اتاۋىنىڭ وزگەرگەنىن, مۇنىڭ وبلىستىق ونوماستيكالىق كوميسسيا وتىرىسىندا ماقۇلدانعانىن سۇيىنشىلەي جەتكىزدى. ونىڭ ايتۋىنشا, اۋدان ورتالىعى – كوكپەكتى اۋىلىنداعى كوشەلەرگە تاۋەلسىزدىك, ۇلى دالا ەلى, ىبىراي التىنسارين, وتىنشى ءالجانوۆ, حاميت توقتامىسوۆ, كەگەنباي بي, قاليحان التىنباەۆ, بارماق باتىر سەكىلدى جاڭا اتاۋلار بەرىلىپتى. ال ۇلكەنبوكەن اۋىلىنداعى 9 كوشە قابانباي باتىر, تولە بي, قازىبەك بي, كەنەسارى, ءاليحان بوكەيحان, شوقان ءۋاليحانوۆ, قاسىم قايسەنوۆ سىندى قازاقتىڭ ءبىرتۋار تۇلعالارىنىڭ ەسىمدەرىن الىپتى. سونىمەن قاتار سامار, ق ۇلىنجون, كوكجىرا, باتاۋىش, كوكجوتا, مارينوگوركا, اققالا, سارىبەل, نوۆوسترويكا, ميروليۋبوۆكا, پرەوبراجەنكا اۋىلدارىنداعى كوشەلەر اباي, شاكارىم, ىبىراي التىنسارين, مۇحتار اۋەزوۆ, قانىش ساتباەۆ, باۋىرجان مومىش ۇلى, ءاليا مولداعۇلوۆا, جۇباندىق بولعانباەۆ, تاۋەلسىزدىك, جاستار, بەيبىتشىلىك, دوستىق, ەرتىس, قىزىلشىلىك, تاسسۋات, التاي, توپقايىڭ سياقتى اتاۋلارعا يە بولىپتى. ەرەكشە اتاپ وتەرلىگى, كوكپەكتى اۋدانى بويىنشا بيىل 175 جىلدىق مەرەيتويى اتالىپ ءوتىپ جاتقان اباي قۇنانباي ۇلى قۇرمەتىنە 5 كوشە اتاۋى بەرىلىپتى. «تاۋەلسىزدىكتىڭ العاشقى جىلدارى كوكپەكتىدە جەر-سۋ اتاۋلارىنىڭ تاريحي اتاۋلارىن قايتارۋعا ەسىمى ەلگە بەلگىلى ايتىسكەر اقىن قاليحان التىنباەۆ كوپ ەڭبەك ەتتى. سول كەزدەرى ۆوزدۆيجەنكا ۇكىلى قىز, يۆانوۆكا كوكجايىق, رومانوۆكا اجا دەگەن قازاقى, ءتول اتاۋلارعا يە بولدى. قايراتكەر اعامىز باستاعان ۇلكەن جۇمىس ءبىراز جىل باسەڭدەپ قالعان ەدى, قازىر قايتا جاندانىپ جاتقان جايى بار. قازىر اۋدانىمىزدا مەكتەپ اتاۋلارىن اۋىستىرۋ بويىنشا ءتيىستى جۇمىستار جۇرگىزىلىپ جاتىر», دەيدى د.بەردىبەك.
شىعىس قازاقستان وبلىسى,
كوكپەكتى اۋدانى
