كىتاپحانا ديرەكتورى شولپان شاحمەتوۆانىڭ ايتۋىنشا, قازىر وڭىردەگى اۋىل-قالالاردا ابايدىڭ 175 جىلدىعىنا وراي اقىننىڭ كىتاپتارىن سىيلاۋ شاراسى باستالىپتى. ياعني, قوعامدىق ورىنداردا قالا تۇرعىندارى, قوناقتار اراسىندا ساۋالدامالار جۇرگىزىلۋدە. اباي ولەڭدەرىن, قارا سوزدەرىن, اندەرىن ايتىپ بەرەتىن تۇرعىندارعا ابايدىڭ كىتاپتارى سىيعا بەرىلۋدە.
ال وبلىستىق كىتاپحانانىڭ «اۋىلدىق كىتاپحانا – الەۋمەتتىك ورتالىق» جوباسى اياسىندا اۋىل تۇرعىندارى جەرگىلىكتى كىتاپحانا ماماندارىنىڭ كومەگىمەن e-gov.kz باعدارلاماسى بويىنشا ەلەكتروندى قىزمەتتى پايدالانا الادى. ءتىپتى, جەرگىلىكتى اكىمدىكتەردىڭ ەندى كىتاپحانادا اۋىل ماسەلەلەرىنە وراي جيىندار, كەزدەسۋلەر وتكىزۋگە مۇمكىندىگى بار. اۋىلدىق كىتاپحانالاردا دا اباي كىتاپتارىن سىيلاۋ شاراسى جىل بويى جالعاسادى. بالالار مەن جاسوسپىرىمدەرگە, ۇلكەندەر ءۇشىن كومپيۋتەرلىك ۇيرەنۋ كۋرستارى اشىلماق. مۇمكىندىگى شەكتەۋلى ادامدارعا دا كىتاپحانا قىزمەتكەرلەرى تۇراقتى تۇردە حابارلاسىپ, كومەكتەسەدى.
شولپان شاحمەتوۆانىڭ ايتۋىنشا, جالپى, جاڭعىرتۋدان وتەتىن كىتاپحانالار ەرەجەسى بويىنشا, اۋىلداعى تۇرعىن سانى مىڭ ادامنان كەم بولماۋى كەرەك. مەكتەپتىڭ بولۋى, اۋىلدىڭ اۋدان ورتالىعىمەن بايلانىستا بولۋى مىندەتتى. 2002-2004 جىلدارى «اۋىل كىتاپحاناسى» باعدارلاماسى اياسىندا بىرقاتار اۋىلدا كىتاپحانا اشىلىپ, قازىر 130 كىتاپحانا ءموبيلدى ستاندارتقا, تسيفرلى فورماتقا كوشىرىلۋدە.
قازىر وبلىس بويىنشا 231 كىتاپحانا بولسا, 201-ءى اۋىلداردا. ورتالىق كىتاپحانانىڭ 23 مىڭنان استام وقىرمانى بار. كىتاپحانا قىزمەتىن جاڭا زامانعا ساي جاڭارتۋ جولىنا ءتۇسىرۋدى اۋىلداردان باستاۋ قاجەتتىگى دە تۇسىنىكتى.
جەرگىلىكتى تۇرعىندارعا كىتاپحانا قىزمەتى تولىق قولجەتىمدى, ءتيىمدى بولۋ ءۇشىن «كىتاپحاناتەراپيا» جوباسى دا ىسكە اسقان.
بۇل جوبانىڭ نەگىزگى ماقساتى – كىتاپتى ءار وقىرمانعا جەتكىزۋ. قىزمەتتىڭ قولجەتىمدىلىگى ارتادى, سۇرانىستاردى ۋاقىتىندا جانە جەدەل ورىنداۋ مۇمكىندىگى تۋادى, اقپاراتتىلىعى جانە مازمۇنىنىڭ تەرەڭدىگى جاقسارادى دەگەن سەنىم بار.
سونىمەن بىرگە «وتباسى جىلۋى» جانە «ۇرپاقتار ديالوگى», «كىتاپ قورىن بىرگە جاسايمىز» جوبالارى جۇزەگە اسىرىلۋدا. ياعني, كىتاپ قورى وقىرماننىڭ سۇرانىسىنا بايلانىستى تولىقتىرىلۋدا.
جاستارعا ارنالعان «ZhaStar» جوباسى شەڭبەرىندە كىتاپحانا بارلىق توپتاعى جاستاردى بىرىكتىرىپ, ولاردىڭ ءار سالاداعى, ونەردەگى, عىلىم جانە بيزنەستەگى جەتىستىكتەرىن كورسەتۋدە.
