ايماقتار • 22 قاڭتار، 2020

اقتوبەدە ايماقتى باسقارۋدىڭ تىڭ تاسىلدەرى جۇزەگە اسىرىلماق

226 رەتكورسەتىلدى

اقتوبەدە رەسپۋبليكا وڭىرلەرى اراسىندا تۇڭعىش رەت ترانسفورماتسيا جوباسى قولعا الىنىپ وتىر. بۇل نەندەي ۇعىمدى بىلدىرەدى؟ ياعني مۇنىڭ ءوزى بۇعان دەيىن قولدانىلىپ كەلگەن باسقارۋ تاسىلدەرى مەن جولدارىنا تىڭ وزگەرىستەر ەنگىزۋ قاجەتتىلىگىن كورسەتەدى. وسىعان وراي الداعى ۋاقىتتا اقتوبە ايماعىندا ءبىلىم بەرۋ، مەديتسينا ەكولوگيا، جول جانە تۇرعىن-ءۇي قۇرىلىسى، سونداي-اق ينۆەستيتسيا تارتۋ سەكىلدى بۇگىنگى كۇننىڭ «قانى سورعالاپ» تۇرعان سالالارىنىڭ قىزمەتىن ۇيىمداستىرۋ ءىسى ترانسفارماتسياعا، ياعني بەلگىلى ءبىر وزگەرىستەرگە ۇشىراماق.

سۋرەتتە ستراتەگيالىق سەسسيادان كورىنىس

بۇعان باستاماشى بولا بىلگەندەر «CSI» ستراتەگيالىق ورتالىعى مەن «اقتوبە الەۋمەتتىك-كاسىپكەرلىك كورپوراتسياسى». اۋەلى بۇل شىركىندى باستاۋ قيىن دەگەندەي، اتالعان قوس باستاماشىل قۇرىلىم ترانسفارماتسيا ءتاسىلىن ەنگىزۋ ءۇشىن ەڭ الدىمەن ستراتەگيالىق سەسسيا وتكىزۋدى ۇيعارىپتى. بۇل تىركەس تە تۇڭعىش رەت ايتىلىپ وتىرعاندىقتان بۇعان دا انىقتاما بەرە كەتكەننىڭ ارتىقشىلىعى بولا قويماس. «CSI» كومپانياسىنىڭ سەرىكتەسى ولجاس قۇدايبەرگەنوۆتىڭ ايتۋىنشا ستراتەگيالىق سەسسيا ۇعىمى ءبىر ماقساتقا جۇمىلعان جانداردىڭ ءوزارا ۇندەستىگى مەن سەنىمى، ءارى ءبىر-بىرىمەن تىعىز بايلانىسى ء«بىر جاعادان باس، ءبىر جەڭنەن قول شىعارۋ» جولىنداعى بىرلەسكەن ءىس-قيمىلى. ايتالىق بۇگىندە نە كوپ، اكىمشىلىك-باسقارۋ عيماراتتارىندا وتكىزىلەتىن ءار ءتۇرلى جيىندار مەن جينالىستار كوپ. مۇندا كۇن تارتىبىندە تۇرعان بىرقاتار ماسەلەلەر ايتىلعانىمەن، ءومىر مەن تۇرمىستىڭ كوپتەگەن پروبلەمالارى جانە ونى شەشۋدىڭ جولدارى قاعابەرىستەۋ قالىپ قويا بەرەتىنى دە جاسىرىن ەمەس. بەلگىلى ءبىر تاقىرىپتىق ماسەلەگە ارنالعان جيىن ۇستىندە انا پروبلەما ايتىلمادى، مىنا پروبلەما اياقسىز قالدى دەۋدىڭ دە قيسىنى جوق. ساراپتاماشىلاردىڭ مالىمدەۋىنشە جوعارىدا ايتىلعانداي ءوزارا سەنىم مەن اۋىزبىرشىلىك جاعدايىندا، مىنبەر ۇستىندە ەمەس، كەرىسىنشە بىرەر جۇتىم اۋىز سۋ مەن شاي ۇستىندە پروبلەمالار تىزبەگى كوبىرەك كورىنىس بەرەدى ەكەن. مىنە، ستراتەگيالىق سەسسيانىڭ باستى ءبىر ەرەكشەلىگى وسىندا كورىنەدى.

ەل وڭىرلەرى اراسىندا اقتوبەدە العاش رەت وتكىزىلگەن ستراتەگيالىق سەسسيا كەزىندە رەسمي جينالىستاردا ايتىلا بەرمەيتىن پروبلەمالار ايتىلدى دا، انىقتالدى دا. بۇعان قوسارىمىز العاشقى تاجىريبە بولاشاقتا ورتاق ماسەلەلەر مەن تاپسىرمالاردى بىرلەسىپ شەشۋگە مۇمكىندىك بەرە بىلگەندىگى. ستراتەگيالىق سەسسيا بارىسىندا بايقالعان وڭ احۋال مەن اتموسفەرا وسىنداي ءتۇيىن جاساۋعا العىشارت قالايدى. وسى ورايدا رەسپۋبليكا كولەمىندە تۇڭعىش رەت وتكىزىلگەن جىلى شىرايلى باسقوسۋعا قاتىسۋشىلار – مەملەكەتتىك مەكەمە وكىلدەرى، كاسىپكەرلەر مەن دارىگەرلەر جانە ۇستازدار مەن قوعام بەلسەندىلەرى ەكەنىن دە ايتا كەتكەننىڭ ارتىقشىلىعى بولا قويماس. ولاردىڭ جالپى سانى جۇزدەن اسىپ جىعىلادى.

