كورپوراتسيا مەن ونىڭ قۇرىلىمدىق بولىمشەلەرىندە 6 200-دەن استام قىزمەتكەر جۇمىس ىستەيدى. سوڭعى بەس جىل ىشىندە اتالعان اكتسيونەرلىك قوعامنان 500 ميلليارد تەڭگەنىڭ كولەمىندە ينۆەستيتسيا تارتىلعان. ايتسە دە سوڭعى كەزدە اتالعان الىپ وندىرىستىك ۇجىم بۇرىنعى جۇردەك جۇرىسىنەن جاڭىلىپ قالعانداي...
ستراتەگيالىق ماڭىزى بار شيكىزات ونىمدەرىن وندىرەتىن ءىرى كاسىپورىننىڭ الداعى ۋاقىتتا شەشىلۋگە ءتيىستى ماسەلەلەرى اۋقىمدى بولۋى تابيعي جايت. كورپوراتسيا بىلتىر ينۆەستيتسيا تارتۋ مولشەرىن كەمىتىپ جىبەرگەن. سونىمەن بىرگە ەڭبەك ونىمدىلىگىنىڭ قارقىنى دا الدىڭعى جىلدارمەن سالىستىرعاندا تومەندەپ كەتكەنى بايقالادى. بۇل ءوز كەزەگىندە ەسكىرە باستاعان قۇرال-جابدىقتاردى قايتا جاڭعىرتۋ قاجەتتىلىگىن كورسەتەدى. سوندا ەڭبەك ونىمدىلىگىن ەكى-ءۇش ەسەگە دەيىن كوتەرۋگە مۇمكىندىك اشىلماق.
سونىمەن بىرگە «سنپس-اقتوبەمۇنايگازدىڭ» سوڭعى ۋاقىتتا ەڭبەكتى ۇيىمداستىرۋ مەن جۇمىسشىلارعا اتقارىپ جۇرگەن اۋقىمدى ەڭبەكتەرىنە لايىقتى ەڭبەكاقى تولەۋ ءىسىن دە شيرىقتىرا الماي جۇرگەنى بايقالادى. ايتالىق, اقتوبە وبلىسى اكىمىنىڭ ورىنباسارى قايرات بەكەنوۆتىڭ مالىمدەۋىنە قاراعاندا, قازىرگى كەزدە كورپوراتسيا قوجايىندارىنىڭ ءوز جۇمىسشىلارىنا تولەپ جۇرگەن ورتاشا ەڭبەكاقىسىنىڭ مولشەرى رەسپۋبليكا بويىنشا مۇناي سالاسى قىزمەتكەرلەرىنىڭ ورتاشا جالاقىسىمەن سالىستىرعاندا ءۇش-ءتورت ەسەگە از ەكەن. بۇل تومەن ستاتيستيكا ەكەنىنە ەشكىم تالاسپايدى.
«سنپس» كورپوراتسياسى ديرەكتورلار كەڭەسىنىڭ توراعاسى ۆان يلين اقتوبە وبلىسىنىڭ اكىمى وڭداسىن ورازالينمەن كەزدەسۋى كەزىندە كۇردەلى جاعدايدىڭ وتكەن جىلى كاسىپورىندا ۋاقىتشا ورىن العان كىدىرىستەر مەن كەدەرگىلەرگە بايلانىستى ەكەنىن ءتۇسىندىردى. ونىڭ ايتۋىنشا, جۇمىسشىلارعا تولىمدى ەڭبەكاقى تولەۋ ماسەلەسى الداعى كەزدە تولىعىمەن شەشىمىن تاپپاق.
تاعى ءبىر اتاپ وتەرلىك جايت, بۇعان دەيىن جاسالعان ءوزارا كەلىسىمدەرگە سايكەس شەتەلدىك كومپانيا قىزمەتكە جەرگىلىكتى ماماندار مەن جۇمىسشىلاردى تارتۋعا ءتيىس. ايتسە دە كەلىسىم تالاپتارى ورىندالماي كەلەدى. ەسەسىنە سوڭعى جيىرما جىلدىڭ ىشىندە كومپانيا باسشىلارى شەتەلدىك جۇمىسشىلاردى قىزمەتكە ۇدايى تارتىپ كەلگەن. سونداي-اق وسى ارالىقتا كاسىپورىن جانىنان قازاقستاندىق مامانداردى وقىتۋ مەن جاڭا كاسىپكە بەيىمدەۋ ىسىندە ۇستىرتتىك پەن ولقىلىققا جول بەرىلگەن.
بۇل ارادا باستى اڭگىمە, ينجەنەر-تەحنيك كادرلارعا بايلانىستى ەمەس, III جانە IV ساناتتاعى قاراپايىم جۇمىسشىلارعا قاتىستى ورىستەپ وتىر. شەتەلدىك كومپانيا باسشىلارى تاراپىنان مۇنداي جاعداي قايتالانا بەرسە, ونىڭ سوڭى جۇمىسشىلار نارازىلىعىنا ۇلاسۋى دا مۇمكىن.
اقتوبە