تاعى ءبىر جاڭاشىلدىق – وبلىس ورتالىعىندا ترامۆايلاردا QR-كىتاپحاناسى ارقىلى جولاۋشىلار ارنايى QR كودتاردىڭ كومەگىمەن تاڭدالعان كىتاپتىڭ ەلەكتروندى نۇسقاسىن تەگىن جۇكتەي الادى. QR-كىتاپحانادان ءوڭىر تاريحى, ەكولوگياسى, الەۋمەتتىك-ەكونوميكالىق جاعدايى تۋرالى اقپار الۋعا بولادى. كىتاپحانا قىزمەتىندە دە تسيفرلاندىرۋ جۇيەسى جۇرگىزىلىپ, سيرەك كەزدەسەتىن, قۇندى تۋىندىلار كوشىرىلۋدە. قۇرىلعى جاڭا جانە جىلدام جاڭارتىلىپ وتىرادى. ءارتۇرلى جاستاعى وقىرمان پايدالانا الادى.
ترامۆاي جولاۋشىلارى ءموبيلدى قوسىمشانىڭ كومەگىمەن ۇناعان كىتاپتى ەلەكتروندى نۇسقادا جۇكتەي الادى. بۇل ءۇشىن QR Code Reader نەمەسە ينتەرنەت-سايتتاردىڭ باسقا دا تەگىن قوسىمشالارىن پايدالانىپ, تاڭدالعان كىتاپتاعى QR-كودتى سكانەرلەۋ قاجەت.
كىتاپحانادا Web-رابيس باعدارلاماسىنىڭ 5 ءمودۋلى دە, ياعني, «كىتاپ قورىن تولىقتىرۋ», «كاتالوگيزاتور», «ىزدەۋ جانە تاپسىرىس بەرۋ», «كىتاپ بەرۋ» جانە «وقىرمانداردى تىركەۋ» جۇيەلەرى وقىرماندارعا قىزمەت كورسەتۋدە.
«باسپا بەتتەرىندە», «ەسىمدەردىڭ شوقجۇلدىزى», ء«وڭىر عالىمدارى» «تسيفرلى ەنتسيكلوپەديا», ء«وڭىردىڭ ادەبي كارتاسى», «سۇلتانماحمۇت تورايعىروۆ» ۆيرتۋالدى كىتاپحاناسى», «پاۆلودار ءوڭىرىنىڭ قازىرگى اۆتورلارى» QR-كىتاپحاناسى جوبالارى جالعاسۋدا.
ولكەتانۋ جايىندا ادەبيەتتەردى ساندىق جۇيەگە كەلتىرىپ, سيرەك جانە باعالى كىتاپتاردىڭ ەلەكتروندى كوللەكتسيالارى دايىندالۋدا.
ينتەرنەت جۇيەسىن پايدالانىپ, بەينەكونفەرەنتسيالار, ونلاين رەجىمىندە ۆەبينارلار وتكىزۋ داستۇرگە اينالۋدا. رەسپۋبليكا جانە ەلدەن تىس جەردە وتەتىن شارالارعا قاشىقتىقتان قاتىسۋ وقىرماندارىمىزعا كەرەكتى اقپاراتتار الۋدا ۇلكەن كومەك.
قازىرگى كىتاپحانالار تۇبەگەيلى وزگەرىستەرگە بەيىمدەلۋدە. اقپاراتتىق زامان كىتاپحاناعا دا جاڭا مىندەتتەر مەن ماقساتتار جۇكتەۋدە.
– ويتكەنى, جاستار, جاسوسپىرىمدەر كىتاپ وقۋدان قالىپ, زاماناۋي «گادجەتتەرگە» تاۋەلدى بولۋدا. ءبىزدىڭ ماقسات – كىتاپحانادا ءداستۇر مەن جاڭاشىلدىقتى ساقتاي وتىرىپ, جاڭا زامانعا ساي كىتاپ وقي بىلۋگە شاقىرۋ. عالامدىق جاڭا تەحنولوگيالاردى پايدالانا وتىرىپ, ءداستۇرلى كىتاپ وقۋ مادەنيەتىن جوعالتپاۋ. وقىرمانىمىزدى كوبەيتۋ ءۇشىن كىتاپحاناعا كەلگەن پايدالانۋشىعا بارلىق جاعداي جاسالۋدا, – دەيدى شولپان شاحمەتوۆا.
وبلىس ورتالىعىنداعى «Batyr mall» ساۋدا كەشەنىندە وتكەن شارا بارىسىندا اباي ولەڭدەرىن جاتقا ايتاتىن, قارا سوزدەرىن بىلەتىندەردىڭ كوبى ستۋدەنت جاستار بولعانى قاتتى قۋانتىپتى. بارلىعىنا دا اباي كىتاپتارى سىيعا بەرىلدى.
بۇل كۇندەرى كىتاپحانالىق سالانى مودەرنيزاتسيالاۋ جانە كىتاپحانا مامانىنىڭ ساناسىن وزگەرتۋ, كىتاپحانالىق كەڭىستىكتى جاساپ, ينتەللەكتۋالدى ورتانى قالىپتاستىرۋ باعىتىنا بەت بۇرۋ – زامان تالابى.
پاۆلودار