وسىلايشا جاڭاشىلدىق پەن جاسامپازدىقتى تۋ ەتكەندەر توعىز توپقا توپتاسىپ، ءوڭىردىڭ وڭدى تۇستارى ەشقايدا كەتپەيدى، ەشقايدا قاشپايدى دەپ ەسەپتەپ، كەرىسىنشە وبلىستىڭ وسال ءارى ولقى سوعىپ جۇرگەن تۇستارىنا كوبىرەك وي جۇگىرتتى. ءارى ونى قىزۋ تالقىعا سالىپ، وڭ تۇرعىدا شەشۋدىڭ جولدارىن تابۋعا تىرىستى. ايىرىقشا سەسسياعا قاتىسۋشىلاردىڭ اراسىندا اقتوبە وبلىسىنىڭ اكىمى وڭداسىن ورازالين دە بولىپ، كوتەرىلگەن پروبلەمالارعا قاتىستى ءوز وي-پىكىرىن گازەت تىلشىسىنە بىلايشا جەتكىزدى.

«جۇمىلا كوتەرگەن جۇك جەڭىل» دەمەي مە حالقىمىز، وڭىرىمىزدە ترانسفورماتسيانى قولداۋعا ءازىر، ءارى ورەلى وزگەرىستەرگە نيەتتەس، تىلەكتەس ازاماتتاردىڭ مول ەكەندىگى ورتاق ماقساتتار مەن جەتىستىكتەرگە قول جەتكىزۋگە بەرىك نەگىز قالاي الادى. مەنىڭ ويىمشا بۇگىنگى كوتەرىلگەن ماسەلەلەر كوكتەن تۇسە قالعان شەتىن جايتتەر ەمەس. ءبارى دە ورىنداۋعا ابدەن بولاتىن قاراپايىم پروبلەمالار. ءبارىمىزدىڭ ماقساتىمىز – بىرەۋ. بۇل وبلىس تۇرعىندارىنىڭ ساپالى ءومىر ءسۇرۋىن قامتاماسىز ەتۋ.

ءومىر بولعان سوڭ ونىڭ تولعاعى جەتكەن ماسەلەلەرى مەن پروبلەمالارى بولماي تۇرمايدى. ماسەلە سونى شەشۋدىڭ بالامالى جولدارىن ىزدەستىرۋدە ەمەس پە؟ بۇل رەتتە ءار سالانىڭ ءوز كوشباسشىسىن تابا ءبىلۋدىڭ دە ورنى ەرەكشە. ترانسفورماتسيا جوباسىنىڭ باستى ءبىر تارماعى وسى ماسەلەدەن باستاۋ الادى دەدى  «اقتوبە الەۋمەتتىك-كاسىپكەرلىك كورپوراتسياسىنىڭ» باسقارما توراعاسى ەرمەك يمانتاەۆ.

ونىڭ ايتۋىنشى وبلىستا ترانسفورماتسيا جوباسى اياقتالعان سوڭ «اقتوبە نUB» وڭىرلىك ورتالىعى قۇرىلماق. ونىڭ باستى مىندەتى اقتوبە وبلىسىن بۇگىنگى زاماناۋي بيىك تالاپتارعا بيىمدەۋ بولماق. ءوڭىر باسشىسىنىڭ تاپسىرماسىنا وراي سوعان سايكەس تالداۋلار، ماركەتينگتىك زەرتتەۋلەر مەن ساراپتامالار جۇرگىزۋ كوزدەلگەن. اتالعان جاۋاپتى ءىس جوعارىدا اتالعان قۇرىلىمدارعا تاپسىرىلعان. وسى ارادا «اقتوبە اكك»-ءنىڭ سەرىكتەسى «CSI» ستراتەگيالىق باستامالار ورتالىعى تاجىريبەسى باي، كاسىبي دەڭگەيى جوعارى، بىلىكتى ماماندارى مەن ساراپشىلارى مول، ەلدىڭ تىنىس-تىرشىلىگىن زەردەلەي بىلەتىن ءىرى ۇلتتىق كونسالتينگتىك كومپانيا ەكەنى بەلگىلى. ولار ءوڭىردىڭ باستى ەرەكشەلىكتەرى مەن ەكونوميكاسىن تەرەڭ ءارى جان-جاقتى زەرتتەۋگە مۇددەلىلىك پەن قىزىعۋشىلىق تانىتىپ وتىرعانى وزگە اڭگىمەنىڭ سىباعاسى.

مىنە، وسىلايشا اقتوبە ايماعىندا ءوڭىردى باسقارۋدىڭ جاڭاشا ءارى ومىرشەڭ تاسىلدەرىنە ارقا سۇيەيتىن ترانسفارماتسيا جوباسىنىڭ قاداسى قاعىلدى. بۇل باعىت ايماقتىڭ اجارلانا تۇسۋىنە سەپتىگىن تيگىزە الا ما بۇعان ۋاقىتتىڭ ءوزى تورەشى بولا الادى دەمەكپىز.

 

اقتوبە

سوڭعى جاڭالىقتار

ۇقساس جاڭالىقتار