«جولاۋشىلار تاسىمالى» اق باس ديرەكتورى ميحاەل كورتيۋمنىڭ ايتۋىنشا, ەسكى ۆاگوندى جوندەۋ كەزىندە تۇتاس مەتالل شاناق پەن قاڭقاسىنان باسقا بولشەكتەردىڭ ءبارى تولىقتاي جاڭارتىلدى.
«بەلارۋستە كۇردەلى جوندەۋدەن وتكەن جولاۋشىلار ۆاگون تولىق جاڭارتىلىپ, كۋپە ۆاگونىنان پلاتسكارت ۆاگونى جاساقتالدى. ۆاگون ىشىندە ەندى بەينەباقىلاۋ, كونديتسيونەر جۇيەسى, ءاربىر جولاۋشىنىڭ وتىراتىن ورنىندا قۋاتى 220ۆ-تىق ەلەكتر نۇكتەسى, جولسەرىكتى شاقىرۋعا ارنالعان سيگنالدى تۇيمەشە, تازا سۋ كۋلەرى, توڭازىتقىش پەن قىسقا تولقىندى پەش ورناتىلدى», دەدى باس ديرەكتور.
كومپانيانىڭ دامۋ ستراتەگياسىنىڭ ماڭىزدى باعىتتارىنىڭ ءبىرى – جولاۋشىلار ۆاگوندارىنىڭ تاپشىلىعىن شەشۋ. وسى ورايدا «جولاۋشىلار تاسىمالى» اق ۆاگونداردىڭ سانىنا عانا ەمەس, ساپاسىنا دا كوڭىل بولەدى. قازىرگى ۋاقىتتا ەسكى ۆاگونداردى جوندەۋ كەستەسى ازىرلەنگەن. ۆاگون پاركىن كەزەڭ-كەزەڭىمەن جاڭارتۋ بويىنشا جۇمىستار جۇرگىزىلۋدە. جىل سايىن ۆاگوندار 100 بىرلىككە دەيىن جاڭارتىلماق.
جالپى 2016-2019 جىلدار ارالىعىندا 269 ۆاگون ساتىپ الىندى. ونىڭ ىشىندە وتكەن جىلى «تۇلپار» جشس ۆاگون جاساۋ زاۋىتىنىڭ رەسەي تەحنولوگياسى بويىنشا قۇراستىرىلعان 91 جاڭا ۆاگونى بار. 2020 جىلى «تۇلپار» جشس-نەن 118 ۆاگون ساتىپ الۋ جوسپارلانۋدا. ونىڭ 18 داناسى – 2020 جىلدىڭ
1 توقسانىندا, ال قالعان 100 داناسى 2020 جىلدىڭ 4-ءشى توقسانىنا جوسپارلانعان. سونداي-اق قىزمەت كورسەتۋ مەرزىمىن ۇزارتۋ ءۇشىن 85 ۆاگوندى كۇردەلى جوندەۋدەن وتكىزۋ جوسپارلانىپ وتىر.
قازىرگى ۋاقىتتا ۇلتتىق تاسىمالداۋشىنىڭ ۆاگون پاركى 2200-دەن اسادى, ونىڭ ىشىندە «تۇلپار-تالگو» ۆاگوندارىنىڭ سانى 670.
ايتا كەتەرلىگى, ءبىر ۆاگوندى كۇردەلى جوندەۋدەن وتكىزۋ 148 ملن تەڭگە تۇرادى. ال جاڭا جولاۋشى ۆاگونىنىڭ قۇنى – 400 ملن تەڭگە.
