«شىنايى ونەردە شەكارا جوق» اتتى شىعارماشىلىق كەشتى قازۇاۋ رەكتورى تىلەكتەس ەسپولوۆ اشىپ, ءوز ءىسىنىڭ ناعىز مامانى مامىرجان بوتابەكوۆتىڭ فوتوونەر سالاسىنداعى ەرەن ەڭبەگىن ايرىقشا اتاپ ءوتتى.
بالا كەزدەن اكەسىنىڭ ءىزىن جالعاپ, اۋەسقويلىقپەن باستالعان بويىنداعى سۋرەتكە ءتۇسىرۋ ونەرى 1984 جىلى گەرمانيادا اسكەري بورىشىن اتقارىپ جۇرگەن كەزەڭىندە ۇشتالا ءتۇسىپ, ارنايى «فوتوگرافيا» كۋرسىن وقۋعا جەتەلەدى. اسكەردە ءجۇرىپ قاتىسقان فوتوگرافتار بايقاۋىندا جۇزدەن جۇيرىك, مىڭنان تۇلپار شىعىپ, جۇلدەلى ورىننان كورىندى. اسكەري بورىشىن وتەگەننەن كەيىن, سول ەلدە ارنايى تاپسىرمامەن تاعى دا سەگىز جىل قىزمەت ەتتى. سول كەزەڭدەردە ءوزى سەكىلدى قاراپايىم قازاق بالاسىنىڭ اراسىنان شىعىپ, شەتەلدىك فوتوقۇرىلعىلاردى جەتىك مەڭگەرىپ, مىقتى نەمىس فوتوگرافتارىمەن يىق تىرەسە جۇمىس ىستەۋى ءبىر جاعىنان, ۇلكەن ماقتانىش بولسا, ەكىنشى جاعىنان, سيرەك كەزدەسەتىن جاعداي.
گەرمانيادا اسكەري قىزمەتتە ءجۇرىپ فوتوسۋرەت ونەرىندەگى جيناقتاعان مول تاجىريبەسىن ەلگە كەلگەننەن سوڭ ءىلياس جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىندە, ءال-فارابي اتىنداعى قازاق ۇلتتىق ۋنيۆەرسيتەتىندە, رەسپۋبليكالىق قوعامدىق-ساياسي «پاراسات», «بايتەرەك» جۋرنالدارىندا, «الماتى اقشامى» گازەتتەرىندە ءساتتى جالعاستىردى. وسى كەزەڭدەردە قالىڭ جۇرتشىلىققا, ءباسپاسوزدى قالت جىبەرمەيتىن تالعامپاز وقىرمان الدىندا جانى بار فوتوسۋرەتتەرىمەن تانىلدى. مەرزىمدى باسىلىمدار مەن البوم-كىتاپتاردا «سۋرەتتى تۇسىرگەن مامىرجان بوتابەكوۆ» دەگەن جازۋمەن تاڭبالانعان سۋرەتتەر كوپتەپ جاريالانا باستادى.
كاسىبي فوتوگراف رەتىندە بىرنەشە شىعارماشىلىق كورمەسى دە تابىسپەن ءوتىپ, لايىقتى باعاسىن الدى. ونەر يەسىنىڭ «الەمدى سۇلۋلىقپەن سەزىنۋ», «مەنىڭ سۇيىكتى ۋنيۆەرسيتەتىم», «تۋعان جەردىڭ تابيعاتى», «مەنىڭ قازاقستانىم», «ولجاس ونەگەسى» تاقىرىپتارىنداعى فوتوسۋرەت كورمەلەرى جۇرتشىلىق كوڭىلىنەن شىقتى.
كاسىبي سالاداعى ەلەۋلى ەڭبەگى جانە تابىستى قىزمەتى ءۇشىن ءار جىلدارى «جىلدىڭ ۇزدىك فوتوگرافى» اتتى و.سۇلەيمەنوۆ اتىنداعى ديپلوم, ءال-فارابي اتىنداعى قازاق ۇلتتىق ۋنيۆەرسيتەتىنىڭ 70 جىلدىعى جانە قازۇاۋ-دىڭ 80 جىلدىعىنا وراي قۇرمەت گراموتالارى, «ايرىقشا ەڭبەگى ءۇشىن» مەدالى, تاۋەلسىزدىگىمىزدىڭ 20 جىلدىق مەرەكەسىنە بايلانىستى Nur Otan پارياسىنىڭ العىس حاتى, قازۇاۋ-دىڭ 85 جىلدىعىنا وراي «اگرارلىق ءبىلىم, عىلىم جانە وندىرىسكە قوسقان ۇلەسى ءۇشىن» مەدالىمەن, «قازۇاۋ-85 جىل!» التىن مەدالىمەن ماراپاتتالدى.
كەزدەسۋ كەشىندە «رۋحاني جاڭعىرۋ» گۋمانيتارلىق زەرتتەۋلەر ورتالىعىنىڭ جەتەكشىسى, اكادەميك حانگەلدى ءابجانوۆ, اقىن, جۋرناليست المات ءيسادىل, تەلە-راديوستۋديا مەڭگەرۋشىسى سانيازبەك نۇعىمان سىندى ارىپتەستەرى مەن ءار فاكۋلتەتتىڭ ستۋدەنتتەرى, «نازارباەۆ ءبىلىم-عىلىم ورتالىعىنىڭ» بەلسەندى جاستارى جىلى لەبىزدەرىن ءبىلدىردى.
