ايماقتار • 23 قاڭتار، 2020

ماڭعىستاۋ «تۋعان جەر» باعدارلاماسى بويىنشا رەسپۋبليكادا الدىڭعى ورىندا

434 رەتكورسەتىلدى

بىلتىر 12 ملرد 600 ملن تەڭگەنىڭ جوباسىن جەرگىلىكتى مەتسەناتتار جۇزەگە اسىرعان. بۇل تۋرالى «قوعامدىق كوممۋنيكاتسيالار ورتالىعىندا» وتكەن «رۋحاني جاڭعىرۋ»  باعدارلاماسى اياسىندا اتقارىلعان شارالاردى قورىتۋعا ارنالعان بريفينگتە وڭىرلىك جوبالىق ءوفيسىنىڭ باسشىسى گۇلايىم ازان ءمالىم ەتتى. 

-بىلتىر ماڭعىستاۋ وبلىسىندا كومەككە مۇقتاج وننان استام وتباسى دەمەۋشىلەر قارجىسىنا سالىنعان جاڭا ۇيلەرگە كىرىپ، قونىس تويىن تويلادى. ماسەلەن، ماڭعىستاۋ اۋدانىندا ء«ار قازاق-مەنىڭ جالعىزىم» اتتى قايىرىمدىلىق اكتسياسى اياسىندا «ايتىمان» قوعامدىق قورى شەتپە مەن قوسبۇلاق اۋىلىندا تۇراتىن ءۇش بىردەي از قامتىلعان وتباسىعا ءتورت پاتەرلىك مۋنيتسيپالدى ءۇي سالىپ بەردى، دەدى ماڭعىستاۋ وبلىستىق وڭىرلىك جوبالىق ءوفيسىنىڭ باسشىسى گۇلايىم ازان. 

ال اقتاۋدان ەڭ شالعاي اۋدانى بەينەۋدىڭ 1991 جىلعى تۇلەكتەرى ءبىر جانۇياعا، قاراقيا اۋدانىنىڭ مۇنايشى جانە جەتىباي اۋىلىنداعى 10 وتباسىعا «وعىلاندى-بەكەت اتا» قوعامدىق قورىنىڭ وكىلدەرى جاڭا پاتەردىڭ كىلتىن تابىستاعان.

مۇنايلى اۋدانىنداعى باتىر اۋىلدىق وكرۋگىندە تۇراتىن ءۇش وتباسىعا «ۇممەت جاستارى» قايىرىمدىلىق قورى باسپانا كوتەرىپ بەرسە، تۇپقاراعان اۋدانىنا قاراستى اقشۇقىر اۋىلىنىڭ ەكى تۇرعىنىنا جەكە كاسىپكەر يسا بيمىرزاەۆتىڭ، تاعى ءبىر جانۇياعا وسى اۋىلدىڭ تۇرعىندارى قاراجات جيىپ، ءزاۋلىم ءۇي تۇرعىزعان.

مۇقتاج جاندارعا قولعابىس ەتۋگە باعىتتالعان ساۋاپتى جۇمىستان اقتاۋلىق مەتسەناتتار دا قالىس قالماعان. وبلىس ورتالىعىندا تۇراتىن كوپ بالالى ءبىر وتباسىعا «K7 Group» سەرىكتەستىگىنىڭ باسشىسى ش.ەرمەكباي ۇلى پاتەر سىيلاپ قۋانتسا، تاعى ءبىر جانۇيانىڭ شاڭىراعى «وڭداسىنستروي» مەكەمەسىنىڭ قولداۋىمەن جوندەۋدەن وتكەن.

ايتا كەتۋ كەرەك، ءوڭىر ازاماتتارى جاستار مەن جاسوسپىرىمدەردىڭ بوس ۋاقىتىن ءتيىمدى پايدالانۋ، بۇقارالىق سپورتتى دامىتۋعا دا بەلسەندى اتسالىسىپ كەلەدى. وسى كۇنگە دەيىن دەمەۋشىلەر ەسەبىنەن ماڭعىستاۋ وبلىسىنداعى ەلدى مەكەندەردە جەتى بىردەي سپورت كەشەنى سالىنىپ، 16 بالالارعا ارنالعان ويىن جانە سپورت الاڭى قولدانىسقا بەرىلدى.

ەلباسىنىڭ «رۋحاني جاڭعىرۋ» باعدارلاماارالىق ماقالاسىندا كورسەتىلگەن «اۋىل - ەل بەسىگى» جوباسى اياسىندا جەكە جانە زاڭدى تۇلعالاردىڭ قارجى بولۋىمەن «كورپە-Fest» فەستيۆالىندە كوپ بالالى 15 اناعا وزىق ۇلگىدەگى تىگىن ماشيناسى تارتۋ ەتىلدى. سونىمەن قاتار، قاراقيا اۋدانىنداعى ءتورت مەكتەپتە ينكليۋزيۆتىك ءبىلىم بەرۋ كابينەتى مەن جەتىباي اۋىلىندا مۇمكىندىگى شەكتەۋلى بالالارعا ءبىلىم بەرۋ ورتالىعى اشىلدى.

مەتسەنات قارجىسىنا جاڭاوزەنگە قارايتىن تەڭگە، قىزىلساي جانە راحات اۋىلىندا امبۋلاتوريالىق ورتالىققا ءۇش جەدەل-جاردەم كولىگى، تۇرعىندار يگىلىگىنە ءۇش اۆتوبۋس ساتىپ الىنعان.

وسى اتالعان قىزىلساي مەن تەڭگەدە، ماڭعىستاۋ اۋدانىنداعى اقشىمىراۋ، تاۋشىق، ۇشتاعان، شەبىر ەلدى مەكەنىندە، قاراقياعا قارايتىن سەنەك اۋىلىندا،

بەينەۋ اۋدانىنداعى سارعا مەن بورانقۇلدا تۇرعىندار مەن كاسىپكەرلەر، مەكتەپ تۇلەكتەرىنىڭ دەمەۋشىلىگىمەن ءوزى تۋعان اۋىلدى كوركەيتۋدە كوپتەگەن يگى ىستەر اتقارىلدى.

جومارت جۇرەك ازاماتتاردىڭ اقشالاي قولداۋىمەن ماڭعىستاۋ اۋدانىنىڭ تۇششىقۇدىق اۋىلىندا «ايدار يشان» رۋحانيات ورتالىعى جانە وندى، قىزىلتوبە اۋىلىندا مەشىت سالىندى.

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار