قور نەگىزىنەن 4 قارجىلىق قۇرال ۇسىنادى. بۇل – جەڭىلدىكپەن نەسيەلەندىرۋ; سىياقى مولشەرلەمەسىن سۋبسيديالاۋ; نەسيەگە كەپىل بولۋ; ونلاين وقىتۋ جانە كليەنتتى قارجى ينستيتۋتتارىنا دەيىن جەتەلەۋ.
وسى اتالعان قارجى قۇرالدارىن پايدالانا وتىرىپ, قور 85 مىڭ جوباعا 5,3 ترلن تەڭگە بولگەن.
باسقارما ءتورايىمى گاۋھار بورىباەۆانىڭ ايتۋىنشا, وتكەن جىلى قور قازاقستاندىقتاردىڭ بيزنەسپەن اينالىسۋىنا جاعداي جاساۋعا باسا نازار اۋدارعان. قازىر الەمدىك ەكونوميكانىڭ دامۋىندا شاعىن جانە ورتا كاسىپكەرلىكتىڭ كوبەيىپ, تۇراقتى جۇمىس ورىندارىن اشۋدىڭ ماڭىزى زور. بۇل ءوز كەزەگىندە حالىقتىڭ ءال-اۋقاتىنىڭ كوتەرىلۋىنە سەرپىن بەرەدى. ەكونوميكانى ءارتاراپتاندىرۋ, تابيعي رەسۋرستارعا تاۋەلدىلىكتى تومەندەتۋ ءۇشىن شاعىن جانە ورتا كاسىپكەرلىكتى دامىتۋ كەرەك.
2019 جىلى ەل ۇكىمەتى «قاراپايىم زاتتار ەكونوميكاسىنا» باسىمدىق بەرەتىن جوبالاردى قولداۋ باعدارلاماسىن ىسكە قوستى. «بيزنەستىڭ جول كارتاسى-2020» باعدارلاماسى بەكىتىلدى. شاعىن جانە ورتا كاسىپكەرلىككە قولداۋ كورسەتەتىن بىرقاتار مەملەكەتتىك باعدارلامالار جەتىلدىرىلدى. قور – وسى باعدارلامالاردى جۇزەگە اسىرۋداعى نەگىزگى قارجى وپەراتورلارىنىڭ ءبىرى.
اتالعان ۇيىم ۇلتتىق قور ەسەبىنەن وڭدەۋ ونەركاسىبى سالاسىنداعى كاسىپورىنداردى قولداۋ باعدارلاماسىن, «ەڭبەك» باعدارلاماسىن, ادب جانە ەقدب قاراجاتى ەسەبىنەن شاعىن جانە ورتا بيزنەستەگى ايەلدەردى قولداۋ باعدارلامالارىن, اكىمدىكتەرمەن بىرلەسكەن شاعىن جانە ورتا بيزنەس سۋبەكتىلەرىن قولداۋدىڭ باسقا دا باعدارلامالارىن ءوز قاراجاتى نەمەسە سىرتتان تارتىلعان قاراجات ەسەبىنەن جۇزەگە اسىرىپ كەلەدى. جالپى العاندا, ەدب, مقۇ ارقىلى جەڭىلدىكپەن قارجىلاندىرۋ باعدارلاماسى بويىنشا 61 مىڭ بورىشكەرگە جالپى سوماسى 2,2 ترلن تەڭگە نەسيە بەرىلگەن. 2019 جىلى 18,7 مىڭ جوبا 228 ملرد تەڭگەگە قارجىلاندىرىلعان.
2019 جىلى بارلىق باعدارلاما بويىنشا سىياقى مولشەرلەمەسى سۋبسيديالانعان جوبالار سانى 2 641-گە جەتىپ, نەسيە سوماسى 269,8 ملرد تەڭگە بولىپ, ءوسىم 80 پايىزعا ارتتى. نەسيە سوماسى 36%-عا ارتقان. جالپى العاندا, وتكەن جىلى سۋبسيديالانعان 15,5 مىڭ جوبا 2,8 ترلن تەڭگەگە قولداۋ العان.
2019 جىلى كەپىلدىك بەرەتىن بارلىق باعدارلامالار بويىنشا قولداۋ العان جوبالار سانى 2 673-گە جەتتى. بۇل – 2018 جىلمەن سالىستىرعاندا 38%-عا ارتىق. نەسيە سوماسى 102,7 ملرد تەڭگەنى, ال كەپىلدىك سوماسى 40,4 ملرد تەڭگەنى قۇرادى. جالپى العاندا, باعدارلاما جۇزەگە اسىرىلعان ۋاقىت ىشىندە كەپىلدەندىرۋ قۇرالى ارقىلى 8,6 مىڭ جوبا 302 ملرد تەڭگەگە قولداۋ العان.
«دامۋ» قورى 2019 جىلى 23,5 مىڭ كاسىپكەرگە قولداۋ كورسەتكەن, ال قور باعدارلامالارى بويىنشا قارجىلاندىرىلعان نەسيە سوماسى 600 ملرد تەڭگەدان استى. پورتالدا كاسىپكەرلەردىڭ ءوز جوبالارىنىڭ مەملەكەتتەن كومەك الۋعا سايكەس كەلەتىنىن نەمەسە كەلمەيتىنىن تەكسەرۋگە; سۋبسيديا نەمەسە كەپىلدىك الۋعا, جەڭىل نەسيە الۋعا ءوتىنىمدى online رەجىمدە بەرۋگە مۇمكىندىگى بار.
مەملەكەتتەن قولداۋ العان كاسىپكەرلەر قازاقستاننىڭ الەۋمەتتىك-ەكونوميكالىق دامۋىنا زور ۇلەس قوسۋدا. اتاپ ايتقاندا, 2019 جىل ىشىندە الدىن الا مالىمەتتەر بويىنشا قور قولداۋ بەرگەن كليەنتتەر 5 550 ملرد تەڭگەنىڭ ءونىمىن شىعارىپ, 450 ملرد تەڭگەدەن استام سالىق تۇسىرگەن.
