«مىنا تۇيەلەر باياناۋىلدا, ءبىزدىڭ جايلاۋىمىزدىڭ جانىندا ءبىر ايدان بەرى ءجۇر. مالدار قازاقستاننىڭ باتىسى جاعىنان كەلگەن دەگەن سوزدەر شىعىپ جاتىر. راسىمەن, سولاي بولار. سەبەبى ءبىزدىڭ وڭىردە تۇيە مالى اتىمەن جوق. جىگىتتەر, وبال عوي دەپ, ءشوبىن بەرىپ جاتىر. تۇيەلەردىڭ «و» دەگەن تاڭباسى بار. جوعالتقان بىرەۋ بار عوي, نە بولسا دا», دەلىنگەن WhatsApp ارقىلى كەلگەن دىبىستىق حابارلامادا.
2014 جىلدىڭ قاراشاسىندا قوسوبا اۋىلىنىڭ تۇرعىنى قاتىرەن باينيازوۆتىڭ جايىلىمدا جۇرگەن تۇيەلەرى جوعالدى. اتپەن, موتوتسيكلمەن, كولىكپەن ىزدەدى. قوسوبا مەن تايپاقتىڭ اراسىن بىلاي قويعاندا, اقتوبەنىڭ قوبداسىن, ءتىپتى اتىراۋ مەن اقتاۋعا دەيىن باردى. اياعى جەتپەگەن جەرگە حابار سالدى. ءىزىم-عايىم جوق. پاۆلودارداعى تۇيەلەر جايلى ەستىگەندە, «مەنىڭ تۇيەلەرىم بولىپ جۇرمەسىن!» دەپ ويلاعانى دا جاسىرىن ەمەس.
– جەتى اتامىزدان بەرى تۇيە باعامىز. ول جانۋاردىڭ ءبىر قاسيەتى – ءوزىنىڭ جايىلىمىنان كوپ ۇزامايدى. جوعالعانىنان-اق قولدى بولدى-اۋ دەپ ويلادىم. حاباردى ەستي سالىسىمەن باياناۋىلداعى جىگىتتەرگە حابارلاستىم. ول جاققا 14 باس بارىپ تۇر ەكەن. قوسوبا مەن پاۆلوداردىڭ اراسى قايدا؟ (جىمپيتىدان 2235 شاقىرىم – اۆتور) شاماسى, تۇيەلەر ۇرلانىپ, كەيىن وزدەرى سولتۇستىك اسىپ كەتىپ تۇر.
بارلىق تۇيە مەنىكى دەۋدەن اۋلاقپىن. اكەم «بىرەۋدىڭ الا ءجىبىن اتتاما!» دەپ ۇيرەتكەن. ارتىق ولجادان دامەتپەيمىن, ماعان ءوزىمنىڭ مالىم بۇيىرسا بولدى, – دەيدى قاتىرەن اعاي.
باياناۋىلداعى تۇيەلەر تۋرالى حاباردىڭ راستىعىن ءوز قۇلاعىمىزبەن بىلمەك بولىپ, ءنومىرىن تاۋىپ, جوعارىداعى حاباردى تاراتقان ادامنىڭ وزىمەن بايلانىسقا شىقتىق. يەسىز مالدى كورىپ, ەلدى قۇلاقتاندىرعان مۇسىلمان ايتمۇحامەد مولشين دەگەن ازامات ەكەن.
– تۇيەلەردىڭ شارۋاشىلىعىمىزدىڭ ماڭىندا جۇرگەنىنە ءبىر ايداي بولدى. يەسىز مال بولمايدى. بۇل تۇيەلەردىڭ يەسى بار, ىزدەپ جاتقان شىعار دەپ ويلادىق. ءوزىمىز دە مال ءوسىرىپ وتىرعان شارۋامىز, جوعالتقاننىڭ زاردابىن بىلەمىز. سودان بىرەۋدىڭ بەينەتتەنىپ اسىراعان مالى عوي, بىرەۋلەر يەمدەنىپ كەتەر دەپ ويلاپ, قاسىمىزداعى جىگىتتەردىڭ قوجالىعىنا تۇراقتاتتىق. پوليتسياعا حابار بەردىك, ءوز كۇشىمىزبەن الەۋمەتتىك جەلى ارقىلى دا جار سالۋدامىز. تۇيەلەر قازىر پاۆلودار وبلىسى باياناۋىل اۋدانىنىڭ س.تورايعىروۆ اۋىلىنا قاراستى مايقايىڭ ەلدى مەكەنىنىڭ ماڭىندا تۇر, – دەدى بىزگە «سارىجايلاۋCAPITAL» شارۋا قوجالىعىنىڭ باسشىسى ايتمۇحامەد مولشين.
باۋىرجان شيرمەدين ۇلى
باتىس قازاقستان وبلىسى,
سىرىم اۋدانى
